Jeremías 10 - Bible in Tzeltal de Oxchuc y Tenejapa

Xch'uunel loc'omba soc xch'uunel ta melel te Diose

¹ Aiya awaiy, lum Israel, te sc'op Cajwaltic te ya yalbate.

² Jich ya yal: —Ma xanopbeyic yat'el te yantic nacionetic, ma me xiwex yu'un te señailetic ta ch'ulchan, jich bit'il ya spasic te yantic nacionetique.

³ Te bila xch'uunej te lumetic ma'yuc yutsil ta jyalel. Ya sts'etic te' ta ja'mal, te mach'a ya sna'e, ya spas ta cincel,

⁴ ta ora nax ya xch'al ta plata soc ta oro, ya yac'bey sta swentail ta lec soc lawux ta bajel ta martillo swenta yu'un ma xyal a.

⁵ Te yajcananic pajal soc xutax yilel te ay ta bay ts'unajtic te melonetique; ma xju' xc'opojic, soc ya sq'uechic ta beel, melel ma xbeenic. Ma me xiwex yu'un, ni ma'yuc bila amen soc ni ma'yuc bila lec ya spas —xi' te Cajwaltique.

⁶ Cajwal, ma'yuc mach'a yan jich smuc'ul te bit'ilate; muc' ac'oplal soc bayal te awu'ele.

⁷ ¿Ay bal mach'a ma xi'at atuquel, ja'at te muc' ajwalilat yu'un te nacionetique? Awu'un xi'el atuquel. Ta yolilic te mach'a p'ijic soc muc' ajwaliletic ta balumilal, ma'yuc bay jtuluc jich te bit'ilate.

⁸ Spisilic, bol yo'tanic, ma'yuc ni jtebuc sp'ijilic. Ma xju' ya sp'ijubtesex te smajc'alel te'e.

⁹ Te awajcananic, plata nax ich'bil tel ta Tarsis soc oro te ich'bil tel ta Ufaz; ja' te pasbilic yu'un te mach'atic ya sna'ic spasele, ja' te jpas-plata-taq'uinetique. Te sc'u'ic, te morada sbonilic soc te tsaje, ta spisilic chajbanbilic ta swenta te mach'atic c'aemic ta spasele.

¹⁰ Te Cajwaltique, ja' te Dios ta melele, Cuxul Dios stuquel, Muc' Ajwalil sbajt'el q'uinal. Te c'alal ya x'iline, ya xnijc' yu'un te lumq'uinale; te nacionetique ma xcujch' yu'un te yilimbae.

¹¹ (Ja'ex, israeletic, albeyaic te mach'atic ma'yuquic ta stojol te Diose: —Te diosetic, te ma ja'uc la spasic te ch'ulchan balumilal, ya me xch'ayic ta jc'axel ta balumilal; ni jtuluc ma xjilic ta yet'al ch'ulchan —xaex me.)

C'ayoj ta yalel wocol Dios

¹² Te Cajwaltic, ta yu'el la spas te lumq'uinale; ta swenta sp'ijil, tulanajem yu'un te balumilale; ta swenta sp'ijil yo'tan, la slim bael te ch'ulchane.

¹³ Ta swenta sc'op chawuc ya xc'opoj te ja' ay ta ch'ulchane, ya yac' xmo bael tocal c'alal ta sti'il balumilal, ya yac' xlem te tsantsewaletic ta yolil te ja'ale, ya sloq'ues tel ic' te bay q'uejbil yu'une.

¹⁴ Bol yo'tanic, ma sna'ic q'uinal ta spisil te ants-winiquetique. Te mach'a ya spas te loc'ombaetic ya me sta q'uexlal yu'un; melel puro lo'laywanej te yat'ele, ma ba cuxul te loc'omba ya spase.

¹⁵ Ma'yuc sc'oplal stuquel, swenta tse'luyel ayic; ta yorail chajbanel yu'un Cajwaltic ya me sjin.

¹⁶ Mero yan yilel stuquel a te Dios yu'un Jacob, jchicnanteswanej yu'un spisil te bitic aye. La stsa Israel te mero yu'un stuquele. “Ajwalil te Spisil ya xju' yu'un”, xi' te sbiile.

Ya snujp'in sbaic ta c'op j'alwanej soc nación

¹⁷ Te j'alwanej ya yal: —Te ja'at nación, te joytaybilex ta guerra yu'un te acontroe, tsoba te abiluque.

¹⁸ Melel te Cajwaltic la yalbeyex ac'oplalic: “Ja' in ora to najt' me ya jch'oj loq'uel te mach'atic yajwal te lumq'uinal. Ya me cac' c'axuc swocolic, ya me quil teme ma teyuc ya sleonic a”, xi' ac'oplalic yu'un —xi' te j'alwaneje.

¹⁹ Te nación ya yal: —Obol jba, te jinemonix ya caiye; te ejch'enetic cu'un ma xju'ix ta poxtayel. La cal ta co'tan te ya xcujch' cu'un ta jc'op te xc'uxule.

²⁰ Te nailpac' cu'une jinemix, tuch'emiquix spisil te slazoile. Te jnich'nabe la spijt'esoniquix jilel, melel ma'yuc bay chicaniquix. Ma'yuc mach'a ya xcha'tejc'anbon xan te nailpaq'uetique, te ya xcha'limbon moel te slonaile —xi' te nacione.

²¹ Te j'alwanej ya yal: —Te jcanan-chijetic yu'un te lum, ma sna'ic q'uinal; ma sleic te Cajwaltique. Ja' swentail te la staiquix falta, melel pujq'uemiquix bael ta spisil te chijetic yu'unique.

²² “Aiya awaiyic, ay c'op jul tel, mero tulan nax ya xtal soc sc'opic te jpam lum ay ta norte. Ya sc'atp'unic ta jochol taquin q'uinal te sq'uinal Judá, ja' nax ya x'ainic tey a te ja'mal ts'i'etique.

²³ “Cajwal, ya jna' te ants-winiquetic te ma yu'unuc te xcuxlejalique, ma ja'uc ya spas mandal te bit'il ya xbajt' ta loq'uel te xcuxlejale.

²⁴ Tojtesawotic ta swenta stojil awo'tan, ma me socuc awilimba. Teme jich ya apase, jc'axel ya ajinotic abi.

²⁵ Ac'a bael awilimba ta stojol te nacionetic te ma sna'bat abae, ta stojol te lumetic te ma ba ya sc'oponate. Melel la sbic' c'oem te lum yu'un Jacob, jc'axel la sjinic ta jyalel; mero ma'yuc yutsil la yijq'uitayic te lume —xi' te j'alwaneje.