Jeremías 36 - Bible in Tzeltal de Oxchuc y Tenejapa

Baruc la yil balbil jun ta templo

¹ Ta xchanebal ja'wil yat'el ta ajwalil a te Joacim snich'an Josías, te muc' ajwalil yu'un Judá, te Cajwaltic la sc'opon Jeremías, jich la yalbey:

² —Tsaca junuc balbil jun, ts'ibuya tey a spisil te bila calojbat ta swenta Israel, Judá soc te yantic nacionetique, ja' to me te c'op jajch' calbat tel c'alal ay ta ajwalil a te Josías, ja' to c'alal ora yo'tic.

³ Te ayuc bit'il ya xc'ot ta yo'tanic te mach'atic ayic ta Judá spisil te woclajel te jnopoj ya jticunbey tele, te yacuc yijq'uitay te bila amen ya spasique, jich ya jpasbey perdón yu'un —xi'.

⁴ Te Jeremías la yic' tel te Baruc te snich'an Nerías, la yac'bey sts'ibuy spisil te bila yaloj te Cajwaltique te yac ta yalel loq'uel ta ye te Jeremiase. Jich yu'un te Baruc la sts'ibuy te balbil june.

⁵ Te Jeremías la spas ta mandal te Baruc, jich la yalbey: —Aiya awaiy stojol te bit'il ayone, ma x'ac'oton ochel ta templo yu'un te Cajwaltique.

⁶ Jich yu'un, baan, te bi ora ya scom swe'elic ta yan c'aal, albeya yaiyic te bila ts'ibubil ta balbil jun te la cal te la ats'ibuye, swenta yu'un te lum soc spisil yajwal lumetic yu'un Judá te ay talemic li'to, ac'a yaiybeyic stojol sc'op te Cajwaltique.

⁷ Te ayuc bit'il ya yalbeyic wocol te Cajwaltique, soc te ya yijq'uitayic jilel te amen yat'elique, swenta manchuc ya xjul ta stojol te lum te yilimba soc te sc'ajc'al yo'tan te Cajwaltic te muc' ta jyalele —xi' te Jeremiase.

⁸ Te Baruc jich la spas spisil te bit'il la yal mandal te j'alwanej Jeremías. Bajt' ta templo, la yalbey yaiyic te bila ay ta balbil jun te bay ts'ibubil sc'op te Cajwaltique.

⁹ Ta sbalunebal u ta yo'ebal ja'wil yat'el ta ajwalil a te Joacim, snich'an Josías, te muc' ajwalil yu'un Judá, la yich' pucbeyel sc'oplal te ya spasic ayuno ta stojol Cajwaltic ta spisilic te mach'atic yajwal Jerusalén soc mach'atic ay talemic ta yantic lumetic yu'un Judá.

¹⁰ Te Baruc bajt' ta cajal yamac'ul templo ta bay te Yach'il Yochibale. C'alal ta scuarto Gemarías, te snich'an Safán, te ay yat'el ta cronista, la yalbey yaiy spisil lum te bila ts'ibubil ta balbil jun te tey ay sc'op a te Jeremiase.

Baruc la yalbey yaiyic te bila ts'ibubil ta balbil jun

¹¹ Te Micaías, snich'an Gemarías, smam Safán, la yaiybey stojol sc'op Cajwaltic te ts'ibubil ta balbil jun te la yal Baruc.

¹² Jich bajt' ta spalacio te ajwalile ta scuarto te cronista, te tey ayic ta tsoblej spisilic a te mach'atic toyol yat'elique: Te Elisamá, ja' cronista, Delaía snich'an Semaías, Elnatán snich'an Acbor, Gemarías snich'an Safán, Sedequías snich'an Hananías soc yantic te toyol yat'elique.

¹³ Te Micaías la yalbey yaiyic spisil te bila la yaiy stojol yu'un Baruc te la yil te balbil jun ta stojol te lume.

¹⁴ Te mach'atic toyol yat'elic la sticunic bael te Jehudí, te ja' snich'an Netanías, te smam Selemías, soc ja' antiguo smam te Cusi, ba yalbey te Baruc te ac'a yich' bael te balbil jun te la yalbey yaiyic te lume. Te Baruc la stsac te balbil june, ba stejc'an sba ta stojolic,

¹⁵ jich albot yu'unic: —Naclan, soc ilbotic caiytic te balbil june —xiic. Te Baruc la yalbey yaiyic.

¹⁶ Ta ora nax c'alal la yaiyic stojol, noj xiwel ta yo'tanic, jich la yalbey sbaic: —Ya me calbeytic yaiy spisil te muc' ajwalile —xiic.

¹⁷ Ta ora nax la yalbeyic te Baruc: —Albotic caiytic te bit'il la ats'ibuye —xiic.

¹⁸ Te Baruc la sjac': —Ja' te Jeremías la yal loq'uel tel ta ye stuquel, te jo'one ja' nax la jts'ibuy soc tinta ta balbil jun —xi'.

¹⁹ Jich yu'un la yalbeyic te Baruc: —Te ja'at soc te Jeremías, baan, nac'a abaic, soc ma me ayuc mach'a ya sna' ta bay ya x'ainexe —xiic.

Te muc' ajwalil Joacim la xchic' balbil jun

²⁰ Te mach'atic toyol yat'elic, la yijq'uitayic te balbil jun ta scuarto Elisamá, ja' te cronista, bajt'ic ta yalbel yaiy te muc' ajwalil ta banti aye.

²¹ Te muc' ajwalil la yalbey mandal te Jehudí ta yich'el tel te balbil jun, te jilem ta scuarto Elisamá te cronistae. Te c'alal la yich' tel te Jehudí, la yalbey yaiy te bila ts'ibubil tey a te muc' ajwalil, soc spisil te mach'atic toyol yat'elic te joytaybilic yu'une.

²² Scaj te ja' sbalunebal u yu'un a te ja'wile, te muc' ajwalil ay ta scuarto ta c'atimal, yu'un yorail sic a.

²³ Te c'alal la yilix cha'oxtsaluc te balbil jun te Jehudí, te muc' ajwalil la sboj ta ch'in cuchillo, la yac' ochel ta c'ajc'. Jich la spas ja' to c'alal c'ajc' yu'un spisil te balbil june.

²⁴ Te muc' ajwalil soc te mach'atic toyol yat'elic te la yaiyic stojole, ma ba nijc' yo'tanic yu'un, ni seña xc'uxul mel-o'tan la yaq'uic ta ilel.

²⁵ Te Elnatán, Delaía soc te Gemarías la yalbeyic wocol te muc' ajwalil te manchuc ya xchic' te balbil june; ja'uc me to, jc'axel ma ba ich'bot ta muc' te sc'opique.

²⁶ La yalbey mandal te Jerameel te snich'an muc' ajwalil, te Seraías te snich'an Azriel, soc Selemías snich'an Abdeel, te ya xba xchuquic tel te j'alwanej Jeremías, soc Baruc te secretario yu'une; ja'uc me to, te Cajwaltic la snac'.

Te Jeremías la yac' ta ts'ibuyel yan balbil jun

²⁷ Te bit'il te muc' ajwalil la xchic' te balbil jun ta bay ts'ibubil sc'op Jeremías, te la yac'bey sts'ibuy Baruc, te Cajwaltic la sc'opon xan Jeremías, jich la yalbey:

²⁸ —Tsaca yan balbil jun, ts'ibuya xan spisil te bila ts'ibubil ta sbabial te la xchic' Joacim, te muc' ajwalil yu'un Judá.

²⁹ Soc jich me ya awalbey: “Jich ya yalbat te Cajwaltique: ‘Ja'at la achic' te balbil june, soc la awut te Jeremías, te la sts'ibuy tey a te ya me xtal te muc' ajwalil yu'un Babilonia, ma me scom sba te ya xtal sjin te lumq'uinal, ma me ayuc ants-winiquetic ya yijq'uitay jilel, ni chambalametic.

³⁰ Lec ay jiche, jo'on te Ajwalilone, ya calbat, Joacim, muc' ajwalilat yu'un Judá, te ja'ate ma me ayuc ats'umbal ya xjil ta smuc'ul nactijib David. Te abaq'uetale pacal ya xjil ta yolq'uinal, ta sq'uixnal c'aal soc ta siquil ajc'ubal.

³¹ Ja'at soc te ats'umbale, ja' nix jich te mach'atic toyol yat'elic awu'une, ya cac'bey castigo yu'un te smulique. Ya me cac' te ya xjul ta atojolic ja'ex, soc ta stojol mach'atic yajwal Jerusalén soc Judá, ta spisil te woclajel te la calbeyex sc'oplale, ja' te ma la awich'ic ta muc' te ja'exe’, xi' ac'oplal yu'un te Cajwaltique”, uta me —xi' te Diose.

³² Jich yu'un te Jeremías la stsac yan balbil jun, la yac'bey Baruc te secretario yu'une; te ja' la sts'ibuy spisil te bila la yal Jeremiase. La yac' ta ts'ibuyel spisil nix te bila ts'ibubil ta balbil jun te la xchic' te muc' ajwalil Joacime, soc bayal to xan la yac' ochel yantic aiyejetic te pajal sc'oplal soque.