Jeremías 21 - Bible in Tzeltal de Oxchuc y Tenejapa

Sc'oplal castigo ta stojol Jerusalén

^1-2 Te muc' ajwalil Sedequías la sticun bael te Pasur snich'an Malquías, soc te sacerdote Sofonías te snich'an Maasías, ta yilel te Jeremías, soc te yacuc yalbey: —Wocoluc jojc'obotic Cajwaltic a te bit'il ay te bila yac ta c'oel ta jwentatique, melel te Nabucodonosor te muc' ajwalil yu'un Babilonia, ya yac'botic guerra. Ayuc bit'il ya spasbotic jchajp at'elil, te ya sticunbotic sujt'el te Nabucodonosor —xi' te Sedequíase. Jich yu'un te Cajwaltic, la sc'opon Jeremías,

³ jich la sujt'esbey sc'op te mach'atic ticunbilic tel yu'un Sedequías: —Albeyaic te Sedequías:

⁴ “Te Cajwaltic te Dios yu'un Israel ya yalbat: ‘Ya cac' sujt'uc bael ta spatic te soldadoetic awu'un soc yat'ejibic, te loq'uic ta pat ts'ajc' ta bay yacalex ta awac'bel abaic guerra soc te muc' ajwalil yu'un Babilonia. Soc te caldeoetic, te ja' nix te swinictaque, ya me jtsob ta yolil in lum to.

⁵ Jo'onix jtuquel ya cac'beyex guerra te ja'exe; ya jloq'ues tel smuc'ul te cu'ele, soc yac me ta tilel c'oem te quilimba soc te smuc'ul sc'ajc'al co'tane.

⁶ Ya me jmil spisil yajwal te alumal; winiquetic soc chambalametic ya me xlajic ta chamel te ya xmilawan te xiweltic sbae.

⁷ Patil ya cac' ta c'abal te Sedequías, te muc' ajwalil yu'un Judá. Ja' ya cac' ta sc'ab te Nabucodonosor soc te yantic scontrotac te jmilawaletique te ja' nix sjo'tac ta ajwalil, soc te soldadoetic yu'une. Te alumal te cuxulic to ya xjilic ta lum ta patil teme c'axemix a te chamel te ya xmilawane, te guerra soc te wi'nale, jo'on ya cac' te ya xmilotic ta puñal, ni ma'yuc xc'uxtayel, ni ma me ayuc ta na'beyel yo'bolil sba. Jo'on Ajwalilon, tulan ya cal’, xi me”, uta me.

⁸ “Te jo'on Ajwalilon, albeya te lum te jich ya cal: “Ya cac'bey stsa te be yu'un cuxinel, o ja' te be yu'un lajel.

⁹ Te mach'a ya xjil li' ta lum to ya me xlaj ta guerra, wi'nal, o chamel te ya xmilawan. Yan te mach'a ya xloc' bael soc te ya yac' sba ta c'abal yu'un te caldeoetic te yac ta yaq'uel guerra yo'tic te lume, ma ba ya xlajic; ya to me xcol soc xcuxlejal stuquel.

¹⁰ Melel jnopoj te ya cac'bey tel bila amen ta stojol in lum to, ma ja'uc ya cac'bey te bila leque. Ya me cac'bey ta sc'ab te muc' ajwalil yu'un Babilonia, soc ja' me ya yac'bey sc'aal te lume. Jo'on Ajwalilon, jich ya cal”, uta me —xi' te Cajwaltique.

Sc'oplal muc' ajwalil yu'un Judá

^11-12 Soc la yal xan te Cajwaltique: —Te sts'umbal muc' ajwalil yu'un Judá, ja' te sts'umbal muc' ajwalil David, jich me xawalbey ta jwenta: “Aiybeya awaiy stojol sc'op te Cajwaltique: Toj me xchajbanwanat spisil ora; ac'a ta libre te mach'atic tenbilic yu'un te j'uts'inwanejetique. Ma me ja'uc ta scaj amen awat'el te ya xjajch' tiluc jichuc c'ajc' te quilimbae, teme tile, ma'yuc mach'a ya xju' yu'un stup'el.

Sc'oplal castigo ta stojol Jerusalén

¹³ “Ja'at lum te toyol ayat yu'un te xatal q'uinale, jichat bit'il muc'ul najt'il ton ta spamlej, jo'on Ajwalilon, jamal ya cal te ya jcontroinate. Ja'ex ya awalic: ‘¿Mach'a c'an yac'botic guerra? ¿Mach'a c'an ju'uc yu'un ya xc'ot c'alal ta anjibal cu'untic?’ te xaexe.

¹⁴ Jo'on ya cac'beyex castigo, jich nix te bit'il ya sc'an yu'un te awat'elique. Ya cac'bey sc'aal te ja'mal awu'unique, te c'ajq'ue ya xchic' spisil ta sjoyobal. Jo'on Ajwalilon, jich ya cal”, uta me —xi' te Cajwaltique.