Jeremías 40 - Bible in Tzeltal de Oxchuc y Tenejapa

Jeremías jil soc Gedalías

¹ Te Cajwaltic la sc'opon Jeremías te c'alal ac'otix ta libre ta bay lum Ramá, yu'un te comandante yu'un soldadoetic te ayic ta canantaywaneje. Te Nabuzaradán chucul la sta te Jeremías ta cadena ta yolilal yajwal Jerusalén soc Judá, te ya x'ic'otiquix bael ta mosoil ta Babilonia.

² Te comandante yu'un jcanantaywanej la yic' bael ta stuquel te Jeremías, jich la yalbey: —Te Cajwaltic te Dios awu'une la xchajbanbey sc'oplal te lumq'uinal, te ya sticunbey tel woclajel ta stojole.

³ Ta ora yo'tic la sc'otes ta pasel te sc'ope. Jich c'ot ta pasel ta atojolic te ja'exe, melel la apasic mulil ta stojol te Cajwaltique, ma la awich'beyic ta muc' te sc'ope.

⁴ Yan te ja'ate ya me awil yo'tic ya jloq'uesbat te cadena te chuculat ae. Teme ya ac'an ajoinon bael ta Babilonia, ya me xju' xtalat, jo'on ya jcanantayat. Yan teme ma x'ac'an xtalate, jilan abi. Ila me awil spisil te lumq'uinal te ay ta atojole, baan me tey a te banti lec ya smulan awo'tane.

⁵ Teme ya amulan ya sujt'at bael, baan ta stojol Gedalías, te snich'an Ahicam, smam Safán, te ja' yich'ojix yat'el ta ajwalil ta lumetic ta Judá yu'un te muc' ajwalil ta Babilonia, joina tey a soc te alumale. Baan me tey a ta bay lec ya awile —xi' te comandante. Ta ora la yac'bey smajt'an soc bitic ya xtuun yu'un, la spatbey bael yo'tan.

⁶ Te Jeremías bajt' ta stojol Gedalías ta Mizpa. Tey nain soc a, soc nix te ants-winiquetic te jilemic xan ta slum-sq'uinalique.

Sc'oplal Gedalías

⁷ Te comandanteetic soc te soldado-judioetic te pujq'uem ta q'uinal ta bayuc, la yaiyic stojol te ja' yich'ojix yat'el ta ajwalil te Gedalías yu'un te muc' ajwalil ta Babilonia. Ja' te snich'an Ahicam te ja' jil ta swenta te winiquetic, antsetic soc alaletic, te mach'atic me'baetic ta bay te lumq'uinale, te ma ba ic'otic bael ta Babilonia stuquelique.

⁸ Bajt'ic soc te soldadoetic yu'unic ta Mizpa, ta yilel te Gedalías. Ja'ic te Ismael snich'an Netanías; Johanán soc Jonatán, snich'nab Carea; Seraías snich'an Tanhumet; te snich'nab Efai te ay ta Netofá; soc Jezanías, snich'an jtul winic ta lum Maacat, soc te winiquetic yu'unique.

⁹ Te Gedalías jc'axel la yalbey: —Ma me xiwex ta awac'bel abaic ta stojol te caldeoetique. Jilanic ta nainel li' ta lumq'uinal to. Ac'a abaic ta stojol te muc' ajwalil yu'un Babilonia, jich me lec ya x'ainex a.

¹⁰ Jo'on me ya xjilon ta Mizpa, swenta yu'un ya xc'opojon awu'unic ja'ex ta stojol te caldeoetic c'alal ya xtalic li'to. Te ja'exe at'elinaic stsobel te vino, sit te'etic soc aceite, soc jich me ya xju' xjilex ta lumetic ta bay ayexixe —xi'.

¹¹ Jich nix te judioetic te ayic ta Moab, Amón, Edom soc te yantic nacionetique, la yaiyic stojol te la sc'an yo'tan te muc' ajwalil yu'un Babilonia te ay judioetic te la yac' xan jilel ta sq'uinalic, soc te ja' ac'ot jilel ta ajwalil yu'unic te Gedaliase.

¹² Jich yu'un, sujt'ic bael ta Judá spisilic ta bay pujq'uemic bael ta q'uinale, ba stejc'an sbaic ta stojol Gedalías ta Mizpa. Jich nix la yat'elinic stsobel bayal vino soc sit te'etic.

Ismael la xchajbanbey sc'oplal Gedalías

¹³ Te Johanán snich'an Carea, soc spisil te yantic comandanteetic yu'un soldadoetic te pujq'uemic jilel ta q'uinale, bajt'ic ta Mizpa ta yilel Gedalías,

¹⁴ jich la yalbeyic: —¿Ya bal ana' te Baalis te muc' ajwalil yu'un Amón te sticunej tel Ismael te snich'an Netanías, yu'un ya smilat? —xiic. Ja'uc me to, te Gedalías ma la xch'uun.

¹⁵ Jich yu'un te Johanán la yalbey ta muquen te Gedalías: —Ac'awon bael, ya xba jmil te Ismael, te ma me ayuc mach'a ya sna' te mach'a la smile. ¿Bistuc ya cac'tic te ja' ya xtal smilat te ja'ate? Ja' ya xcha'pujc'otic xan bael yu'un a te jo'otic judioetic jtsobojix jbatic ta ajoyobale, soc ja' sjinel ya xc'ot te jayeb xan jilemic ta Judá —xi'.

¹⁶ Ja'uc me to, te Gedalías la sjac': —¡Ma me xapas! Te bi ya awal yu'un te Ismael, ma meleluc —xi'.