Jeremías 4 - Bible in Tzeltal de Oxchuc y Tenejapa

Ya x'albot sujt'es yo'tan Israel

¹ Te Cajwaltic jich ya yalbat: —Teme ya ac'an sujt'at tel, Israel, ja' me ya sujt'at tel ta jtojol. Teme ya aloq'ues bael te loc'ombaetic awu'un te ilaybile soc te ma q'uejeluc ya awac' aba ta jtojole,

² jich me ya xju' te ya atabon ta alel jbiil ta smelelil, ta stojil soc ta swenta bitic lequic ta pasele. Ta swenta jbiil ya me xc'ot bendición ta stojol te nacionetic, soc ya me yalbonic lec jc'oplal —xi' te Cajwaltique.

³ Te Cajwaltic jich ya yalbey te ants-winiquetic ta Judá soc Jerusalén: —C'altayaic te q'uinal te ma c'altaybiluque; ma ba ya awaiyiquix ts'unbajel ta yolil ch'ixtiquil.

⁴ Ants-winiquetic ta Judá soc Jerusalén, ac'a abaic ta yich'el circuncisión soc na'bonic jba te Awajwalonique, ac'a ta awo'tanic te smarcail te tratoe. Ma me ta scajuc amen awat'elic te tey ya xtil jajch'el jichuc c'ajc' te quilimbae, ya me xtil te ma'yuc mach'a ya xju' yu'un stubele.

Ay mach'a ya yochintay Judá

⁵ “Pucaic ta alel ta Jerusalén soc ta sq'uinal Judá, awunanic soc oq'uesinaic oq'ues ta spuquel ta spamal te lumq'uinale, tulan xawawtayic ta jyalel: “Conic, ya jtsob jbatic, ta lumetic te tulanic sts'ajc'ule”, xaex me.

⁶ Toyaic te bandera, tojlinaic bael a te lum Sión; leaic anjibal, ma me x'acom abaic. Melel ya xba quic' tel ta bay norte te mero muc' te bila amen ya xjinwane.

⁷ Te león-choj loq'uix tel ta xch'en, te mach'a ya sjin te nacionetic yaquix tel ta beel; loq'uix tel ta slumal, swenta yu'un ya sjinbat te alumale, swenta yu'un jochol ya yijq'uitaybat jilel. Jc'axel ma'yuc stuul ya xjil te lumetic awu'une.

⁸ Jich yu'un, lapaic ch'ixal paq'uetic, oc'anic, soc ajc'anajanic yu'un xc'uxul mel-o'tan. “Melel te sc'ajc'al yilimba Cajwaltic te yac ta tilele, ma ba sq'uejoj bael ta jtojoltic”, xaex me ta yalel —xi' te Cajwaltique.

⁹ Te Cajwaltic jich ya yal: —Te c'alal ya xc'ot sc'aalelal, te muc' ajwalil soc te jtsobwanejetic ya xnijq'uic yu'un xiwel, te sacerdoteetic ya me yaiyic bayal xiwel, te j'alwanejetic jchajp nax me q'uinal ya yaiyic yu'un te xiwtesele —xi'.

¹⁰ Jich la cal te jo'one: —Ay, Cajwal, la me alo'lay ta c'op te yajwal Jerusalén. Melel jamal la awalbey te ya xlamaj q'uinal ta stojolique; ja'uc me to, nopolix ya xtaotic yu'un te cuchilloe —la cut.

¹¹ Te Cajwaltic ya yal: —Te bi ora te jich ya xc'ote, jich ya x'albot te lum Jerusalén: “Q'uixin ic' ya xtal ta jochol taquin q'uinal, stojlinej ya xtal ta stojol te lume”, xi' me. Ma me ja'uc te c'unil ic' te ya xtuun ta swenta sloq'uesel spat trigo;

¹² te ic' ya cac' tel jtuquel, c'axem to xan me tulan yu'un a. Ta ora yo'tic ya me cal loq'uel ta que te woclajel ya xc'ot ta stojolique —xi' te Cajwaltique.

Te controetic ya sjoytayic Judá

¹³ Ilawilic te contro yacalic ta noptsajel tel jichuc tocal, te scarretaic yu'un guerra, pajal soc yilel te mero tulan iq'ue, te caballoetic yu'unique, c'ax to jich ya xbeenic yu'un a te bit'il águilae. Obal jbatic, jo'otic te ch'ayemotique.

¹⁴ Jerusalén, poca loq'uel te bila amen ay ta awo'tane, jich me ya xcolat. ¿Jayeb to buelta ya awac'bey awo'tan ta snopel te mulile?

¹⁵ C'alal ta Dan soc ta ch'in witsetic yu'un Efraín ya xc'ot ta alel amen c'opetic tey a:

¹⁶ “Jultesbeya yo'tanic te nacionetic soc Jerusalén te ay lum, c'ubul ay, te banti ya xtal te controetique; ya stoyesic yawic yu'un guerra ta yilbeyel yo'tanic te lumetic yu'un Judá.

¹⁷ Ya sjoytayic Judá, jich bit'il mach'atic ya scanantayic te c'altique, scaj te la stoy sba ta stojol te Cajwaltique”, xi' me. Jo'on Ajwalilon te jich ya cale.

¹⁸ —Ta scaj te bi yilel awo'tan soc te at'eliletic awu'une, te bila c'oem ta pasel ta atojole; scaj te bila amen awu'un te ac'botat ch'aal sit te' c'oem, te ya yejch'entesbat awo'tane —xi' te Cajwaltique.

Swocol la yaiy Jeremías yu'un slumal

¹⁹ Ya jts'ot jba yu'un jwocol, te co'tan xwilwon nax ta jyalel. Ma xcomon ta c'op, ma xju' xch'abon. Ay la caiy stojol sc'op oq'ues, ay aw yu'un guerra.

²⁰ Spisil ora yac ta alel tulan woclajel; spamal lum jinemix. Ora nax la sjinbonic te jcampamentoetic cu'une, la xch'i'boniquix te nailpaq'uetique.

²¹ ¿Jayeb xan ora ya quil toybil bandera, soc te ya caiybey xan stojol sc'op te oq'ues?

²² Te Cajwaltic jich ya yal: —Te lum cu'une ma sna' q'uinal, ma sna'bon jba. Nich'aniletic te jich nax ayic ta q'uinal, ma xc'opoj yo'tanic jtebuc. Ja' nax ay sp'ijilic ta spasel te bila amene, ma ja'uc ya sna'ic spasel te bila leque —xi' te Cajwaltique.

Jeremías ac'bot yil seña jinel ta patil

²³ Ac'boton quil te balumilale, jochol taquin q'uinal yilel, jich nax ay; la quil moel te ch'ulchane, ma'yuc luz tey a.

²⁴ La quil te witstiquile, yacalic ta nijq'uel; spisilic te ch'in witstiquile nijq'uic.

²⁵ La quil te ma'yuquix jtuluc ants-winic tey a, soc spisil te ja'mal mutetique bajt'iquix.

²⁶ La quil soc la jta ta ilel te yaxal q'uinale, c'atp'ujem ta jochol taquin q'uinal, soc spisil te lumetic jinemiquix. Te yilimba Cajwaltic te xiweltic nax sba jich me c'ot ta loq'uel yu'un spisil.

²⁷ Te Cajwaltic jich ya yal: —Te lumq'uinale jochol ya xc'ot; ja'uc me to, ma ba ya jin ta jc'axel.

²⁸ Te balumilale ya xnoj yu'un mel-o'tan, soc te ch'ulchan, ya x'ijc'ub yu'un mel-o'tan. La calix te jc'ope, pero ma ba ya jsujt'es; chapalix cu'un, ma xju' sujt'on bael ta jpat.

²⁹ Ta swenta yawic te mach'atic moemic ta caballo soc te jt'imuywanejetique, spisil te lum ya xloq'uic bael ta animal ta anel. Ya snac' sbaic ta pimil q'uinal, o ya xmoic bael ta najt'il tontiquil. Spisil te lumetic ya xjojch'ajic jilel; ma'yuquix jtuluc yajwal ya xjil.

³⁰ Ja'at lum, jinematix. ¿Bistuc ya alap t'ujbil c'u'iletic? ¿Bistuc ya ach'al aba ta oroetic? ¿Bistuc ya abon ta ijc'al pintura te asite? Ma xtuun ta jyalel te jelawen awutsil ya awac' abae, melel te mach'atic la smulanate, la xch'ojatix jilel. Te bila ya sleat xan yu'une, ja'ix te alajibe.

³¹ Ya caiy stojol awetic yu'un xc'uxul, jich bit'il yajc'an ants te ya x'ayin te sba yale; ja' te awetic yu'un te lum Sión, te ya x'ajc'anaj, ya xbejch'ulay sc'ab yu'un xc'uxul. Jich ya yal: “Obol jba, ya smilonic te jmilawaletique”, xi' me —xi' te Cajwaltique.