Jeremías 24 - Bible in Tzeltal de Oxchuc y Tenejapa

Ac'bot yil mochetic nojel ta higo

¹ Te Cajwaltic la yac'bon quil cheb mochetic te nojelic ta higoetic te pachalic ta stojol templo. Jich c'ot ta pasel ta c'alal te Nabucodonosor te muc' ajwalil yu'un Babilonia yic'ojix bael ta slumal te Jeconías, te snich'an Joacim te muc' ajwalil yu'un Judá, te jtsobwanejetic yu'un, soc te mach'atic ay bayal bila ya sna'ic spasele, te mach'atic ya x'at'ejic ta jten-taq'uine.

² Te jun moche mero lequil higoetic te ya xju'ix ta lo'ele. Te yan moche ma lequil higoeticuc stuquel, mero jc'axel amenic ta jyalel te ma xju'ix ta lo'ele.

³ Te Cajwaltic la sjojc'obon: —Jeremías, ¿bi ya awil? —la yuton. La jac'bey te sc'ope: —Higoetic, te bay lequique, mero lequic nix abi; yan te bay amenique, amenic nix abi, te ma xju'ix ta lo'ele —la cut.

⁴ Jich yu'un la yalbon te Cajwaltic:

⁵ —Jo'on Ajwalilon te Dioson yu'un Israel, ya cal: Te bit'il lequil higoetic, jich yacon ta yilel te lum Judá te la jyantesbey slumalic, ta slumal te caldeoetique. Yacon ta yilel soc xc'uxul co'tan,

⁶ yacon ta scanantayel, soc ya me sujt'es tel li' ta q'uinal to. Li' ya cac' esmajuc, soc ma ba ya jcha'jin xan; ya jts'un, ma ba ya jcha'bul xan.

⁷ Ya cac'bey sna'ic q'uinal ta lec, swenta yu'un ya me sna'bonic jba te jo'on Ajwalilon. Ja'ic me te lum cu'un, soc jo'on me Dioson yu'unic; melel ya me sujt'es yo'tanic ta jtojol ta spisil yo'tanic.

⁸ “Yan te Sedequías, muc' ajwalil yu'un Judá, soc te jtsobwanejetic, soc te yantic yajwal Jerusalén te ya xjilic li' ta bay lum to, o te ya xba snajc'an sbaic ta Egipto, jich me ya xc'ot ta co'tan te bit'il higoetic te amenic ta jc'axel, ma xju'ix ta lo'ele.

⁹ Ya me cac' te ya x'ac'bot xiwel yu'un spisil nacionetic ta balumilal; soc ja'ic me sp'ijubtesjibal te nacionetic te bit'il ay te pejc'anel, te ilayel soc te bit'il ya xbolob sc'oplalique. Seña me ya xc'otic ta stojol te nacionetic te bay ya jpuc baele.

¹⁰ Ya jticunbey guerra ta stojolic, wi'nal soc chamel te ya xmilawane, ja' to me te ma'yuc jtuluc ya xjil ta slumalic te la cac'bey yu'uninic soc te antiguo sme'-statique —xi' te Cajwaltique.