Jeremías 6 - Bible in Tzeltal de Oxchuc y Tenejapa

Controetic ya sjoytayic Jerusalén

¹ Ants-winiquetic ta sq'uinal Benjamín, leaic anjibal, ananic loq'uel ta Jerusalén. Oq'uesinaic oq'ues ta Tecoa, tejc'anaic jun señail ta Bet-haquerem, melel ay bila ma lecuc ya xtal soc muc' bila amen te ayix tel ta stojol norte.

² Te Sión jich c'oem te bit'il t'ujbil aquiltic

³ te bay ya x'ic'otic bael chijetic yu'un te jcanantaywanejetic yu'unique; ya stsob sbaic ta sjoyobal, juju-jtsojp tey ya sle swe'elic a ta bay ayique.

⁴ Te scontrotaque jich ya yalic: —Chajbana abaic ta yaq'uel guerra soc te lume; la'ic, ya cac'beytic guerra ta olil c'aal. Ja'uc me to, obol jbatic, malelix c'aal, te caxinaltic ya xnajt'ubiquix.

⁵ Jich yu'un ac'a cac'beytic guerra ta ajc'ubal soc ya jinbeytic te toyol sts'ajq'uetic yu'une —xiic.

⁶ Te Cajwaltic te Spisil ya xju' yu'une, ja' la yalix mandal: —Bojaic tel te'etic, but'aic moel lum ta spat sts'ajc'ul ta swenta yac'beyel guerra te Jerusalén. Te lume ya x'ilbotix swocol ta castigo, melel nojel uts'inel tey a.

⁷ Ta Jerusalén tey ya xloc' tel a te bila amene, jich bit'il jun pozo te ya xloc' tel a te ja'e. Ma'yuc bila yan te ay ta aiyel stojol tey a, ja' nax uts'inel soc elec'; ma'yuc yan bila ya quil, ja' nax chamel soc ejch'en.

⁸ Tojtesa aba ta lec, Jerusalén. Teme ma jichuc ya apase, ma me lecuc co'tan yu'un, ya me jq'uej jba bael ta atojol. Ya me jc'atp'unat ta jochol taquin q'uinal; ma me ayuc ants-winiquetic ya quijq'uitaybat —xi' te Cajwaltique.

Sc'oplal castigo

⁹ Te Cajwaltic te Spisil ya xju' yu'une ya yal: —Te israeletic te ya xjilic xan tey a, ya yich' leel, soc ya me yich' leel xan yan buelta; jich bit'il ay ta leel ta bay yabenal ts'usub, te ja' to chican ma'yuc ya xjil p'ijuc ts'usub —xi' te Cajwaltique.

¹⁰ La cal te jo'one: —¿Mach'a me ya yaiybon jc'op, teme ya jc'opon, soc teme ya calbey yaiy in c'op to? Cajwal, smacoj xchiquinic, ma xju' ya yaiyic stojol; ya slabanic te ac'ope, ma'yuc yutsil yo'tanic yu'un.

¹¹ Cajwal, nojelix co'tan yu'un ya caiy te awilimbae, ma xcujch'ix cu'un ya caiy —xoon. Te Cajwaltic la yalbon: —Mala bael te quilimba ta stojol te alaletic ta calle, ta stojol tsojboltsojp queremetic. Ya me x'ic'otic bael ta chuquel te winiquetic soc te yinamique, soc te mamaletic te bayalix ya'wilalique.

¹² Te snaic, te sq'uinalic soc te yinamic ya me xc'axic ta swenta yantic. Melel ya me jtoy jajch'el jc'ab ta swenta yac'beyel castigo te mach'atic nainemic ta lume. Jo'on Ajwalilon te jich ya cale.

¹³ “Spisilic, muc'-biq'uitetic, ja' nax ya snop yo'tanic te staq'uinic ya xwejt' ta bic'tal-o'tanil; j'alwanejetic soc sacerdoteetic, spisilic jlo'laywanejetic.

¹⁴ Ya xpoxtaybonic yejch'en ta sc'opic te lum cu'une; ya yalic te lec ayic ta spisil te c'alal ma lecuc ayique.

¹⁵ Ya me sc'an ya xq'uexawic yu'un te bit'il jich ya spasic te ma sts'ijq'uix cu'une. Ja'uc me to, ma'yuquix q'uexlal ya yaiyic yu'un, ni ma niwan sna'ic te bila a te q'uexlale. Ja' yu'un, te c'alal ya cac'bey castigo, ya sc'ojch'in sbaic soc ya me xyalic jich bit'il te yantique. Jo'on Ajwalilon te jich ya cale —xi' te Cajwaltique.

Stoybail Israel

¹⁶ Te Cajwaltic jich ya yalbey te lum yu'une: —Tejc'ana abaic ta bebetic soc ilawilic, jojc'oic te namey biq'uit beetique, ja' te banti lec xan te be; t'unaic bael, tey me ya acux awo'tanic a —xi'. Ja'uc me to jich la yalic: —Ma jc'an jt'untic bael —xiic.

¹⁷ Te Cajwaltic la spuc j'il-q'uinaletic, soc jich la yalbey te lum yu'une: —Aiya me awaiyic ta lec te c'alal ya xchicnaj ta aiyel señaile —xi'. Ja'uc me to, te lume jich la yal: —Ma jc'antic quich'tic ta muc' —xiic.

¹⁸ Ja' yu'un jich ya yal te Cajwaltique: —Aiya awaiyic stojol, nacionetic, c'otuc ta awo'tanic te bila ya xc'ot ta pasel ta stojol te lum cu'une.

¹⁹ Aiya awaiy stojol, balumilal: Ay bi tulan swocolil ya cac'bey tel ta stojol te lume, ja'ix sit swocolil te bila amen la xchajbane; melel ma la spasic te la yich'bonic ta muc' te jc'ope, la yilaybonic te p'ijubtesel cu'une.

²⁰ Te ja'exe, ¿bistuc ya awich'bonic tel pom ta Sabá, soc te te'etic te bujts'anic yic' ta bay c'ubul lumq'uinaletic? Te jo'one ma lecuc co'tan yu'un te scojt'ol chic'bil majt'anil awu'une, ni yantic milbil majt'anil awu'un —xi' te Cajwaltique.

²¹ Jich yu'un te Cajwaltic jich ya yal: —Te lume ya cac'bey sc'ojch'in yacan, soc ya cac' xyalic. Tatiletic soc nich'aniletic, spat-xujq'uic soc te mach'a jun yo'tanic sbaic soque, pajal me ya xlajic —xi' te Cajwaltique.

C'alal norte ya xtal te mach'atic ya yochintay lum

²² Te Cajwaltic jich ya yal: —C'alal to ta c'ubul q'uinal ta norte, ya xchajban sba tel te nación te bayal yipe.

²³ Chapalic soc te st'imic soc slanzaic; c'ax amen yo'tanic, ma xc'uxtaywanic; te yawique, jich bit'il ya x'awun yip mar, soc cajajtic ta caballo ya xtalic. Chapaliquix ta swenta yac'beyel guerra te Sión —xi'.

²⁴ Te ants-winiquetic ta Jerusalén jich ya yalic: —La caiytiquix stojol sc'oplal, ma'yuquix quiptic yu'un te xiwele; ay mel-o'tan ya caiytic soc xc'uxul, jich bit'il ya x'alaj te antse.

²⁵ Ma me xloq'uex bael ta aquiltic, ma me xbaex ta bebetic. Te controe chapal me; ay me muc' xiwel ta spisil ta bayuc —xiic.

²⁶ Lum cu'un, lapa ch'ixal paq'uetic ta señail te xc'uxul ya awaiyique, balana aba ta c'ajc'al tan, lapa c'u'il yu'un, soc oc'an ta bay nax c'alal, jich bit'il te ya xlaj te jip jtul anich'ane. Melel te mach'a ya xtal sjinotique, ora nax me ya xtal ta jtojoltic.

²⁷ Te Cajwaltic la yalbon: —Ya cac'bat ta awenta te ya awac'bey spasel ta prueba te lum cu'une. Tsajtaya bi yilel te yat'elique —xi'.

²⁸ Cajwal, ta spisilic mero toybaetic ta jyalel; bayal ya xjelawic ta c'op, soc jowejem sjolic; pajal soc bronce soc tulanil taq'uinetic.

²⁹ Te sjubjibal c'ajc' te tulan ya xjujch'iye, ya xtulanaj yu'un te c'ajq'ue, ya yac' x'ulub te plomo. Mero ma xtuun te ya yich'ic lecubtesele, te mach'atic c'ax amenique, ma xch'ayic ta jc'axel.

³⁰ Ac'a me sbiilinic: “Plata te ch'ojbilix baele”, xi'. Melel te ja'at Cajwal, la ach'ojix bael.