Jeremías 41 - Bible in Tzeltal de Oxchuc y Tenejapa

Milot Gedalías

¹ Te Ismael snich'an Netanías, smam Elisamá, te sts'umbalinej sba soc te ajwalile, ta sjuquebal u a bajt' ta Mizpa ta yula'tayel Gedalías, joinbil bael yu'un lajuntul winiquetic. C'alal jun yacalic ta we'el a ta Mizpa,

² te Ismael soc te lajuntul winiquetic te joinbil bael yu'une, jajch'ic ta ora soc spuñalic, la smilic te Gedalías, te ac'bot jilel yat'el ta ajwalil ta Judá yu'un te muc' ajwalil ta Babilonia.

³ Te Ismael la smil spisil te judioetic soc te soldado-caldeoetic te tey ay soc a te Gedalías ta Mizpa.

⁴ Ta yan c'aalil te bit'il lajix a te Gedalías, te c'alal ma to ayuc mach'a yaiyoj stojol a te bila c'oem ta pasele,

⁵ talic ta Siquem, Silo soc Samaria chanwinic (80) ta jtul winiquetic, te xjoxoj yisimic, soc ch'i'emic sc'u'-spaq'uic soc ejch'enajemic, te ja'ic nix la spasbey sbaique. Yich'ojic tel harina soc pom ta swenta yac'bel smajt'an Cajwaltic ta templo.

⁶ Jich yu'un te Ismael loc' bael ta Mizpa ta tael, yacal ta oq'uel ta beel. C'alal nax la sta sbaic soc, jich la yalbey: —La' ila awilic te Gedalías te snich'an Ahicam —xi'.

⁷ Te c'alal nax a c'otic ta yolil te lume, te Ismael soc te swinictaque la smilic, soc la xch'ojic coel ta pozo.

⁸ Ja'uc me to, ay lajuntulic la yalbeyic te Ismael: —Ma xamilotic, yu'un ay jtrigotic, cebada, aceite soc chab jnac'ojtic jilel ta q'uinal —xiic. Jich yu'un te Ismael ma la smil jich bit'il te sjo'taque.

⁹ Te pozo te bay la xch'ojbey coel sbaq'uetal winiquetic te la smile, ja' nix te la yal mandal ta pasel te namey q'uinal muc' ajwalil Asa; ja' yorail a te la scoltay sba ta stojol te muc' ajwalil Baasa yu'un Israel. Mero muc'ul pozo ta jyalel; ja'uc me to, noj yu'un sbaq'uetalic te winiquetic la smil te Ismaele.

¹⁰ Ja' nix jich te Ismael la xchuc bael te yantsil-nich'nab te muc' ajwalile soc te ants-winiquetic te ayic xan ta Mizpa, ja'ic te ac'bot jilel ta swenta Gedalías yu'un te Nabuzaradán te capitán yu'un te jcanantaywanejetique. Te Ismael la xchuc bael, jajch' ta beel yu'un ay ta yo'tan te ya xc'ax ta sq'uinal Amón.

¹¹ Te Johanán snich'an Carea, soc capitanetic yu'un soldadoetic te sjoinej sbaic soque, la yaiyic stojol te bila amen la spas te Ismaele.

¹² La stsob tel spisil te swinictac, bajt'ic ta yaq'uel guerra. Tey la sta sbaic soc a ta bay muc'ul estanqueil ja' te ay ta Gabaón.

¹³ Te mach'atic yic'oj bael ta chuquel te Ismael, la yilic te Johanán soc spisil te capitanetic yu'un soldadoetic te sjoinejique, bin nax yo'tanic la yaiyic yu'un.

¹⁴ Sujt'ic bael, ba stsob sba soc te Johanán.

¹⁵ Ja'uc me to, te Ismael soc te waxactul swinictaque, ju' yu'unic anel bael ta stojol te Johanán, bajt'ic ta sq'uinal Amón.

¹⁶ Te Johanán soc spisil te capitanetic yu'un te soldadoetic te sjoinej sbaic soque, la yic' te jayeb soldadoetic, antsetic, alaletic soc te mach'atic tulan yat'elic te la yic' tel ta chuquel te Ismael, te c'alal loc' tel ta Mizpa te bit'il smilojix jilel a te Gedaliase. Spisilic ic'otic sujt'el tel yu'un Johanán c'alal to ta Gabaón.

¹⁷ Jajch'ic bael ta beel ja' to c'alal c'ot ta Gerut-quimam te nopol ay ta Belén, tey la scom sbaic a. Ay ta yo'tanic te ya xbajt'ic c'alal ta Egipto,

¹⁸ swenta yu'un ya xcolic ta sc'ab caldeoetic ta sc'opic. Ja' ayic ta xiwel yu'un te la smil Gedalías te Ismael, melel te Gedalías ac'bil jilel yat'el ta ajwalil ta slumal yu'un te muc' ajwalil ta Babilonia.