Jeremías 2 - Bible in Tzeltal de Oxchuc y Tenejapa

Ma junuc yo'tan Israel ta stojol Dios

¹ Te Cajwaltic la sc'oponon, jich la yalbon:

² —Baan, albeya te lum Jerusalén, awtaya, swenta yu'un ya me yaiyic stojol ta lec: “¡Jich ya yal sc'op te Cajwaltique! Ya jna' te c'alal ach'ixat to a, jun awo'tan ta jtojol, te c'alal la quic' quinaminate, c'ux la awaiyon ta awo'tan. La ats'aclinon ta jochol taquin q'uinal, ja' te lumq'uinal te mero ma'yuc bila ya xju' ta ts'unel tey a.

³ Israel ch'ultesbil ta jtojol, ja' te mero c'ax lec sit c'oeme. Teme ay mach'a tal ta uts'inel yu'une, jo'on la cac'bey castigo, la jticunbey tel bila amen ta stojolic. Jo'on Ajwalilon te jich la cale”, uta me —xi' te Cajwaltique.

⁴ Sts'umbalex Jacob, te yal-snich'anex Israel, aiybeya awaiyic sc'op te Cajwaltique.

⁵ Te Cajwaltic jich ya yalbeyex: —¿Bila ma lecuc la atabonic ta stojol te antiguo ame'-atatique, te q'uejel baex soc te awo'tanique? Ja' baex ta stojol te bitic cuybilic ta Dios te ma'yuc yutsile; jich nix ma'yuc awutsilic c'oex ta loq'uel yu'un.

⁶ Ma la anopic ta awo'tanic te ya aleonic, jo'on te la jloq'uesex tel ta Egipto, te la quiq'uex bael ta jochol taquin q'uinal, taquin te q'uinale, soc puro jemeltic, ja' te q'uinal te ma'yuc ja' tey ae, nojel nax yu'un te bitic xiweltic sbae, ja' te lumq'uinal te ma'yuc mach'a ya xnain tey a, ja' te ma'yuc mach'a ya xju' xc'ax tey a.

⁷ Jo'on la quiq'uex tel li' ta lequil q'uinal to, swenta yu'un ya alo'beyic sit te awalts'unubil soc te mero lec te bila ya yac' tey a. Ja'uc me to, ja' tal aboltesbonic sc'oplal te lumq'uinal te ja'exe, la awac'bonic woclajuc co'tan yu'un yilayel te lumq'uinal cu'une.

⁸ Te sacerdoteetic ma la sleonic, te jp'ijubteswanejetic yu'un te lum cu'une, ma la yich'onic ta muc', te jtsobwanejetic la stoy sbaic ta jtojol, te j'alwanejetic ja' c'opojic ta swenta Baal soc bajt'ic ta stojol te loc'ombaetic te ma xtuunic ta jyalele.

Ya x'ic'ot ta chajbanel Israel

⁹ “Jich yu'un te jo'on Ajwalilon, jich ya cal: Ya jchajban c'op ta atojolic ja'ex soc te amamataque.

¹⁰ Baanic ta bay q'uinaletic te joybilic ta ja' te ay ta smalib c'aal, soc ila awilic tey a; ticunaic bael ta ilel te Cedar swenta yu'un ya me atsajtay awilic ta lec teme ay banti jich c'oem ta pasel yu'unic

¹¹ te ayuc jun nación te xch'uunej loc'ombaetic te la sjeliquix te yajcananique. Ja'uc me to puro lotil diosetic. Melel te lum cu'une la yijq'uitayon ta yo'tanic te jo'on yutsilalonique; ja' bajt'ix yo'tanic ta xch'uunel te loc'ombaetic te ma xtuun ta jyalele.

¹² Ch'ulchan, xiwan me yu'un, nijc'an me yu'un xc'uxul te xiwele. Jo'on Ajwalilon jich ya cal.

¹³ “Te lum cu'une cha'chajp mulil la spas: la yijq'uitayon ta yo'tanic, te cuxul sloq'uibja' c'oemone, soc la spasic pozoetic yu'un stuquelic, lomen pozoetic te ma xpamaj ya'lele.

Swocolil la yaiy Israel te ma junuc yo'tan

¹⁴ “Te Israel ma'yuc ta mosoil; ma ba ayin ta mosoil. ¿Bi yu'unix a te ya yich' pojel sbiluque?

¹⁵ ¿Bi yu'un ya snutsic jichuc león-chojetic te tulan nax ya x'awunic ta jyalele? Ma'yuc yutsil la yijq'uitaybeyic jilel te slumale; te lumetic yu'unique la yich' chiq'uel, soc ma'yuquix mach'a jil tey a.

¹⁶ Te yajwal Menfis soc Tafnes la swuybat ajol.

¹⁷ Jich pasbotat yu'un te la awijq'uitayon te jo'one, jo'on Ajwalilon te Dioson awu'une, jo'on la jtojtesat ta be.

¹⁸ Ta ora yo'tic, ¿bi ya ata a te ya xbaat ta Egipto? ¿Yu'un bal ja' ya xba awuch'bey ya'lel te muc'ul ja' Nilo? ¿Bi ya ata a te ya xbaat ta Asiria? ¿Ja' bal ya xba awuch'bey ya'lel te muc'ul ja' Éufrates?

¹⁹ Ja' nix amul atuquel te ya yac'at ta castigo, ta scaj te ma junuc awo'tane. Nopa awaiy soc ya me awilbey sbolil soc xch'aal, ja' te bit'il la awijq'uitayone, soc ma la awich'on ta muc', te jo'on Awajwalon, te Dioson awu'une. Jo'on Ajwalilon te Spisil ya xju' cu'un, jich ya cal.

Stoybail Israel

²⁰ “Mero bayalix tel c'aal te la atoy aba ta jtojole, ma la ac'an ach'uunbonic jmandal. La awal: “Ma jc'an abatinel”, xaat. Ja' nax la awat'elin spasel mulwej ta bay toyol witsetic soc ta spisil yet'al pimil sc'ab te'etic.

²¹ Jo'on la jts'unat jichuc ts'usub te mero cajal yutsile, jich bit'il yawalil ts'usub te mero lec ta jyalele. ¿Bi yu'un te bayal bolobenate, te ma jna'batix aba ya quile?

²² Manchuc teme ya apoc aba ta ya'lel tan, o teme ya atuuntes spisil xapon te bay c'alal ya sc'an awo'tane, pero ta jtojol ja' nix jich bolobenat ya quil yu'un te amule. Jo'on Ajwalilon, jich ya cal.

²³ ¿Bistuc te jich ya awale: “Ma ba bolobenon, ni ma ba yacon ta xch'uunel lotil diosetic,” te xaate? Aiya awaiy stojol, ja' xan te awat'el la apas ta xatal q'uinale, nopa awaiy ta spisil te bila apasojique. Ja'at pajalat soc te yantsilel camello te bayuc nax ya xbajt' ta animale;

²⁴ ja'at pajalat soc te yantsilel ja'mal burro te animal ya xbajt' ta witse, ya nax xjujch'ilay q'uinal te ya yich' ic' yu'un te bila ya sc'ane. C'alal chijubene, ma'yuc mach'a ya xju' yu'un scomel. Teme ya sle te state, ma ba ya xlub, puersa ya sta ta yorail te chijubele.

²⁵ “Israel, ma me x'alajin awacan soc ma me xawac' xtaquinaj anuc' yu'un snutsel yantic diosetic. Pero ya awal: “Ma'uc. Ma xju' ya sujt'on ta jpat. Mero ya jmulan te yantic diosetic; ya to me jle xan”, xaat.

Castigo ta stojol Israel

²⁶ “Jich bit'il ya xq'uexaw elec' te c'alal ya xchicnaje, jich me ya xjil ta q'uexlal Israel, ja' te lum, te muc' ajwaliletic, te jtsobwanejetic, te sacerdoteetic soc te j'alwanejetique.

²⁷ Melel ya awalbey te te': “Ja'at jtatat”, ya awut, soc ya awalbey te tone: “Ja' jme'at”, ya awut. Yan te jo'one, ja' ya awac'bon quilbat te apate, ma ja'uc te awelawe. Ja'uc me to, te c'alal nax ya awilic ya xtal ta atojolic te bila chujc'ule, ya awalbonic: “¡La', coltayawotic!”, xaex ta ora.

²⁸ Lum Judá, ¿banti ay te awajcananic te la apase? Bayal te diosetic awu'une, jich nix yipal te bit'il te lumetic awu'une. Ac'a me taluquic, ya me quiltic teme ya xju' yu'un scoltaybelex te c'alal ya xjul te woclajel ta atojole.

²⁹ ¿Bi ya xju' ya awalbonic ta jtojol te ja'exe, te melel apisilic la atoy abaic? Jo'on Ajwalilon, jich ya cal.

³⁰ Tojol la cac'bey castigo te anich'nabic, melel ma ba p'ijubic yu'un te p'ijubtesele. Ja'ex nix te jichex te bit'il c'ajc'al león-chojetic, la amilbonic te j'alwanejetic cu'un te c'opoj ta atojolique.

³¹ (Ja' nix jichex, te jcaj alnich'anex ayex ta q'uinal ta ora to, aiybeya awaiyic stojol sc'op te Cajwaltique.) Israel, ¿yu'un bal jochol taquin q'uinalon ta atojol? ¿Jich bal acuyojon te bit'il q'uinal te nojel nax yu'un te ijc' q'uinale? Lum cu'un, ¿bi yu'un ya awal: “Ayotic ta libre; mero ma sujt'otiquix bael ta atojol”, te xaate?

³² Te antse ¿ya bal xju' xch'ay ta yo'tan te xch'alil te ya yac' sba ta mulanel a? Ja'uc me to, te lum cu'une, mero c'ax bayalix c'aal te ch'ayon ta yo'tane.

³³ “Mero lec ya ana'bey sbelal stuquel c'alal ya ale te mach'a ya amon aba soque. Ja'at maestra-antsat yu'un te bila ma lecuque.

³⁴ Te ac'u' boloben ta spisil yu'un xch'ich'el te me'baetic te ma'yuc smulique, ma'yuc bay yac ta spasel mulil la ata.

³⁵ Ja'uc me to, manchuc me jich ay, jich ya awal: “Jo'on ma'yuc jmul. Ma ba ilinemix Dios ta jtojol”, xaat. Lec ay, te bit'il ya awal te ma ba apasoj mulile, ya me quic'at ta chajbanel.

³⁶ ¿Bi yu'un ya x'animaj awo'tan ta sjelel te jcoltaywanejetic awu'une? Ja' nix jich te Egipto, ya me ata falta soc, jich bit'il la ataix falta soc Asiria.

³⁷ Nojel me q'uexlal ya awaiy te ya sujt'at tel ta Egipto, melel ma la sc'an co'tan te mach'a ya yac'bat smuc'ul awo'tane. Ma'yuquix bi ya ata a te mach'atic ya smuc'ulin awo'tane —xi'.