Jeremías 26 - Bible in Tzeltal de Oxchuc y Tenejapa

Jeremías la yalbeyic smilel

¹ C'alal jajch' yat'el ta ajwalil te Joacim snich'an Josías ta Judá, te Cajwaltic la yalbey c'op te Jeremías,

² jich la yal: —Tec'lan ta bay yutil yamac'ul templo, albeya spisil te bitic la calbat te ya awalbey te ants-winiquetic te ya xtalic ta bay lumetic yu'un Judá, te ya xtal squejan sbaic ta templo. Ma me ayuc bila ya xjil ta alel awu'un.

³ Te ayuc bit'il ya yich'bat ta muc', te ya yijq'uitayic te bila amen ya spasique, te toj ya yac' sbaique, jich me ya jnop te ma ba ya cac'bey castigo yu'un sbolil te yat'elique, te jnopojix ya cac'beye.

⁴ Albeya te jo'on Ajwalilon, te jich ya cale: “Teme ma x'awich'onic ta muc' soc teme ma xach'uunic te p'ijubtesel la cac'beyexe,

⁵ teme mero ma x'awich'ic ta muc' te sjultesjibal awo'tanic yu'un te j'alwanejetic te abatetic cu'une, te bayal buelta la jticun tel, te la ac'axintaybeyic te sc'ope,

⁶ ja' yu'un jich me ya jpasbey te templo te bit'il la jpasbey te templo ta Silo. Ja' in lum to te boloben sc'oplale, ja' seña ya xc'ot cu'un ta stojol spisil nacionetic ta balumilal, uta me —xi'.

⁷ Te sacerdoteetic, te j'alwanejetic soc spisil te lume la yaiyic stojol te c'op la yal loq'uel Jeremías ta templo.

⁸ C'alal laj yo'tan ta yalel te bila albil yu'un Cajwaltic, te sacerdoteetic, te j'alwanejetic soc te lum la stsaquic, jich la yalbeyic: —¡Ya me xlajat!

⁹ ¿Bi yu'un ya xjelawat ta yalel c'op ta swenta Cajwaltic ta templo? ¿Bi yu'un ya awal te jich me ya xjil te bit'il Silo te lume, soc te ya me yich' jinel soc ma'yuquix yajwal ya xjil, te xaate? —la yutic. Ta spisil lum la stsob sbaic tel ta templo, la sjoytayic te Jeremiase.

¹⁰ Te jtsobwanejetic yu'un Judá, c'alal la yaiyic stojol te bila yac ta c'oel ta pasele, loq'uic tel ta spalacio muc' ajwalil, bajt'ic ta templo, najc'ajic ta bay Yach'il Ti'nail sbiile.

¹¹ Jich yu'un te sacerdoteetic soc te j'alwanejetic la yalbeyic te jtsobwanejetic soc spisil te lume: —Ja' in winic to ya me yil swocol ta lajel, melel yac ta scontroinel ta yalbeyel sc'oplal te lume. Ja'ex la awaiyic stojol soc achiquinic —xiic.

¹² Te Jeremías c'opoj ta stojol te jtsobwanejetic soc te lume, jich la yal: —Ja' me te Cajwaltic te la sticunon ta c'op, soc ta yalel sc'oplal te templo soc te lume, ja' spisil te la awaiyic stojole.

¹³ Tojtesa te awo'tanic soc te awat'elique, ch'uunbeyaic sc'op te Cajwaltic Diose, swenta jich ma sticunbeyex tel te woclajel te yalojbeyix sc'oplale.

¹⁴ Te jo'one ayon ta ac'abic, pasaic ta jtojol te bila ya sc'an awo'tanique.

¹⁵ Ja'uc me to, ta mero melel na'aic me ta lec: Teme ya amilonic te ja'exe, ya me amulinic soc yajwal te lum te ya amilic jtul winic te ma'yuc smule. Ta mero melel ja' la sticunon te Cajwaltic ta yalel ta jamal ta spisil te bitic la cale —xi' te Jeremiase.

¹⁶ Jich yu'un te jtsobwanejetic soc te lum la yalbeyic te sacerdoteetic soc te j'alwanejetique: —Ma'yuc bi swentail te ya yil swocol ta lajel te winique. La sc'oponotic ta swenta Cajwaltic te Dios cu'untique —xiic.

¹⁷ Ay cha'oxtul mamaletic la stejc'an sbaic jajch'el, jich la yalbeyic te lum te stsoboj sbaique:

¹⁸ —C'alal ay ta q'uinal te Ezequías te muc' ajwalil yu'un te Judá, te Miqueas te talem ta Moreset c'opoj ta swenta te Cajwaltic ta stojol spisil te lum Judá, jich la yal: “Jich la yal te Cajwaltic te Spisil ya xju' yu'une: ‘Te Sión ya xc'atp'uj jilel ta jinem q'uinal, te Jerusalén busulbus ya xjil te sts'ajc'ule, te switsul templo ya xnoj ta pimil q'uinal’, xi' me”, xi' ta yalel.

¹⁹ “¿Te muc' ajwalil Ezequías soc spisil te lum Judá, la bal smilic te Miqueas? Ma jichuc la spas. Te muc' ajwalil la xi' te Cajwaltique. Och ta sc'anel te yacuc xna'bot yo'bolil sba yu'une. Jich yu'un, te Cajwaltic ma la sticun tel ta stojolic te woclajel te yalojbeyix sc'oplale. ¿Ja' bal ya xc'ot ta jwentatic xcuchel yuts'inel ta milel te mach'a muc' sc'oplale? —xiic.

²⁰ Ja' nix jich te Urías te yan j'alwanej, snich'an Semaías, te talem ta lum Quiriat-jearim, c'opoj ta swenta Cajwaltic ta stojol te lum, soc ta spamal te q'uinale, jich nix bit'il te Jeremías.

²¹ Te muc' ajwalil Joacim, te sjo'tac ta ajwalile soc te jtsobwanejetic, la yaiyic stojol te jich la yale. Te muc' ajwalil la sc'an yo'tan smil; ja'uc me to, la yaiy stojol Urías. Xiw yo'tan, jich an bael ta Egipto.

²² Te muc' ajwalil Joacim la sticun bael ta Egipto te Elnatán te snich'an Acbor, soc yan xan winiquetic.

²³ Ba yiq'uic tel ta Egipto te Urías, la yac'beyic ta sc'ab te muc' ajwalil Joacim, te ja' la yal mandal ta milel. La yac'beyic ochel sbaq'uetal ta bay comon muquenal.

²⁴ Te Ahicam snich'an Safán c'opoj ta scoltayel te Jeremías, jich ma ba och ta c'abal yu'un te lum te ya smilique.