Jeremías 3 - Bible in Tzeltal de Oxchuc y Tenejapa

Israel ma junuc yo'tan ta stojol Cajwaltic

¹ Te Cajwaltic jich ya yal: —Teme ya sujt'es yinam te winique: te ants teme ya xba yic' sba soc yan winic, jich ma spas te ya x'ic'ot xan yu'un te sbabial winique. Melel teme jich ya spase, mero chujc'ul sc'oplal ya xc'ot ta spamal q'uinal. Ja'uc me to, jich c'oemat ja'at Israel. La apas mulwej soc bayal winiquetic, ¿ya to bal ac'an sujt'at tel ta jtojol? Jo'on Ajwalilon, jich ya cal.

² “Ilawil ta lec ta bay t'axalix te witsetique: ¿Ay bal junuc te banti ma ba la awac' aba ta c'oponel tey a? La anajc'an aba ta maliywanej jichuc árabe ta jochol taquin q'uinal, la anajc'an aba ta bay ti'be ta smaliyel mach'atic ya smulanat. La aboltesbon te lumq'uinal yu'un amulwej soc te bila amen la apase.

³ Ja' swentail te comenix ja'al ta yorail invierno soc ta yorail primavera. Jich awelaw te bit'il jmulawil antse; ya sc'an yacuc xq'uexawat yu'un.

⁴ Ach' to nax la awalbon: “Jtat, mero joyat c'alal to tel ta calalil.

⁵ ¿Sbajt'el bal q'uinal ya x'ilinat? ¿Sbajt'el bal q'uinal ya xjalaj te awilimbae?”, te xaate. Te c'alal jich yacat ta yalel a, la apas spisil te bila amen te ju' awu'une —xi' te Cajwaltique.

Cajwaltic ya yalbey Israel soc Judá te ya sujt'es yo'tanic

⁶ Ta yorail ay ta muc' ajwalil a te Josías jich la yalbon te Cajwaltic: —¿Awiloj bal te bila la spas te toyba Israele? Ja' te ba yat'elin spasel mulwej ta spisil ta toyol witsetic soc ta yet'al pimil c'ab te'etic.

⁷ La cal ta co'tan, manchuc me la spas ta spisil, te sujt'uc tel ta jtojole; ja'uc me to, ma ba sujt' tel. Te yijts'ine, ja' te Judá te ma junuc yo'tan ta jtojole, la yil.

⁸ Soc la yil te la quijq'uitay jba jilel soc te toyba Israel, och ta jun te la quijq'uitay jba soque, ja' yu'un te mulwej la spase. Ja'uc me to, te Judá te yijts'in Israel, ma junuc yo'tan, ma ba xiw yo'tan yu'un. Ja' nix jich bajt', ba yat'elin spasel te mulweje.

⁹ Ma'yuc swocolil ta pasel la yaiy te la sboltes a te lumq'uinale. Mero ma junuc yo'tan ta jyalel, ba xch'uun te tonetic soc te te'etique.

¹⁰ Ta patil, te Judá te ma junuc yo'tane, ma ba sujt' soc spisil yo'tan ta jtojol, ja' nax la spason ta lot. Jo'on, Ajwalilon te jich ya cal —xi'.

¹¹ Te Cajwaltic jich la yalbon: —Te toyba Israel peq'uel jtebuc te smul yu'un a; ja' bayal smul te Judá te ma junuc yo'tan ta jtojole.

¹² Baan ala ta stojol Israel: “Te Cajwaltic jich ya yal: Sujt'anic tel ta jtojol, ja'at toyba Israel. Ma ba ilinemon ta atojol, ma sbajt'eluc q'uinal ya x'ilinon, melel jo'on ay yutsil co'tan. Jo'on, Ajwalilon te ya cal te jc'ope.

¹³ Ja' nax te yacuc ana' te amule, soc te la acontroin yu'un atoybail te Awajwal te Dios awu'une; te animajat ta sleel te mach'atic la ac'opon aba soc ta bay yet'al spisil te'etic te pim sc'abique, soc ma la ac'an la ach'uun te bila la cale. Jo'on Ajwalilon te jich ya cale”, uta me —xi' te Cajwaltique.

¹⁴ Te Cajwaltic jich ya yal: —Sujt'anic tel, ja'ex toyba alnich'anex, melel jo'on cu'unex. Ya me quic' juju-jtul ta jpam lum, soc che'cheb ta juju-jchajp te ats'umbale, ya me quic' sujt'uc tel ta Sión.

¹⁵ Ya cac'beyex ajwaliletic awu'unic te ya yac'bonic sbujts' co'tane, soc ya me xmandalajic ta atojolic ja'ex soc sp'ijilic soc te bila sna'ojic ta leque.

¹⁶ Te c'alal esmajexix a te alumalic te ja'exe, soc te ayix bayal anich'nabic a, ma me ayuc jtuluc ya yalbey xan sc'oplal te scajonil trato yu'un te Cajwaltique. Ma me ayuc mach'a ya xc'opoj yo'tan jtuluc, ni ma me ayuc mach'a ya sna' xan. Ma me ayuquix falta, ni ma me yich'ix pasel ta yach'il. Jo'on Ajwalilon te ya cal te jc'ope.

¹⁷ Te Jerusalén, “Yawil smuc'ul nactijib Cajwaltic”, xi' me te sbiile. Spisil nacionetic ya me stsob sbaic tey a ta swenta yich'belonic ta muc', soc ma ba ya xcha'pasic soc stoybailic te tey baem yo'tanic a te bila amene.

¹⁸ “Te c'alal ya xc'ot sc'aalelal, te Judá jun ya xc'ot soc Israel; pajal me ya sujt'ic tel ta slumalic ta bay norte, ja' te q'uinal te la cac'bey yu'unin te antiguo ame'-atatic te ja'exe.

La xch'uun lotil diosetic Israel

¹⁹ “Israel, la jnop quic'belat jich bit'il jnich'an soc te ya cac'bat aq'uinalin te ay ta mulanele, ja' te lumq'uinal te mero c'ax bayal yutsil yu'un a ta spisil ta spamal balumilal. La cal te “Jtat”, ya awutone, soc te mero ma'yuc bay ya aq'uej aba bael ta jtojole.

²⁰ Ja'uc me to, jich bit'il ma junuc yo'tan ta stojol smamlal te antse, jich nix ma junuc awo'tanic ta jtojol te ja'exe. Jo'on Ajwalilon te jich ya cale.

²¹ “Ay c'opetic chican ta witstiquil ta jochol taquin q'uinal: Ja'ic te israeletic, te ya x'oq'uic ta sc'anel te yacuc xna'bot yo'bolil sbaique. Jowejic bael a ta bay toj be, soc la xch'ayon ta yo'tanic, jo'on te Ajwalilon te Dioson yu'unique.

²² Sujt'anic tel ta jtojol, ja'ex te toyba alnich'anexe; jo'on ya jch'aybeyex te atoybailique —xi' te Cajwaltique. Jich ya yalic te israeletique: —Li' ayotic to, ya sujt'otic tel ta atojol, melel ja'at Cajwalticat te Diosat cu'untique.

Sujt'ib sc'op israeletic ta stojol Cajwaltic

²³ Ma'yuc bila la jtatic a te ya xbootic ta ch'in witstiquil, o te ya x'awunotic ta sba witstiquil; ja' nax ta swenta Cajwaltic te Dios cu'untic te ya jtatic jcoleltic, jo'otic te israelotique.

²⁴ Te loc'ombaetic te q'uexlaltic sbae, ja' la xch'aybotic te bi la staic te jme'-jtatic, ja' to c'alal alalotic to ae: ja' te chijetic soc wacaxetic, soc te yal-snich'nabique.

²⁵ Ac'a me jpejc'an jbatic yu'un q'uexlal jiche, ac'a me spotsotic te jq'uexlaltique. Melel ja' to ta calaliltic soc asta c'alal ora yo'tic, te jo'otic soc te jme'-jtatic jtaoj jmultic ta stojol Cajwaltic te Dios cu'untique, soc ma ba jch'uunejbeytic sc'op —xiic ta yalel.