Isaías 16 - Bible in Tzeltal de Oxchuc y Tenejapa

Yajwal Moab anic bael ta sq'uinal Judá

¹ C'alal ta Sela ta jochol taquin q'uinal, te jtsobwanejetic yu'un te lum la sticunic bael chijetic c'alal ta wits Sión.

² Te yajwal Moab, pajalic soc te ja'mal mutetic te ya xiwic loq'uel ta anel ta spechechique, te ya xc'axic bael ta tec'oja' yu'un muc'ja' Arnón.

³ Jich ya yalbeyic te Sión: —Chajbana abaic swenta yu'un ya xc'opojex cu'untic, puersa me ya xc'opojex cu'untic. Lich'a ta jtojoltic te awaxinale, manchuc me olil ay te c'aale, jichuc me c'oem te bit'il ajc'ubale. Ac'botic jcux co'tantic, melel tenbilotic loq'uel, ma xawac'otic ta c'abal te jo'otique, yacalotic ta anel ta jnac'bel jbatic.

⁴ Ac'botic jnac' jbatic ta atojol, te jo'otic anelotic loq'uel ta jq'uinaltic, ja' te Moab. Coltayawotic loq'uel ta sc'ab te mach'a ya sjinotique —xiic. C'alal ya xlaj te uts'inel soc teme c'axix a te jinele, c'alal loq'uix bael a te mach'a ochem ta slumalique,

⁵ te jtul sts'umbal David ya xc'ot ta swenta mandalteswanej, ja' te mandaltesel ta swenta yutsil-o'tanil te sbajt'el q'uinal ay stuquele. Ja' me juez stuquel te lec yo'tane; ja' me ya sjajch'es ta pasel te bitic ay ta swenta juju-jtul soc ya me xc'ot ta ora te tojil chajbanele.

⁶ Ya jna'tic te mero c'ax muc' yac'oj sbaic te Moab, yich'oj sba ta muc', cajal yac'oj sba, bayal stoyoj sba, soc tojol te bitic ya yale.

⁷ Ja' yu'un ta spisil yajwal Moab ya me x'oq'uic yu'un te slumalique; c'axem to xan me ya x'ajc'anajic, ya me yaiybeyic xc'uxul ta swenta te yajwal Kir-hareset.

⁸ Te ts'usubiltic yu'un Hesbón soc yu'un Sibma, bolobix ta lubajel yabenal, la yich' c'asel yu'un te ajwaliletic yu'un te nacionetique. Te sc'abc'abe c'otic c'alal ta Jazer, la spuc sbaic bael c'alal ta jochol taquin q'uinal soc ja' to la staic jejch' mar.

⁹ Ja' swentail te ya x'oc'on yu'un te ts'usubiltic ta Sibma, soc nix te yu'un Jazer, soc ya jmal ya'lel jsit yu'un te Hesbón soc te Eleale. Melel te sit, te bitic sc'oplal ya yich' tulel loq'uel, ma xju'ix ta tsobel ta scaj te jajch'ix aw yu'un guerra.

¹⁰ Te sbujts'-o'tanil soc c'opetic ta q'uinal ya me xlaj sc'oplal tey a ta campo; ma me ayuquix aw yu'un sbujts'-o'tanil, ma me ayuquix c'ayojetic ta ts'usubiltic, ma me ayuquix ta pits'el sit ts'usub ta swenta vino. Te awetic lajix ta jc'axel.

¹¹ Te co'tan ya x'ajc'anaj jichuc sc'op arpa ta swenta Moab soc ta swenta Kir-hareset.

¹² Manchuc me ya xbajt' Moab ta bay toyol ch'uunjibal ta yalel wocol tey a, ja' to c'alal ya xlub, manchuc me ya xbajt' ta templo ta sc'oponel te dios yu'unic, ma'yuc bi ya staic a.

¹³ Ja' c'opetic la yal Cajwaltic, te la yalbey sc'oplal Moab, te ayix bayal c'aale.

¹⁴ Ta ora yo'tic jich ya yal xan te Cajwaltique: —Tey ta oxeb ja'wil, jich bit'il ya yajtay jtul j'at'el-winic te ja' cuxul ta swenta te stojol sc'abe, te yutsilal Moab ma'yuc sc'oplal ya xc'ot ta loq'uel, manchuc me ma xju'ix ta ajtayel te yajwale; ch'in tsojp xanix ya xjil, jc'axel ma'yuquix yip —xi' te Cajwaltique.