Jeremías 39 - Bible in Tzeltal de Oxchuc y Tenejapa

La yich' jinel Jerusalén

¹ Ta slajunebal u yu'un a te sbalunebal ja'wil yat'el ta ajwalil te Sedequías ta Judá, te Nabucodonosor muc' ajwalil yu'un Babilonia been tel spisil soc te soldadoetic yu'une, tal yac'bey guerra te Jerusalén, la sjoytayic ta jyalel.

² Ta sbalunebal c'aal yu'un a te xchanebal u, te sbuluchebal ja'wil yat'el ta ajwalil a te Sedequías, och tel ta lum te soldadoetic te scontroique.

³ Spisilic te mach'atic ay yat'elic yu'un te muc' ajwalil ta Babilonia ochic bael, soc tey la slaman sbaic a ta smuc'ul yochibal sts'ajc'ul te lume. Ja'ic te Nergal-Sarezer, Samgar-nebo, Sarsequim, ja' te tulan yat'el yich'oje, soc xan yan Nergal-Sarezer, te ja' nix jich tulan yat'el yich'oje.

⁴ C'alal la yil te muc' ajwalil Sedequías, soc te soldadoetic yu'un te bila c'ot ta pasel, anic loq'uel ta lum. Ajc'ubal loq'uic bael ta be ta bay ts'unul nichimetic yu'un te ajwalile, ta yochibal te ay ta yolil xchebal te ts'ajq'uetique, coic bael ta be ta stenlej xatal q'uinal yu'un Jordán.

^5-6 Ja'uc me to, te soldado-caldeoetic la snutsic bael, la staic bael te Sedequías ta spamlej bael yu'un Jericó. La xchuquic, la yiq'uic bael ta stojol te muc' ajwalil Nabucodonosor, te ay ta lum Ribla ta Hamat. Te Nabucodonosor tey la xchajbanbey sc'oplal a: la yal mandal ta milel te snich'nab Sedequías, soc spisilic te mach'atic muc' sc'oplalic ta Judá, ta sit te Sedequíase.

⁷ Te Nabucodonosor la yal mandal ta t'usel sit te Sedequías, soc la xchuquic bael ta cadena, la yiq'uic bael ta Babilonia.

⁸ Te caldeoetic la xchic'beyic te spalacio te ajwalil soc te nanatic ta lum. Te sjoyobal sts'ajc'ul te Jerusalén la sjinic coel.

⁹ Ta slajibal, te Nabuzaradán, te comandante yu'un te canantaywanejetic yu'un te muc' ajwalile, la yic' bael ta mosoil ta Babilonia te mach'atic yajwal te lum te ayic to xan tey a, soc te mach'atic c'axemiquix soc te caldeoetique; ja' ta spisil te lume.

¹⁰ Ja' nax a jil ta sq'uinal Judá te mach'atic me'baetic, te mach'atic ma'yuc bi ay yu'unic ta jyalele. Ja' jich c'aalil la yac'bey jilel ts'usubiltic soc sq'uinalic.

Jil ta libre Jeremías

¹¹ Te muc' ajwalil Nabucodonosor yu'un Babilonia la yalbey mandal te Nabuzaradán, comandante yu'un te jcanantaywanejetique ta swenta Jeremías:

¹² —Ic'a ta atojol, canantaya, soc ma me bila amen xawalbey. Ac'beya spisil te bila ya sc'anbate —la yut.

¹³ Jich yu'un te Nabuzaradán, te Nabusazbán soc te Nergal-Sarezer ta xchebalic yich'ojic tulan yat'elic, soc spisil mach'atic ay yat'elic yu'un te muc' ajwalil yu'un Babilonia,

¹⁴ la yalic mandal ta loq'uesel Jeremías ta bay amac' yu'un soldadoetic. La yac'beyic ta swenta scanantayel te Gedalías, te snich'an Ahicam, smam Safán, swenta yu'un ya yiq'uic bael ta sna Gedalías. Jich jil Jeremías ta yolil te lume.

Sc'oplal scoltayel te Ebed-melec

¹⁵ C'alal chucul to ta amac' yu'un soldadoetic te Jeremías, tal sc'op Cajwaltic ta stojol, jich la yalbey:

¹⁶ —Baan ilawil, c'opona te Ebed-melec, te etiope-winique. Albeya: “Te Cajwaltic te Spisil ya xju' yu'une, te Dios yu'un Israel, ya yalbat: ‘Ya me jc'otes ta pasel te bila calojix yu'un te lume, ta swenta bila amen ta stojol, ma ta swentauc yutsilal. C'alal ya xc'ot ta pasel, ya me awil.

¹⁷ Ja'uc me to, ya me xc'opojon awu'un, swenta yu'un ma x'ochat ta sc'abic te mach'atic ya axi'e. Jo'on Ajwalilon, jich ya cal.

¹⁸ Jo'on ya jcoltayat, te ma smilate. Ya me xcolat soc acuxlejal, melel la smuc'ulinon awo'tan. Jo'on, Ajwalilon, jich ya cal’, xi' me sc'op,” uta me —xi' te Cajwaltique.