Jeremías 19 - Bible in Tzeltal de Oxchuc y Tenejapa

Señail ta top'el q'uib

¹ Te Cajwaltic la yalbon: —Baan, mana junuc q'uib te pac'bil ta ajch'ale, soc ic'a tel cha'oxtuluc mamaletic yu'un te lum soc cha'oxtul te mamal sacerdoteetique.

² Loc'an ta ora ta Xatal q'uinal yu'un Ben-hinom te ay ta stojol te yochibal lum te Xejt'ecal Oxom sbiile. Tulan xawal tey a te c'op ya calbate.

³ Albeya: “Muc' Ajwaliletic yu'un Judá soc yajwal Jerusalén, aiya awaiyic stojol sc'op Cajwaltic te Spisil ya xju' yu'une, te Dios yu'un Israel: Ya jticun tel muc' te bila amen ta stojol in lum to, ta spisil mach'a ya yaiybey stojol sc'oplal xch'inet nax me xchiquin ya xjil yu'un.

⁴ Melel te israeletic la yijq'uitayonic ta yo'tanic, soc yan ac'ot ta c'atp'unel yu'unic in lum to. La yac'beyic pom te lotil diosetique, te ma ba sna'ojbeyic sbae, ni te antiguo sme'-static ma la sna'beyic sba, ni te muc' ajwaliletic yu'un Judá ma la sna'beyic sba. Soc ja' in lum to la snojesbeyic ta xch'ich'el te ants-winiquetic te ma'yuc smule.

⁵ Ja' nix jich la spasbeyic scajtijib te bay ya xchic' snich'nabic te ya yac'beyic smajt'anin te lotil dios Baal. Ma'yuc bay la calbeyex mandal, soc ni ma'yuc jich tal ta co'tan.

⁶ Jich yu'un ya me xc'ot sc'aalelal te ma xju'ix ta alel Tofet, ni Xatal yu'un Ben-hinom; ja'uc me to, Xatal yu'un Milaw xi' me sbiil. Jo'on Ajwalilon, jich ya cal.

⁷ Tey ta bay lum to ya jinbey ta jc'axel te bila xchapoj te Judá soc te Jerusalén. Ya me cac' tsalotuc yu'un te scontrotac soc te ya xmilotic yu'une. Te sbaq'uetalic ya me xti'ot yu'un te xulemetic soc te jti'awal chambalametique.

⁸ Ya jc'atp'un ta jochol taquin q'uinal in lum to, jich me ya xc'ot te bila ya yac' xiwele. Spisil mach'atic ya xc'axic tey a, cham nax me ya yaiyic soc ya me xiwic te c'alal ya yilic te jc'axel jinbilix ta jyalele.

⁹ Te ants-winiquetic ya me cac'bey sti'ic te yal-snich'anique, queremuc ach'ixuc, soc ya me sti'bey sbaic juju-jtul ta scaj te tulan ayiquix ta tenel ta milel yu'un te scontrotac te c'alal joytaybilix ta jyalel te lume”, uta me.

¹⁰ “C'alal ya xlaj awo'tan ta yalel in to, wuya te q'uib ta sitic te winiquetic sjoinejate,

¹¹ soc albeya: “Te Cajwaltic te Spisil ya xju' yu'une jich ya yal: ‘Ya me jwuy in jpam lum to soc te yajwale, jich bit'il mach'a ya swuy sq'uib te pasbil ta ajch'ale, te ma xju'ix ya xcha'pas xane. Te ants-winiquetic ya me smuquic te animaetic ta Tófet, yu'un ma xwejt'ix yawil ta bay ya yich'ic muquele.

¹² Jich me ya jpasbey in lum to soc te yajwale. Jich me ya jpasbey jilel te bit'il Tófet. Jo'on Ajwalilon, jich ya cal.

¹³ Te nanatic ta Jerusalén, te muc'ul naetic yu'un te muc' ajwaliletic ta Judá soc te sba nanatic te bay la yac'beyic pom te c'aal, u, eq'uetic ta ch'ulchan, soc te bay la smalbeyic majt'anil vino te lotil diosetique, ilaybil me ya xc'ot spisilic, jich bit'il Tófet’, xi' te Cajwaltique”, uta me —xi'.

¹⁴ Ta patil sujt' loq'uel ta Tófet te Jeremías, ta bay ticunot tel yu'un Cajwaltic te tal c'opojuc ta swentae. Ba stejc'an sba ta yamac'ul templo, soc la yalbey spisil te lume:

¹⁵ —Te Cajwaltic te Spisil ya xju' yu'une, te Dios yu'un Israel, ya yalbeyex: “Ya jticunbey tel spisil castigo ta stojol te alumal soc spisil te lumetic nopol ayic te la calbeyix sc'oplale. Melel tulan yac'oj te yo'tanique yu'un ma la yich'bonic ta muc' te jc'ope”, xi' me te Cajwaltic —xi' te Jeremiase.