Jeremías 8 - Bible in Tzeltal de Oxchuc y Tenejapa

¹ Te Cajwaltic jich ya yal: —Te bi c'aalil ya cale ya me sloq'uesbeyic tel ta muquenal sbaquel te muc' ajwaliletic soc te jtsobwanejetic yu'un Judá, te sacerdoteetic, te j'alwanejetic soc te mach'atic cuxinic ta Jerusalén.

² Limil me ta lum ya xjilic ta sit te c'aal, te u soc spisil te eq'uetic te c'ux la yaiyic ta yo'tanique, te la yac' sbaic ta abatinel yu'unic, te la xch'uunique, te ay bila la sjojc'obeyic soc te la squejan sbaic ta stojolique. Ma'yuquix mach'a ya stambeyic sbaquelic te ya xcha'mucbeyic xane. Ya me xjilic ta sba lumq'uinal jich bit'il stsa' chambalam.

³ Te ants-winiquetic te cuxulic xan ya xjilic, te c'ax amen te yo'tanique, ta bayuc ya x'ainic te c'alal ya jpuc baele, ma ba ya sc'an yo'tanic te ya xcuxinique, ja' ya sc'aniquix te ya xlajique. Jich ya cal, jo'on Ajwalilon te Spisil ya xju' cu'une —xi'.

Stoybail Israel soc castigo ta stojol

⁴ La yalbon te Cajwaltique: —Ja'at, Jeremías, albeya yaiy te alumal in jc'op to: “Te c'alal ay mach'a ya xyal, ya sjach sba tel; te c'alal ya xch'ay yu'un te bee, ya xcha'sujt' bael tey a.

⁵ Jich yu'un, Israel, ¿bi yu'un la atoy aba ta jtojol? Jerusalén, ¿bi yu'un te sbajt'el q'uinal ma x'ac'an ach'uunone? ¿Bi yu'un la awat'elin spasel te toybaile, te ma x'ac'an ya sujt'at tele?

⁶ Jun co'tan yacon ta yaiyel stojol; ja'uc me to, ma'yuc mach'a ya caiybey sc'op jtuluc te ya sujt'es yo'tan yu'un te bila amen soc te jamal nax yo'tan ya yal: ‘¿Bila a te jpasoje?’ te xiuque. Ta spisilic la st'unic bael ta animal te sbeique, jich bit'il caballoetic te tulan ya x'animajic ochel ta guerra.

⁷ Jich te cigüeña-mut ta sjamalul ch'ulchan, ya sna' te bi ora ya sujt' tele; te paloma, te ulich soc te smutil ja'e ya sna'ic te bi ora ya xbajt'ic ta yan q'uinale; yan te ja'at, lum cu'un, ma x'ana'beyic sba te mandaliletic cu'une.

⁸ ¿Bit'il ya xju' awu'unic yalel: ‘P'ijotic, melel ay ta jwentatic te mandaliletic yu'un te Cajwaltique’, te xaexe? Te bila ya sts'ibuyic soc te splumae; mero jpaslot; tojol nax ya sts'ibuyic.

⁹ Ja'uc me to, te p'ijic ta sc'opique, peq'uel me ya xjilic. Ya me xnijc' yo'tanic, jichuc chambalametic te ya x'ochic ta pejts'e. ¿Banti ay te sp'ijilic, te bit'il ma la sc'anbonic te jc'ope?

¹⁰ Jich yu'un, te yinamic ya me cac' ta sc'ab yan winiquetic, soc yan yajwalic ya xc'ot te sq'uinalique. Melel ta spisilic, muc'-biq'uit, ja' nax baem yo'tanic ganar ta lo'laywanej; jich nix te j'alwanejetic soc te sacerdoteetic, spisilic ya yaiyic lo'laywanej.

¹¹ Ya la xpoxtaybonic ta sc'opic yejch'en te lum cu'un; ya yalic te lec ay ta spisile, manchuc me ma lecuc ta jc'axel.

¹² Ya me sc'an ya xq'uexawex yu'un te yacalex ta spasel te bila ma sts'ijq'uix cu'une; ja'uc me to, ma'yuc q'uexlal ta yo'tanic, maniwan ya sna'ic te bila a te q'uexlale. Jich yu'un te c'alal ya cac'bey castigo, ya me sc'ojch'in yacan, ya me xyalic jich bit'il te yantique. Jo'on Ajwalilon te ya cale”, uta me —xi' te Cajwaltique.

¹³ Te Cajwaltic jich ya yal: —Ya jset' te lum cu'une, jich bit'il trigo. Ma me ayuc ya xjil jp'ijuc ta ts'usubil, ni ma me ayuc jp'ijuc higo ya xjil ta ste'el. Ja' nax me c'anubenic ya xjil te yabenale —xi'.

¹⁴ Te lum ya me yalic: —¿Bistuc ya x'ainotic li'to? Ya xbootic jpisiltic ta lumetic te tulanic sts'ajc'ule, repente ya smilotic ta jc'axel. Te Cajwaltic te Dios cu'untic ya yac'otic ta lajel; ya yac'botic cuch'tic ja' te capal soc veneno, melel yacotic ta spasel mulil ta stojol.

¹⁵ Yacotic ta smaliyel te ya x'esmajotique; ja'uc me to, ma'yuc bila lec a jul ta jtojoltic. Yacotic smaliyel yutsil q'uinal caiytic ta jc'optic; ja'uc me to, ja' nax ay xiwel.

¹⁶ Talix te jcontrotique, chicanix tel c'alal Dan te xjorlajan nax sni'ic te scaballoique. C'alal x'ilajanic, ya me xnijc' spisil te lumq'uinale. Ya me xtal sjinic te jlumaltic soc spisil te jc'ulejaltic, te lumetic soc te mach'atic nainemic tey a —xiic.

¹⁷ Te Cajwaltic jich ya yal: —Te ja'exe ya jticun tel ta atojolic jti'awal chanetic te ay svenenoil yeic te ya sti'ex ta apisilic; ma'yuc mach'a ya xju' yu'un slamantesbeyel yo'tanic —xi' te Cajwaltique.

Xc'uxul swocol Jeremías yu'un slumal

¹⁸ Te xc'uxul jwocole ma'yuc xpoxil, ya xcomix co'tan ya caiy.

¹⁹ Te yawic ta woclajel te jlumale, ya xchicnaj ta bayuc ta spamal te q'uinale: —¿Ma bal tey ayuquix a te Cajwaltic ta Sión? ¿Ma bal tey ayuquix a te muc' ajwalil yu'une? —xi'. Te Cajwaltic la sjojc'o: —¿Bi yu'un la awac'onic ta q'uexlal te bit'il la ach'uunic te loc'ombaetique, te yantic diosetic te ma'yuc yutsilic ta jyalele? —xi'.

²⁰ C'axix te yorail verano, lajix ta loq'uel sit te awalts'unubile, ma'yuc bay chicnaj tel jcoltayeltic a.

²¹ Ya xwoclajon yu'un swocol te jlumale; te mel-o'tan soc te xiwele la yu'uninon ta jyalel.

²² ¿Ma bal ayuc jtebuc poxil ta Galaad? ¿Ma bal ayuc mach'a ya xpoxtaywan tey a? ¿Bi yu'un ma xcol te jlumale?