Jeremías 47 - Bible in Tzeltal de Oxchuc y Tenejapa

Alwanej-c'op ta stojol filisteoetic

¹ Ja' sc'op Cajwaltic te la yalbey te j'alwanej Jeremías te sc'oplal filisteoetique, te c'alal ma to bay yac'ojbey guerra te lum Gaza te faraón. Jich la yal:

² —Jo'on Ajwalilon ya cal: C'alal ta norte ya xmajc' tel q'uinal, jich bit'il ya xmal tel snojel ja'; te ya smuc te lum soc spisil bila ay tey a, te lumetic soc te mach'atic tey ae. Spisil te mach'atic yajwal te q'uinal, ya x'awunic; te ants-winiquetic tulan ya x'awunic yu'un xc'uxul.

³ Ya yaiybeyic sc'op yacan te caballoetic yu'un te ya x'animajique, te stulanil sc'op te carretaetique, te sc'op sruedaile. Ma'yuc yip yo'tanic ya xbajt'ic yu'un te me'il-tatiletique; jich ya spijt'esic jilel te yal-snich'nabique.

⁴ Melel c'otix sc'aalelal te ya xtub ta jc'axel te filisteoetique; te ya xpojbot Tiro soc Sidón te scoltayel te ay xan yu'unique —xi'. Te Cajwaltic ya slajin te filisteoetic, te loq'uic tel ta Creta, te q'uinal joytaybil ta mar.

⁵ Te ants-winiquetic ta Gaza, ya st'axan ta joxel sjolic; te ants-winiquetic ta Ascalón, ya xjilic ta uma'. Te ja'ex slajibalex te antiguo muc'ul najt'il winiquexe, ¿bi ora ya acom abaic ta sbojel abaq'uetalic ta seña te amel-o'tane?

⁶ ¡Ja'at spuñal Cajwal! ¿bi ora ya acom aba? Cha'ochan ta ana, ch'aban, ma xatijix aba.

⁷ Ja'uc me to, ¿bit'il ya xju' ya alaman aba, teme yaloj mandal ta atojol te Cajwaltique, teme yac'ojbat ta awenta te ya awac'bey guerra Ascalón soc ta spisil ti'ti'mar?