Jeremías 45 - Bible in Tzeltal de Oxchuc y Tenejapa

Cajwaltic la yalbey sc'oplal Baruc

¹ Ta xchanebal ja'wil yat'el ta ajwalil a te Joacim te snich'an Josías, te muc' ajwalil yu'un Judá, te Baruc snich'an Nerías yac ta sts'ibuyel a te bila yac ta yalel te j'alwanej Jeremías. Te Jeremías la yalbey:

^2-3 —Ja'at, Baruc, ya awal: “Obol jba”, xaat me. “Te Cajwaltic ma'yuc bila yan ya yac'bon, ja' nax ya yac'bon xc'uxul mel-o'tan. Lubenonix yu'un oq'uel, ma'yuc bay jcuxoj co'tan”, xaat. Melel te Cajwaltique ya yalbat ac'oplal,

⁴ la spason ta mandal te ya calbat ta atojole: “Ya jin te bila ya jpase, soc ya jbul te bila ya jts'une. Jich ya jpasbey ta spamal balumilal.

⁵ Teme ay bi yan yilel te ya ac'ane, ma me x'ac'anbon, melel ya jticun tel tulan woclajel ta stojol spisil mach'atic ch'ich'-baq'uet. Ja'uc me to, te ja'ate ya me cac' te ya acanantay aba soc acuxlejal bayuc ya xbaat. Jo'on Ajwalilon, jich ya cal”, xi' sc'op Cajwaltic ta atojol —xi' te Jeremiase.