Génesis 7 - Bible in Tzeltal de Oxchuc y Tenejapa

Tal pulemal

¹ Te Cajwaltic la yalbey te Noé: —Ochan ta barco soc spisil mach'a ay awu'un, melel ta spisil te mach'atic ay ta q'uinal, ja'at nax atuquel te ya apasbon sc'anjel co'tan ya quile.

² Te chambalametic lec sc'oplal, ya me awic' ochel juqueb ta jcojt' stat soc juqueb ta jcojt' sme' ta juju-jchajp. Yan te chambalam te ma lecuc sc'oplale, ya me awic' ochel ta juju-jchajp, jcojt' stat soc jcojt' sme'.

³ Ja' nix jich te ja'mal mutetique, juqueb ta jcojt' stat soc juqueb ta jcojt' sme' ta juju-jchajp, swenta yu'un jich me ma xtup' sts'umbal ta spamal balumilal.

⁴ Melel ta sjuquebal c'aal ya xtal ja'al cu'un ta balumilal cha'winic c'aal soc cha'winic ajc'ubal, soc ya me jtup' spisil bitic cuxajtic te pasbil cu'un ta balumilal —xi'.

⁵ Te Noé jich la spas spisil te bit'il pasot ta mandal yu'un te Cajwaltique.

⁶ Ay olil xcha'bajc' (600) ya'wilal a te Noé c'alal tal pulemal ta balumilal.

⁷ Och ta barco te Noé soc snich'nab soc yinam soc yinamic te snich'nabe, scaj te pulemale.

⁸ Te chambalametic te lec sc'oplal soc te chambalametic te ma lecuc sc'oplale, soc mutetic, soc spisil bitic staslajan ya xbeen ta lumq'uinal

⁹ ochic ta barco soc te Noé, jcojt' stat soc jcojt' sme' te juju-jchajp, jich bit'il pasot ta mandal yu'un te Diose.

¹⁰ Ta sjuquebal c'aal a tal pulemal ta balumilal.

¹¹ C'alal ay olil xcha'bajc' (600) ya'wilal te Noé, ta sjuclajunebal sc'aalelal te xchebal u, jich ora t'om loq'uel tel ja'etic ta mar, soc jich ora mal coel tel ja'al ta ch'ulchan.

¹² Cha'winic c'aal soc cha'winic ajc'ubal la yac' ja'al ta sba te balumilale.

¹³ Ja' yorail och ta barco te Noé soc te snich'nabe: te Sem, Cam, soc te Jafet, soc yinam te Noé, soc yinamic te oxtul snich'nabe.

¹⁴ Soc och spisil te ja'mal chambalametic soc alaq'uil chambalametic ta chajbalchajp, soc spisil chambalam te staslajan ya xbeen ta balumilal ta chajbalchajbe, soc spisil ta jchajp te mutetique.

¹⁵ Och soc Noé ta barco cha'cha'cojt' juju-jchajp ta spisil bitic cuxajtic ta q'uinal.

¹⁶ Ta spisil bitic cuxajtic, jcojt' stat soc jcojt' sme' ochic soc, jich nix bit'il pasot ta mandal yu'un te Diose. Te c'alal ochemiquix ta spisilic a, Dios la smacbey sti' te barcoe.

¹⁷ Cha'winic c'aal noj moel ja' ta sba te balumilale, jich mujc' ta ja' te balumilale. C'alal yac ta toyel te ja'e, licot moel yu'un te barcoe.

¹⁸ Yanyan ta toyel te ja' ta balumilal, spisil mucot ta ja', yan te barco cajaj ta ba ja' stuquel.

¹⁹ Mucot ta ja' te balumilale, soc ta bay toyol witstiquil mujc' ta ja'.

²⁰ C'axem ta juqueb metro mujc' ta ja' spisil witstiquil.

²¹ Jich laj spisil ants-winiquetic ta balumilal, soc mutetic, soc alaq'uil chambalametic soc te yantic ja'mal chambalametic, soc spisil chambalam te staslajan ya xbeen ta balumilale.

²² Laj spisil te bitic cuxajtic ta balumilal te ya yich'ic iq'ue.

²³ Jc'axel laj ta balumilal spisil ants-winiquetic soc chambalametic, chanetic, soc spisil ta jchajp mutetic. Stuquel xanix cuxul jilel te Noé, soc spisil bitic cuxajtic sjoinej ta barco.

²⁴ Lajuneb swaxacwinic (150) c'aal mucul ta ja' te balumilale.