Jeremías 27 - Bible in Tzeltal de Oxchuc y Tenejapa

Señail yugo

¹ Ta xchanebal ja'wil yat'el ta ajwalil ta Judá te Sedequías te snich'an Josías, te Cajwaltic la yalbey c'op te Jeremías,

² jich la yalbey: —Pasa jun yugo soc xchujq'uil, ac'a ta anuc' swenta seña te mosoinbilat yu'un yan.

³ Soc ticunbeya c'op te muc' ajwaliletic ta Edom, Moab, Amón, Tiro soc Sidón, ta swenta te j'al-c'opetic yu'unic te julemic ta Jerusalén ta yula'tayel te muc' ajwalil Sedequías.

⁴ Ala mandal ta albeyel te muc' ajwaliletic yu'unic, te jo'on Ajwalilon te Spisil ya xju' cu'une, te Dioson yu'un Israel, jich ya cal:

⁵ Ta smuc'ul cu'el la jpas te balumilale, soc te ants-winiquetic soc te chambalametic te ayic tey a, soc ya xju' ya cac'bey te mach'a ya sc'an co'tane.

⁶ Lec ay jiche, ta spisil te balumilal jo'on cac'ojbey ta swenta te cabat Nabucodonosor, te muc' ajwalil yu'un Babilonia, asta te ja'mal chambalametic, la cac'bey swenta yu'un ya yabatin.

⁷ Spisil te nacionetic ya me yac' sbaic ta abatinel yu'un, soc ta stojol te snich'an, soc nix ta stojol te smame, ja' to me c'alal ya xc'ot sc'aalelal ya x'och ta c'abal yu'un niwactic nacionetic soc tulanil ajwaliletic uuc.

⁸ Teme ay nacionetic o ajwaliletic, te ma xyac' sbaic ta yich'el yugo yu'un Nabucodonosor, ya cac'bey castigo ta guerra, wi'nal soc chamel te ya xmilawane, ja' to teme och ta sc'abe. Jo'on Ajwalilon, jich ya cal.

⁹ “Ja'uc me to, ma me x'awich'beyic ta muc' sc'op te j'alwanejetic awu'unic, soc te mach'atic ya sna'ic syoljoltayel, soc te ya yalic te swaichique, soc te mach'atic ya sna'ic yalel te bila ya xc'ot ta patile, soc te mach'atic ya sna'ic pic-c'abale, te jich ya stac'uyex te ma xawac' abaic ta sc'ab te muc' ajwalil yu'un Babilonia.

¹⁰ Te bila ya yalique, lotil me. Ja' nax ya yac'beyex ataic a te ya jyantesbeyex alumalique, soc te ya jpuquex bael te ya xlajexe.

¹¹ Yan te nación te ya yac' sba ta sc'ab te muc' ajwalil yu'un Babilonia, ya quijq'uitay jilel ta sq'uinal swenta yu'un ya xcuxin tey a soc ya sc'altay. Jo'on Ajwalilon, jich ya cal —xi'.

¹² Jo'on, Jeremíason, la calbey spisil Sedequías te muc' ajwalil yu'un Judá, soc jich la calbey xan: —Ac'a abaic ta sc'ab te muc' ajwalil yu'un Babilonia soc te lum yu'une, jich me ya xcuxinex.

¹³ ¿Bi ya ata a teme ya xlajat ja'at soc te alumal ta scaj guerra, ta wi'nal soc ta chamel? Melel te Cajwaltic yaloj te bila ya xc'ot ta pasel ta stojol spisil te mach'a ma xyac' sba ta sc'ab te muc' ajwalil yu'un Babilonia.

¹⁴ Ma x'awich'beyic ta muc' sc'op te j'alwanejetic te ya stac'uyex te ma xawac' abaic ta sc'ab te muc' ajwalil yu'un Babilonia. Lotil te bila ya yalbeyexe.

¹⁵ Te Cajwaltic tulan ya yal te ma ja'uc la sticun tele; tojol c'opetic nax ya yalic ta swenta te Cajwaltique. Jich me ya slajinex spuquel bael te Cajwaltique. Ya me xlajex ja'ex soc te j'alwanejetic te la yalbeyex te c'ope —xon.

¹⁶ Jich nix la jtojlin ta c'op te sacerdoteetic soc spisil te lume, jich la calbey: —Ja' la yal Cajwaltic: “Ma x'awich'beyic ta muc' sc'op te j'alwanejetic, te mero smelelil yaiyele, te ora nax ya xcha'sujt' tel ta Babilonia te sbiluquil templo. Te bila ya yalbeyexe, lotil me.

¹⁷ Ma me x'awich'beyic ta muc' te sc'opique. Ac'a abaic ta sc'ab te muc' ajwalil yu'un Babilonia, jich me ya xcuxinex. ¿Bi ya xtuun awu'unic a te ya xc'atp'uj ta jinem ts'ajq'uetic te lume?

¹⁸ Teme smelelil te ja' j'alwanejetic soc teme smelelil c'opojonix te jo'one, c'anbonic ta jtojol jo'on te Ajwalilon te Spisil ya xju' cu'une, te ma me xcac' bael ta Babilonia te sbiluquil templo te ay to jileme, soc ta bay spalacio te muc' ajwalil ta Judá, soc ta bay Jerusalén”, xi' te Cajwaltic —xoon.

^19-21 C'alal te muc' ajwalil Nabucodonosor la yic' loq'uel ta Jerusalén te Jeconías, snich'an Joacim, muc' ajwalil yu'un Judá, la yac' ainuc ta Babilonia, soc spisil te winiquetic te muc' sc'oplalic ta Judá soc ta Jerusalén, ma la yich' bael te balal taq'uinetic, ni te mero muc'ul yawil ja' pasbil ta bronce, ni te scajtijib yawil ja'etic, ni te sobrail sbiluquil te templo. Te Cajwaltic te Spisil ya xju' yu'une la yalbey sc'oplal te bitic jilemic xan ta templo, soc ta bay spalacio te muc' ajwalil yu'un Judá, soc ta Jerusalén:

²² —Ya me x'ich'otic bael ta Babilonia, tey me ya yich' q'uejel a, ja' to te bi ora ya jc'an quich' tel ta yan buelta ta bay q'uinal to. Jo'on Ajwalilon, jich ya cal —xi' te Cajwaltique.