Jeremías 28 - Bible in Tzeltal de Oxchuc y Tenejapa

Jeremías soc j'alwanej Hananías

¹ Ta yo'ebal u sjajch'el te xchanebal ja'wil yat'el ta ajwalil ta Judá te Sedequíase, la sc'opon te Jeremías te j'alwanej Hananías snich'an Azur te ay ta lum Gabaón. Tey ayic ta templo soc te sacerdoteetic soc ta spisil te lume. Jich la yalbey:

² —Te Cajwaltic te Spisil ya xju' yu'une, te Dios yu'un Israel, jich la yal: “Ya jwuy te yugo c'oem te yac'oj te muc' ajwalil yu'un Babilonia.

³ Ta cheb ja'wil ya jpas te ya sujt' tel ta templo spisil sbiluquil te la yich' bael ta Babilonia te muc' ajwalil Nabucodonosor.

⁴ Soc ya cac' sujt'el tel li' ta lum to te Jeconías snich'an Joacim, te muc' ajwalil yu'un Judá, soc te yantic ants-winiquetic te loq'uic bael ta Judá te ic'otic bael ta mosoil ta Babilonia. Jo'on Ajwalilon, jich ya cal”, xi' ta yalel te Cajwaltique —xi' te Hananías.

⁵ Te j'alwanej Jeremías la sjac'bey sc'op te j'alwanej Hananías, ta stojol te sacerdoteetic soc spisil te lum te ayic ta templo:

⁶ —Ja' lec jichuc ya spas te Cajwaltique. Ayuc laj bit'il ya xc'ot ta pasel yu'un Cajwaltic te bila la awale, te ya sujt' tel sbiluquil te templo, soc te ya sujt' loq'uel ta Babilonia spisilic te mach'atic yantesbil slumalic tey a.

⁷ Ja'uc me to, aiya awaiy stojol, ya calbat soc spisil te lume:

⁸ Te mach'atic neel j'alwanejetic cu'untic ta namey, te c'alal ma to x'ayinotic a, la yalbeyic sc'oplal guerra, woclajel soc chamel te ya xmilawane ta stojol bayal ta jchajp nacionetic soc tulanil ajwaliletic.

⁹ Yan teme ay jtul j'alwanej ya yalbey sc'oplal lamal q'uinal, teme ya xc'ot ta pasel te sc'ope, ja' me prueba te ya xc'ot ta pasel te ja' ticunbil yu'un te Cajwaltique —xi'.

¹⁰ Jich yu'un te Hananías la sloq'uesbey te yugo ay ta snuc' Jeremías, la swuy ta c'asel

¹¹ ta comonsitil ta stojol te lume, te c'alal jich yac ta yalel a: —Te Cajwaltic jich ya yal: “Jich nix bit'il to, ta cheb ja'wil ya jloq'ues te yugo te yac'ojbey ta snuc' spisil nacionetic te muc' ajwalil Nabucodonosor ta Babilonia, ya jwuy ta mero melel”, xi' ta yalel te Cajwaltique —xi'. Te Jeremías bajt'.

¹² C'alal c'axix che'oxeb c'aal a te la swuy Hananías te yugo ay ta snuc' Jeremías, te Cajwaltic la yalbey te j'alwanej Jeremías:

¹³ —Baan, albeya te Hananías: “Te jo'on Ajwalilon ya cal: La awuy ta c'asel te yugo-te'e; ja'uc me to, jchajbanejbat jun yugo-taq'uin.

¹⁴ Melel te jo'on Ajwalilon te Spisil ya xju' cu'une, te Dioson yu'un Israel, jich ya cal: Cac'ojbeyix ta snuc' spisil nacionetic te yugo-taq'uin, swenta yu'un ya yabatin te muc' ajwalil Nabucodonosor yu'un Babilonia. Asta te ja'mal chambalametic cac'ojbey ta sc'ab”, uta me —xi' te Cajwaltique.

¹⁵ Jich yu'un te Jeremías ba yalbey te Hananías: —Aiya awaiy stojol, Hananías. Te Cajwaltique ma ba sticunejat, tojol nax ya awac'bey smuc'ul yo'tan te lume.

¹⁶ Jich yu'un te Cajwaltic jich ya yal: “Ta melel ya jticunat bael; ja'uc me to, ta swenta ach'ayel ta jc'axel ta q'uinal. Ja' in ja'wil to ya me xlajat, melel ta scaj ac'op la awac' scontroinon te lume”, xi' me ac'oplal yu'un te Cajwaltique —la yut.

¹⁷ Te j'alwanej Hananías laj ta sjuquebal u a te ja'wil te c'opoje.