Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Jeremías 52 - Bible in Tzeltal de Oxchuc y Tenejapa


Yat'el ajwalil Sedequías
( 2 R 24.18-20 ; 2 Cr 36.11-16 )

1 Te Sedequías ayix jun xcha'winic (21) ya'wilal a te c'alal jajch' ta at'el ta ajwalile, at'ej ta ajwalil ta Jerusalén bulucheb ja'wil. Hamutal sbiil te sme'e, yantsil-nich'an Jeremías talem ta Libná.

2 Ja'uc me to, te yat'el mero ma lecuc ta sit te Cajwaltique, ja' pajal soc te Joacim.

3 Jich yu'un te Cajwaltic ilin yu'un te Jerusalén soc Judá, la xch'oj loq'uel ta stojol. Patil te Sedequías jelaw ta stojol te muc' ajwalil ta Babilonia.


La yich' jinel Jerusalén
( 2 R 24.20—25.7 ; Jer 39.1-7 )

4 Ta slajunebal c'aal sjajch'el a te slajunebal u, ta sbalunebal ja'wil yat'el ta ajwalil a te Sedequías, te muc' ajwalil Nabucodonosor talic soc spisil soldadoetic yu'un ta Jerusalén. La sjoytayic, la spuc sbaic ta sjoyobal. La sbut'ic moel lum ta pat sts'ajc', swenta yu'un ya yac'beyic guerra.

5 Te lum la yich' joytayel ja' to ta sbuluchebal ja'wil yat'el ta ajwalil te Sedequías.

6 Ta sbalunebal c'aal te xchanebal u yu'un a te ja'wil, toy wi'nal ta Jerusalén; jich te ants-winiquetic ma'yuquix te bi ya swe'elinique.

7 Jich yu'un, la slombeyic sts'ajc'ul te lume, manchuc me sjoytayejic te caldeoetique. Te muc' ajwalil soc spisil te soldadoetic yu'une loq'uic bael ta anel ta ajc'ubal. Tey loq'uic bael a ta yochibal te ay ta yolil xchebal te ts'ajq'uetique, ja' te bay sbelal bael te nichimaltic yu'un te muc' ajwalile. La st'unic bael sbelal te spamlej Jordán.

8 Ja'uc me to, te soldado-caldeoetic la snutsic bael te muc' ajwalil Sedequías, tey la staic bael ta spamlej yu'un Jericó. Spisil te soldadoetic yu'un la yijq'uitayic, la spuc sbaic bael.

9 Te caldeoetic la xchuquic te muc' ajwalil Sedequías, la yiq'uic bael ta stojol te muc' ajwalil yu'un Babilonia te ay ta lum Ribla, ta sq'uinal Hamat. Te Nabucodonosor la yal mandal ta ac'beyel castigo te Sedequías.

10 Tey nax ta stojol la yal mandal ta milel te snich'nab soc spisil te mach'atic muc' sc'oplalic ta Judá.

11 Ja' nix jich la yal mandal ta loq'uesel sit te Sedequías, soc te ya xchuquic bael ta cadena soc te ya yiq'uic bael ta Babilonia. Tey la yich' chuquel a, ja' to c'alal laj.


Jinot templo
( 2 R 25.8-21 ; 2 Cr 36.17-21 ; Jer 39.8-10 )

12 Ta slajunebal c'aal sjajch'el a te yo'ebal u yu'un te sbalunlajunebal ja'wil yat'el a te Nabucodonosor muc' ajwalil yu'un Babilonia, te Nabuzaradán muc'ul abat yu'un te muc' ajwalile, soc comandante yu'un te jcanantaywanejetic yu'un te muc' ajwalile, c'ot ta Jerusalén.

13 La xchic' te templo, te muc'ul na yu'un te muc' ajwalile, soc spisil te nanatic ta lume, ja' nix snaic spisilic te mach'atic muc' sc'oplalique.

14 Ta xchajbal te soldado-caldeo te sjoinej tele, la sjinic te sts'ajc'ul ta sjoyobal Jerusalén.

15 Ta ora nax te Nabuzaradán la yic' bael ta mosoil ta Babilonia te mach'atic yajwal te lum te ayic to xan tey a, soc te mach'atic yac'ojix sbaic ta stojol te muc' ajwalil yu'un Babilonia, soc te mach'atic ay bi ya sna'ic spasele.

16 Ja' nax la yijq'uitayic te mach'atic me'baetic ta jyalele, swenta yu'un ya spasic xan te ts'usubiltic soc sc'a'tesel te q'uinale.

17 Te caldeoetic la swuyic te bitic pasbil ta bronce te ay ta templo, jich bit'il te balal taq'uinetic, soc te scajtijib yawil ja'etique, soc te mero muc'ul yawil te ja'e; la yich'ic bael spisil te bronce ta Babilonia.

18 Soc la yich'ic bael te yawil c'ajc'al tan, te palaetic yu'un, te sloq'uesjibal yac'alel mecha, te muc'ul tazaetic, te muc'ul cucharaetic soc spisil te sbiluquil pasbil ta bronce ta swenta xch'uunel te Diose.

19 Te comandante yu'un te jcanantaywanejetic, ja' nix la yich' bael te bitic pasbil ta oro soc ta plata, jich bit'il te spojquil c'abal, te yawil ac'al, te muc'ul tazaetic, te scajtijib c'ajq'uetic, te muc'ul cucharaetic soc te vasoetic ta swenta te majt'anil vino.

20 Ta xcha'cholol te balal taq'uinetic, te mero muc'ul yawil ja', soc te slajchayebal sloc'omba wacax pasbilic ta bronce (te ipajemic a te muc'ul yawil ja'), soc te scajtijib yawil ja'etic te la yal mandal ta pasel te muc' ajwalil Salomón ta swenta templo, te yalale ma ju' ta na'el.

21 Te jujun balal taq'uin ay c'axem jtebuc ta waxaqueb metro te snajt'ile, soc ay c'axem jo'eb metro te sbalejale. Pujulic te yutile, te spimil te bronce juqueb centímetro.

22 Te jujun balal taq'uin ay scorona ta sba pasbil ta bronce, c'axem jtebuc ta cheb metro snajt'il moel. Ay srejail ta sjoyobal, pero spisil pasbil ta bronce, ch'albil ta sloc'ombail granadaetic. Pajal nax xcha'cholol te balal taq'uinetique.

23 Ta bay srejail scoronail te jujune, ay jo'winic (100) sloc'omba granadaetic tey a, jich yu'un ta yelaw q'uinal ay waclajuneb yo'winic (96) te chican ta ilele.


Judioetic ic'otic bael ta nainel ta yan q'uinal

24 Te comandante yu'un jcanantaywanejetic la stsac te Seraías, te ja' muc' sacerdote; te Sofonías, te sacerdote te ja' ya sjel sba soque; soc ta yoxebal te jcanan-ti'nail yu'un templo.

25 Tsabil nax ic'ot bael te mach'atic ayic ta lume, jich bit'il la stsaquic te jtul mach'a ay tey a te ya xmandalaj yu'un te soldadoetique, juctul winiquetic te ayic ta abatinel yu'un stuquel te muc' ajwalil te la staic ta lume, te mach'a tulan yat'el ta soldadoil te ya yac'bey xchajban sba winiquetic ta swenta soldadoil, soc oxwinic (60) winiquetic te muq'uic sc'oplal te ayic ta lume.

26-27 Nabuzaradán la yic' bael spisil ta stojol te muc' ajwalil yu'un Babilonia, te ay ta lum Ribla ta sq'uinal Hamat. La yal mandal te muc' ajwalil yu'un Babilonia te ya yich' milele. Jich a ic'ot bael ta mosoil ta yan q'uinal te lum Judá.

28 Te jayeb te la yic' bael te Nabucodonosor ja' jich yipal in to: ta sjuquebal ja'wil yat'el ta ajwalil a, la yic' loq'uel ta Judá oxmil soc oxeb xcha'winic (3,023);

29 ta swaxaclajunebal ja'wil yat'el a, la yic' loq'uel ta Jerusalén lajchayeb xcha'winic yoxbajc (832);

30 ta oxeb xcha'winic (23) ja'wil, te Nabuzaradán la yic' loq'uel ta Judá jo'eb swaxaclajunwinic xcha'bajc' (745). Te jayeb a loc' ta spisil chanmil soc lajunwinic xcha'bajc' (4,600) te yantesbot bael slumalique.


Joaquín loq'uesot ta cárcel soc la yich' ich'el ta muc' ta Babilonia
( 2 R 25.27-30 )

31 Ta jo'eb xcha'winic (25) c'aal ta slajchayebal u yu'un a te sjuclajunebal xcha'winic (37) ja'wil sbael ta chuquel te muc' ajwalil Joaquín ta Judá, jajch' ta at'el ta muc' ajwalil ta Babilonia te Evil-merodac. La yac' ta ilel yutsil yo'tan ta stojol Joaquín, la sloq'ues ta chucjibal.

32 Lec yo'tan sba soc, jich la yac' ta ich'el ta muc', c'ax jich te bit'il yantic muc' ajwaliletic te ayic soc ta Babilonia.

33 Jich ju' yu'un Joaquín te la sloq'ues sc'u'-spac' te la stuuntes ta chucjibal, soc te jayeb xan c'aal cuxule, la sjoin sba ta we'el soc te muc' ajwalil.

34 Te jayeb xan c'aal cuxin te Joaquín, la yich' coltayel jujun c'aal yu'un muc' ajwalil ta Babilonia.

Biblia en Tzeltal de Oxchuc y Tenejapa © Sociedad Bíblica de México, A.C., 2001.

Bible Society of Mexico
ကြှနျုပျတို့နောကျလိုကျပါ:



ကြော်ငြာတွေ