Jeremías 17 - Bible in Tzeltal de Oxchuc y Tenejapa

Mulil soc castigo ta stojol Judá

¹ “Judá, te amule ts'ibubil ta cincel-taq'uin, ch'ojch'onbil ta ts'ibuyel ta sni' stulanil diamante, ts'ibubil ta awo'tan jichuc pejch'el ton, ts'ibubil ta xulubil scajtijib majt'aniletic.

² Te anich'nabe ya sna'ic te scajtijib majt'aniletic yu'un awajcananique, soc te sloc'ombaetic Asera awu'unique ta yet'al pimil c'ab te'etic soc ta sba te witstiquile,

³ soc ta sba te toyol witsetique. Ta scaj te muliletic awu'un, ya cac'bat ta elc'anel spisil te ac'ulejale, soc ya me spojic bael te toyol ch'uunjibaletic ta spamal te aq'uinale.

⁴ Ya me awijq'uitay aq'uinal, te jich la cac'bat ta mero awu'une; soc ya cac' smozoinat acontrotac ta bay q'uinal te bay ma x'ana'bey sbae. Melel la atilesbonix c'oem te quilimba jich te bit'il c'ajc' te ya xchic'at ta jc'axele —xi' te Cajwaltique.

Cha'oxchajp c'opetic

⁵ Te Cajwaltic ya yal: —Mero c'ax amen ta jyalel te winic te q'uejel ya yac' bael yo'tan ta jtojol, te ja' nax yac'oj smuc'ul yo'tan ta stojol te winiquetic, te ya sc'anbeyic coltayele.

⁶ Jich me te bit'il ch'ix ta jochol taquin q'uinal, te ma'yuc bay staoj canantayel stuquele. Ya xch'i ta yolil tontiquil, ta bay ni ma'yuc bi ya xch'i tey a, te ma'yuc mach'a ya xcuxinic tey a.

⁷ “Ja'uc me to, ay me bendición ta stojol te ants-winiquetic teme jo'on smuc'ulon yo'tanique, teme ja' ay ta yo'tan te bila ya smaliybone.

⁸ Jich me c'oem te bit'il te' ts'unul ta ti'ja', te ya yac' bael yisim ta bay ya x'oquin bael te ja'e. Ma xiw c'alal ya xtal yorail te xc'uxul c'aale; te yabenale spisil ora yaxuben. Ta yorail q'uepel te q'uinale ma xwoclaj; soc ma xcom ta yaq'uel sit ta yorail.

⁹ “Bayal ya xlo'laywan te o'tanile. Nojel ta mulil ta jyalel, ma'yuc yan bila pajal soc. Ma'yuc mach'a ay sp'ijil yu'un sna'el.

¹⁰ Jo'on Ajwalilon, ya jna' stsajtayel te o'tanile soc ya jna' c'alal ta yutil o'tanil te bila yac sna'ele. Jich yu'un ya cac'bey stoj juju-jtul, ja' chican te bit'il ay te yat'elique —xi' te Cajwaltique.

¹¹ Te mach'a ma stojiluc ya sta sc'ulejale; jich c'oem te bit'il perdiz te yan tomut ya sluts'e. Manchuc me yich'oj to yip, puersa me ya yijq'uitay jilel te sc'ulejale; soc ta slajibal ja' nax me bol ya xc'ot ta loq'uel.

¹² Te templo cu'untique ja' smuc'ul nactijib ajwalil, te toyol ac'bil c'alal ta xjajch'ibal.

¹³ Cajwal, ja' smuc'ulat yo'tan te Israel; spisilic te mach'a ya yijq'uitayat ta yo'tanique ya xjilic ta q'uexlal. Spisil te mach'a c'ubul ya yac' sba soc yo'tan ta atojole, ya xch'ay ta jc'axel, jichuc biilil te ts'ibubil ta ts'ubil lum. Ya xch'ay, ta scaj te ya yijq'uitayate, ja'at te sloq'uibja' te siquet nax awa'lel c'oeme.

Jeremías la sc'opon Cajwaltic

¹⁴ Lamantesbonix jwocol, Cajwal, jich me ya xlamaj; coltayawon ja'at, jich me ya xcolon. Melel ja'at nax atuquel te ya calbat lec ac'oplal.

¹⁵ Te ants-winiquetic jich ya yalbonic: —¿Bi ya spas te bila yaloj te Cajwaltique? C'otuc ta pasel ta ora yo'tic —xiic.

¹⁶ Ja'uc me to, ma'yuc bay cac'oj puersa ta sc'anel te ya aticun tel tulan wocol; ma'yuc bay sc'anoj co'tan te ay bila chujc'ul ya xtal ta stojolique. Ja'at ya ana' ta lec te bila caloje, melel jich la cal ta atojol.

¹⁷ Ma me x'ac'atp'un aba ta jxiwteswanej ta jtojol, melel ja'at anjibalat cu'un c'alal ya xtal te bila amene.

¹⁸ Ja'uc me q'uexawuc jilel te mach'atic ya yuts'inone, ma me jo'ucon; ja'uc me ya xch'ayic ta q'uinal yu'un xiwel, ma me jo'ucon. Ac'a taluc ta ora mel-o'tan ta stojolic; ac'beya swocolic ta spisil ora.

Bit'il ay ta na'el sc'aalelal cux-o'tanil

¹⁹ Te Cajwaltic la yalbon: —Baan, tejc'ana aba ta sti'il Yochibal Lum, ta bay ya xloq'uic soc te bay ya x'ochic te muc' ajwaliletic yu'un Judá, soc jich nix me ya apas yu'un te yantic ochibaletic yu'un Jerusalén.

²⁰ Albeya te ants-winiquetique: “Muc' ajwaliletic soc spisil lum ta Judá soc ta Jerusalén, te ya x'ochex bael tey ta bay ochibaletic, aiybeya awaiyic stojol sc'op te Cajwaltique.

²¹ Te Cajwaltic ya yal: ‘Te bi c'aalil yu'un cux-o'tanil ta swenta xc'uxtayel te acuxlejalique, ma x'awich'ic bael ijc'atsiletic, ni ma me xawac' ochel ta bay ochibaletic yu'un Jerusalén.

²² Ni ma me xaloq'uesic ni junuc ijc'atsil ta anaic te bi c'aalil yu'un cux-o'tanil, ni ma me ayuc at'el ya apasic jtebuc a. Ac'bonic cu'unin te bi c'aalil yu'un cux-o'tanil, jich bit'il la calbey mandal te antiguo ame'-atatique.

²³ Ja'uc me to, ma la sc'an yich'bonic ta muc' te jc'ope. Tulan nax la yac' sbaic bael, ma la sc'an la xch'uunic, ni ma ba tojobic a.

²⁴ ‘Jo'on Ajwalilon, jich ya cal: Ch'uunbonic jc'op ta melel, ma me x'awich'ic bael ni junuc ijc'atsil ta ochibaletic yu'un sts'ajc'ul te lum te bi c'aalil yu'un cux-o'tanil; ac'bonic cu'unin in c'aal to, ma me xapasic ni jtebuc at'el a.

²⁵ Teme jich ya apasique, jich me ay muc' ajwaliletic ya xnajc'ajic ta muc'ul nactijibal yu'un David, soc ya me x'ochic bael ta ochibaletic yu'un sts'ajc'ul te lum ta carreta soc cajal ta caballo, joinbilic yu'un te jtsobwanejetic soc te ants-winiquetic yu'un Judá soc yu'un Jerusalén. Jich yu'un te Jerusalén ay nix me yajwal stuquel a.

²⁶ Ya me xtal ants-winiquetic yu'un te lumetic yu'un Judá te ayic ta sjoyobal Jerusalén, soc ta sq'uinal Benjamín, ta peq'uel witstiquil soc ta toyol witstiquil, soc ta Néguev. Ya me yiq'uic tel xchamsbalamic ta templo swenta chiq'uel ta scojt'ol soc te yantic milbil majt'anile, te majt'anil harina soc pom, soc te majt'anil yu'un yalel wocol.

²⁷ Yan teme ma xach'uunbonic jmandal te ja'exe, te ma xawac'bonic cu'unin te bi c'aalil yu'un cux-o'tanil, soc te ya awaq'uic ochel bael ijc'atsil a ta ochibaletic yu'un sts'ajc'ul Jerusalén, jich yu'un ya me cac'bey c'ajc' te ochibaletic yu'un te lume, ja' te c'ajc' te ya sjin spisil te palacioetic yu'un Jerusalén, soc ma'yuc mach'a ya xju' yu'un stup'el’, xi' te Cajwaltique”, uta me —xi'.