Jeremías 16 - Bible in Tzeltal de Oxchuc y Tenejapa

Jeremías ac'bot mandal yu'un Cajwaltic

¹ Te Cajwaltic la yalbon tel sc'op ta jtojol, jich la yalbon:

² —Ma me xnujbinat, ni ma me ayuc anich'nab li' ta bay lum to.

³ Melel jo'on Ajwalilon, ya calbat te bila ya xc'ot ta pasel ta stojol te nich'aniletic ya x'ayinic li' ta alumal soc te sme'-statique.

⁴ Ya me xlajic yu'un chamel te xiweltic sbae, soc ma'yuc mach'a ya x'oq'uetayotic yu'un, ni ma'yuc mach'a ya xmucotic yu'un; limilic me ta lum ya xjilic jich bit'il stsa' chambalam. Ta guerra soc ta wi'nal ya xlajic bael; te sbaq'uetalic ya me xlajic ta ti'el ta xulem soc jti'awal chambalametic —xi' te Cajwaltique.

⁵ Te Cajwaltic la yalbon xan: —Ma x'ochat ta na ta bay ayic ta mel-o'tan yu'un te mach'a lajem tey a. Ma me x'oc'at, ni ma me xawac' ta ilel xc'uxulil ta swenta. Melel te lume la jch'aybeyix te lamal q'uinal ta stojolic, soc te xc'uxul co'tan soc te yutsil co'tane. Jo'on Ajwalilon, jich ya cal.

⁶ Muc'-biq'uitetic ya me xlajic li' ta bay lum to; ma'yuc mach'a ya spasbey smuquenal, ni ma'yuc mach'a ya yoq'uetay, ni ma'yuc mach'a ya yac' ta ilel xc'uxul mel-o'tan ta swentaic te ya yejch'entes sbaic ta sbaq'uetalique, o te ya sjox loq'uel stsotsil sjolic yu'une.

⁷ Ma'yuc mach'a ya xchajban we'eliletic yu'un sna'jibal te animaetic, swenta smuc'tesjibal q'uinal yaiyic te spat-xujq'ue, ni ja'uc te ya yich' pasel teme ya xlaj uuc te state, o ja' te sme'e.

⁸ “Ni ja'uc ya x'ochat ta na ta bay chajbanbil we'elil, te ya anajc'an aba ta we'el-uch'ajel soque.

⁹ Melel jo'on Ajwalilon te Spisil ya xju' cu'un, te Dioson yu'un Israel, jamal ya cal: Ya cac'bey xlaj yo'tanic ta c'ayoj in lum to, ta spasel q'uin te bin nax yo'tanic yu'une, soc te c'ayojetic yu'un q'uin, soc sbujts-o'tanil soc te c'ayojetic yu'un jnujbinel. Ja' me ya xc'ot ta pasel te ayex ta q'uinal, soc ya me awilic.

¹⁰ “C'alal ya awalbey te lume, ya me sjojc'obat: “¿Bi yu'un la yal mandal Cajwaltic te la yac' taluc ta jtojoltic te bila amen te muc' ta jyalele? ¿Bila amen jpasojtic? ¿Bi mulil jpasojtic ta stojol Cajwaltic te Dios cu'untique?” xiic me.

¹¹ Te ja'ate jich me ya asujt'esbey te sc'opique: “Te Cajwaltic jich ya yal: ‘Ta melel te antiguo ame'-atatic la yijq'uitayon ta yo'tanic. Ja' bajt' ta yo'tanic te lotil diosetic ta xch'uunel soc ta yalel wocol ta stojol. Te jo'one la xch'ayon ta yo'tanic, ma la sc'otesic ta ch'uunel te mandalil la cac'beye.

¹² Te ja'exe c'ax to jich apasojic a te bit'il antiguo ame'-atatique; juju-jtul soc stulanil awo'tanic baex tey a ta bay la ac'anique, ni ma ba la ach'uunbonic te jc'ope.

¹³ Jich yu'un ya jloq'uesex bael li' ta bay lumq'uinal to. Ya xbaex ta banti ni ja'ex ni antiguo ame'-atatic awilojic. Tey me ya awich'ic abatinel c'aal ajc'ubal yu'un te lotil diosetique. Ma ba ya jna'beyex yo'bolil abaic’, xi' te Cajwaltic”, uta me.

¹⁴ “Ja'uc me to jo'on te Ajwalilon, jich ya cal te ya me xtal sc'aalelal te ma ba ya awaliquix ta jamal: “Ta swenta bit'il cuxul te Cajwaltique, jich la sloq'ues tel ta lum Egipto te israeletique”, te xaexe.

¹⁵ Ja'uc me to, jich me ya awaliquix: “Ta swenta bit'il cuxul te Cajwaltic, jich la sloq'ues tel israeletic ta yan lum ta norte soc ta spisil te lumetic te bay spucoj baele”, xaex meix ta yalel. Jo'on ya me cac' sujt'ex tel ta aq'uinalic, ja' te q'uinal la cac'bey te antiguo ame'-atatique.

¹⁶ “Jo'on Ajwalilon, jich ya cal, ya me cac' xtal bayal jtsac-chayetic c'oem, swenta yu'un ya me stsaquic jichuc chay te israeletique. Soc ya cac' xtalic bayal jnutsmajeletic c'oem, swenta yu'un ya xnutsmajic soc ya sloq'uesic tel ta spisil witstiquil, ta ch'in witstiquil, soc asta ta bay jatemic te tontiquile.

¹⁷ Melel yacon ta yilel spisil te yat'elic, ma'yuc bila mucul ya xjil ta jtojol, ma xju' ya smuc smulic ta jsit.

¹⁸ Sbabial ya cac'bey stojic cheb buelta te bila amen soc te smulique, melel la sboltesbonic sc'oplal te lumq'uinal ta scaj te yajcananic te ma cuxuluc soc te ilaybilique; soc ta spamal te lumq'uinal te la cac'bey yu'unin, la spasic te bitic ya quilaye —xi' te Cajwaltique.

Jeremías la sc'opon Cajwaltic

¹⁹ Cajwal, yipat co'tan soc jcanantaywanejat cu'un, ja' anjibalat cu'un ta ora nax yu'un te bila xiweltic sba te ya xtal ta jtojole. Ya me xtal ta atojol te nacionetique, ya xtalic ta sti'il balumilal, jich me ya yalbat: —Ja' nax lotil diosetic te la yu'uninic te jme'-jtatique te ma'yuc yutsil soc ni ma'yuc yu'el.

²⁰ ¿Ya bal xju' spas diosetic te winique? Te diosetic ya spase, lotil ta melel —xiic me.

La sjac' te Cajwaltique

²¹ Te Cajwaltic la sjac': —Jich yu'un, ta jc'axel nax ta spisil ya cac' ta ilel te cu'ele; jich me ya ana'ic te ja' jbiil te Ajwalile —xi' te Cajwaltique.