Jeremías 7 - Bible in Tzeltal de Oxchuc y Tenejapa

Jeremías la xchol sc'op Dios ta templo

¹ Te Cajwaltic la sc'opon Jeremías, jich la yalbey:

² —Ac'a aba ta yochibal templo cu'un, jo'on te Awajwalone, ac'a ta na'el stojol tey a in c'op to: “Spisil ants-winiquetic ta Judá te ya x'ochex ta yochibal templo te ya aquejan abaic ta jtojol te Awajwalonique, aiya awaiyic stojol te jc'ope.

³ Jo'on te Spisil ya xju' cu'une, te Dioson awu'unic, jich ya calbeyex ja'ex te Israelexe: Lectesaic te acuxlejalic soc te awat'elique, jich me ya cac' ya xcuxinex bael ta bay in q'uinal to.

⁴ Ma me x'awich'ic ta wenta te mach'atic ya xlo'laywanic ta c'op te jich ya yalic: ‘Ilawil te templo yu'un te Cajwaltic. Li' ay to te templo yu'un te Cajwaltic, li' ay to te templo’, te xiic ta yalele.

⁵ “Teme ya alectesic te acuxlejalic soc te awat'elique, soc teme ya xtojob awo'tanic juju-jtul ta stojol te yantique,

⁶ teme ma ba ya atojol-uts'inic te jyanlumetic, te me'ba alaletique, soc te me'ba antsetique, teme ma xamilic te mach'a ma'yuc smul li' ta bay q'uinal to, teme ma xach'uunic yantic loc'ombaetic, te ja'ex nix te tey ya aboltes abaic a,

⁷ jo'on ya cac' xcuxinex bael li' ta lumq'uinal to te cac'ojbey ta swenta sbajt'el q'uinal te antiguo ame'-atatique.

⁸ Te ja'ex ya awich'ic ta muc' te lo'layel c'op te ma xtuun ta jyalele.

⁹ Ya awaiyic elec', milaw, mulwej, soc ya awalic lotil c'op, soc ya awac'bey pom te lotil dios Baal, soc ya ach'uunic diosetic te ma'yuc swentaile.

¹⁰ Ja'uc me to, ta patil ya xtalex li' ta bay templo to, te ac'bilon ta jwenta, ya xtal atejc'an abaic ta jtojol. Yu'un ya acuyic te lec ayex ta ac'opic a, te jich nix ya apasulayic bael in bitic to te ma sts'ijq'uix cu'une.

¹¹ ¿Yu'un bal jich c'oem awu'unic te xch'en j'eleq'uetic te templo ac'bilon ta jwentae? Jo'on quilojix spisil. Jo'on Ajwalilon te jich ya cale.

¹² Baanic ta Silo, te sbabial awilal la jtsa swenta yu'un tey ya x'ainon a. Ilawilic bi la jpasbey scaj te bi mulil la spas te lum Israel cu'une.

¹³ Manchuc me ay la jultesbeyexix awo'tan asta cheb oxeb buelta te bit'il ay te awat'ele, te ja'ex ma x'ac'an ach'uunbonic jmandal, ma'yuc bay ajac'ojbonic jc'op. Jo'on Ajwalilon jich ya cal.

¹⁴ Jich yu'un, jich nix te bit'il la jpasbey te ch'ul templo ta Silo, jich nix ya jpasbey in templo to te ac'bilon ta jwentae, te la cac'beyex te ja'ex soc te antiguo ame'-atatique, te ja' smuc'ulinej awo'tanique.

¹⁵ Ya jch'ojex loq'uel ta jtojol te ja'exe, jich bit'il la jch'oj loq'uel te awermanotac, ja' te sts'umbal Efraín”, xaat me ta stojolic —xi' te Cajwaltic.

Ma junuc yo'tanic ta stojol Dios Israel

¹⁶ La yalbon te Cajwaltique: —Ja'at, Jeremías, ma me xac'oponon yu'un in lum to, ma xawalbon wocol yu'un, ma xc'opojat yu'unic. Ma me xasujon, melel ma me xcaiybat stojol.

¹⁷ ¿Yu'un bal ma x'awil te bi ya spasic ta lumetic ta Judá soc ta calleetic ta Jerusalén?

¹⁸ Te nich'aniletic ya stsobic tel si', te tatiletic ya stsumic c'ajc', te antsetic ya yaiyic juch'majel ta swenta spasel waj te ya xba yac'beyic te lotil dios te Antsil Ajwalil yu'un Ch'ulchan te xi' sbiil yu'unique. Ya sbolc'optayonic a te ya yac'beyic vino te lotil diosetique.

¹⁹ Ja'uc me to, c'ax to xan ya sbolc'optayonic a, soc ja' nix jich ya sbolc'optay sbaic a ta swenta xq'uexlalic. Jo'on Ajwalilon te jich ya cale.

²⁰ Jich yu'un te jo'on Ajwalilon ya me cal ta smelelil te ya jloq'ues tel spisil te quilimba ta stojol in templo to soc ta stojol te ants-winiquetic, soc ta stojol te chambalametic, te te'etic ta q'uinal, soc te trigo. Jich me yilel te bit'il tojc'al te ma xtup'e —xi' te Cajwaltique.

²¹ Te Cajwaltic te Spisil ya xju' yu'une, te Dios yu'un Israel, jich ya yalbey te lum yu'une: —Ac'aic spisil te majt'aniletic chic'bil ta scojt'ol, soc te yantic milbil majt'aniletic te jayeb ya sc'an awo'tanique, soc ti'aic me te sti'balule.

²² Ja'uc me to, te c'alal la jloq'ues tel ta Egipto te antiguo ame'-atatique, ma'yuc bila la calbey ni jtebuc, ma la calbey mandal te ya yac'bon majt'anil te chic'bil ta scojt'ol soc yantic milbil majt'aniletique.

²³ Te bila mandal la calbey, ja' te ya xch'uunbonic te jc'ope, melel jo'on te Dioson yu'unic ya xc'oone, soc ja'ic te lum cu'une. La calbey te tojuc ya yac' sbaic jich bit'il la jpas ta mandal, swenta yu'un lecuc me ya xc'otic ta loq'uel a.

²⁴ Ja'uc me to, ma la xch'uunbonic, ni ma la yich'bonic ta muc'; q'uejel la yac' sbaic ta nitel bael yu'un te stoybail yo'tanique. Sc'oplal te sujt'ic tel ta jtojole; ja'uc me to, ja' la yac'bonic tel te spatique.

²⁵ Ja' to c'alal loq'uic tel ta Egipto te antiguo ame'-atatique, asta c'alal ora yo'tic, ay la jticunbeyex ta spisil te abatetic cu'une, ja' te j'alwanejetique.

²⁶ Ja'uc me to, ma la ach'uunbonic jc'op, ni la awich'bonic ta muc', amen la awac' aba soc awo'tanic, c'ax jich te bit'il la yac' sbaic te antiguo ame'-atatique —xi'.

²⁷ Soc la yalbon te Cajwaltique: —Ja'at, Jeremías, albeya spisil in c'op to, manchuc teme ma xyich'at ta muq'ue; awtaya, manchuc teme ma sjaq'uique.

²⁸ Albeya: “Ja' in nación to ma xch'uunbonic jc'op jo'on te Ajwalilon te Dioson yu'une, ni ma sc'anic tojtesel. Te stojil yutsil yo'tanique ch'ay c'axel ta yeic ta jyalel”, uta me —xi' te Cajwaltique.

Xch'uunel lotil diosetic ta Jerusalén

²⁹ Jerusalén, joxa loq'uel te stsotsil ajole, ch'oja bael. C'ajintaya mel-o'tan c'ayoj ta ch'in witsetic ta jochol taquin q'uinal. Melel te Cajwaltic ilinem ta stojol te awinictaque, la spijt'esix soc la xch'ojix bael ta yo'tan.

³⁰ Te Cajwaltic jich ya yal: —Te ants-winiquetic ta Judá, ay bila spasojic te ma lecuc co'tan yu'une: Te templo yac'ojbon ta jwenta la yaq'uix yajcananic tey a te ilaybil cu'une, la sboltesbeyic sc'oplal.

³¹ Ta bay xatal yu'un Ben-hinom la spasbeyic scajtijib majt'anil ta Tófet swenta yu'un ya xchiq'uic tey a te alalqueremetic ach'ixetic yu'unique, te ma'yuc bay calojbey mandal ta pasel, ma'yuc bay talem ta co'tan ni jtebuc.

³² Ja' yu'un te jo'on te Ajwalilon, jich me ya cal: Ya me sta sc'aalelal te ma ba ya x'albot Tófet te lugare, ni Xatal yu'un Ben-hinom; ja'uc me to, Xatal yu'un Miltomba, xi' me te sbiile. Ta Tófet tey me ya yich' muquel a te animaetic, yu'un ma'yuc yan yawil.

³³ Te sbaq'uetalic te ants-winiquetic te lajemique ya me xtuun yu'un sti'el te xulemetic soc te chambalametic te ya xti'awanique, soc ma'yuc mach'a ya xju' yu'un xiwtesel bael.

³⁴ Ya cac' ch'ayuc ta jc'axel te c'ayojetic yu'un q'uin soc sbujts-o'tanil, soc te c'ayojetic yu'un nujbinel, ta lumetic ta sq'uinal Judá soc ta calleetic ta Jerusalén. Spamal te lum ya xc'atp'uj jilel ta jochol taquin q'uinal —xi' te Cajwaltique.