Jeremías 30 - Bible in Tzeltal de Oxchuc y Tenejapa

Bi la yal Cajwaltic ya xc'ot ta pasel

¹ Ja' sc'op Cajwaltic te la yalbey te Jeremías, jich la yalbey:

² —Te Ajwalilon te Dioson yu'un Israel ya calbat: Ts'ibuya ta jun libro spisil te bila calojbate.

³ Melel ya xtal sc'aalelal te ya cac'bey xan yutsilal te lum cu'une, ja' te Israel soc te Judá. Jo'on Ajwalilon, jich ya cal. Ya jsujt'es tel ta bay lumq'uinal te la cac'bey yu'unin te sme'-statique —xi'.

⁴ Ja' sc'op Cajwaltic ta stojol Israel soc Judá.

⁵ Te Cajwaltic la yal: —Chican awetic yu'un xiwel, nijq'uel soc ma'yuc bay lamal q'uinal.

⁶ Jojc'oya awaiyic, teme ay jtuluc winic te ya stac' ya x'alaje. ¿Bistuquix a te winiquetic ya sut sbaic ya quile, jich c'oemic yilel te ya yaiybeyic xc'uxul jichuc alajel? ¿Bistuquix a te sacuben yelaw c'ot spisilic?

⁷ Ya me xnoptsaj tel sc'aalelal te mero xiweltic nax sbae; ma me ayuc jich sc'aalelal ya xc'ot yan a. Ja' me sc'aalelal te ya yaiy mel-o'tan te lum yu'un Jacob; ja'uc me to, ya me jcoltay.

⁸ Jo'on, Ajwalilon te Spisil ya xju' cu'une, jich ya cal: Ya me cac' ta libre yu'un te yugo c'oem te ay ta mosoinel a te lum cu'une, soc ma me x'ochix ta mosoil yu'un yan lumetic.

⁹ Ya me yac' sba ta abatinel ta jtojol te Yajwalon soc te Dioson yu'une, soc ta stojol David, te ja' ya cac' ta muc' ajwalil yu'unic stuquele.

Cajwaltic ya scoltay lum yu'un

¹⁰ “Jo'on, Ajwalilon, jich ya cal: Ma me xiwat, lum Jacob, abatat cu'un; ma me xnijc' awo'tan, Israel. Melel te ja'ate soc te anich'nab ya me jcoltayex tel ta lum te c'ubul ay ta bay ic'bilex baele. Lamal me q'uinal ya xtal cuxinuquex, jun nax me awo'tanic, ma me ayuc mach'a ya xiwtesex.

¹¹ Jo'on Ajwalilon, jich ya cal, joinejat swenta yu'un ya jcoltayat. Ya me jin spisil te nacionetique, ja' te bay la jpuquex baele. Yan te ja'ate ma ba ya jinat; ja' nax ya cac'bat castigo jich te bit'il ya sc'an te awat'ele; ma me jichuc nax ya quijq'uitayat jilel te ma xcac'bat castigo —xi' te Cajwaltique.

¹² Te Cajwaltic jich ya yal: —Te awejch'en ma'yuc ta poxtayel, te bila amen apasoj, ma'yuc xpoxil.

¹³ Ma me ayuc mach'a ya xc'opoj yo'tan ta atojol; ma'yuc mach'a ya xpoxtaybat awejch'en, ma xju'at ta poxtayel.

¹⁴ Spisil te mach'atic yantsinejat c'oeme, ch'ayat meix ta yo'tanic, ma me xc'opojix yo'tanic ta atojol. Yu'un jo'on la quejch'entesat, jich c'oemon bit'il acontro. Tulan la cac'bat castigo ta scaj bayal te bila amen apasoj, ta scaj te ma x'ajtabaj te amule.

¹⁵ ¿Bistuc ya x'ajc'anajat yu'un te awejch'ene? Te xc'uxule ma'yuc xpoxil. Ta scaj bayal te bila amen apasoj soc te ma x'ajtabaj te muliletic awu'une, ja' yu'un jich la jpasbat.

¹⁶ Ja'uc me to, spisil te mach'a la sbic'at c'oeme, ya xbic'ot uuc; soc spisil acontrotac ya me xbajt'ic ta mosoil ta yan q'uinal. Ya me cac' ya yich' pojel te mach'atic la spojbat abiluque; soc ac'a yich'ic elc'anel te mach'atic la yelc'anate.

¹⁷ Ya me cac'bat xan yutsil q'uinal awaiy, ya jpoxtaybat te awejch'ene; manchuc me jich ya yalbat ac'oplal te acontrotaque: “Te Sión ijq'uitaybilix, ma'yuc mach'a ya xc'opojix yo'tan yu'un”, teme xiique. Jo'on Ajwalilon, jich ya cal —xi' te Cajwaltique.

¹⁸ Te Cajwaltic la yal: —Ya jelbey sc'oplal, lec me ya xc'ot ta loq'uel te nación yu'un Jacob, ya me jna'bey yo'bolil sba te slumale; ya me spasic xan te lumetic tey nix a te bay jinemique, soc te palacioetic, ja' nix ta bay yawilique.

¹⁹ Ya me xloc' c'ayoj ta yalel wocol tey a soc tse'ej yu'un yutsil yo'tanic. Ma me xpejc'aj awajtalul, melel ya me cac' te ya x'esmajexe. Ma'yuc mach'a ya yilayex, melel jo'on ya jmuc'tesbeyex ac'oplalic.

²⁰ Te israeletic jich me ya xc'otic te bit'il ta neelal; te lum yu'une jun me yo'tan ta jtojol, soc jo'on ya cac'bey castigo te j'uts'inwanejetic yu'unique.

^21-22 Ya xloc' ta yolilic te jtsobwanej yu'unique; tey nix ya xloc' ta yolilic jtul ajwalil. Ya me cac' te ya xnoptsaj ta jtojol; ¿ay bal mach'a ya xju' xnoptsaj bael ta jtojol? Ja'ic me te lum cu'une, soc jo'on me Dioson yu'unic. Jo'on Ajwalilon, jich ya cal —xi' te Cajwaltique.

²³ Te yilimba Cajwaltic, jich c'oem bit'il tulan yic'al ja'al, jich bit'il ic' te c'ax tulan ta jyalele, te ya syuc'bey yo'tan te mach'atic amenique.

²⁴ Te yilimba Cajwaltic ma xquejch'aj, ja' to teme ju' ta pasel yu'un te bila ay ta yo'tane. Te ja'exe ya me sta yorail te ya xc'ot ta awo'tanic te c'ope.