Génesis 5 - Bible in Tzeltal de Oxchuc y Tenejapa

Cajalcaj sts'umbal Adán

¹ Jich ay te lista yu'un sts'umbal Adán. C'alal Dios la spas te ants-winic, pajal yilel soc Dios te la spase.

² Jtul winic soc jtul ants pastaj yu'un, soc la yac'bey bendición. C'alal pastajic, Dios la yal: “Ants-winic me ya xc'ot te sbiilique”, xi'.

³ Ay lajuneb sjucwinic (130) ya'wilal a te Adán c'alal ayin te snich'ane, Set c'ot te sbiile, pajal yilel soc te state.

⁴ Cha'bajc' (800) xan ja'wil cuxin te Adán te c'alal ayinemix a te Set, soc ay yantic snich'nab, queremetic soc ach'ixetic.

⁵ Ta spisil lajuneb sjucwinic yoxbajc' (930) ja'wil cuxin te Adán, laj bael.

⁶ Ay jo'eb swacwinic (105) ya'wilal te Set c'alal ayin snich'an, Enós sbiil c'ot yu'un.

⁷ Patil cuxin xan te Set juqueb yoxbajc' (807) ja'wil, soc ay yantic snich'nab, queremetic soc ach'ixetic.

⁸ Ta spisil lajchayeb swacwinic yoxbajc' (912) ja'wil cuxin te Set, laj bael.

⁹ Ay lajuneb yo'winic (90) ya'wilal te Enós c'alal ayin snich'an, Cainán sbiil c'ot yu'un.

¹⁰ Patil cuxin jo'lajuneb yoxbajc' xan (815) ja'wil te Enós, soc ay yantic snich'nab, queremetic soc ach'ixetic.

¹¹ Ta spisil jo'eb swacwinic yoxbajc' (905) ja'wil cuxin te Enós, laj bael.

¹² Ay lajuneb xchanwinic (70) ya'wilal te Cainán, c'alal ayin snich'an, Mahalaleel sbiil c'ot yu'un.

¹³ Patil cuxin xan te Cainán cha'winic yoxbajc' (840) ja'wil, soc ay yantic snich'nab, queremetic soc ach'ixetic.

¹⁴ Ta spisil lajuneb swacwinic yoxbajc' (910) ja'wil cuxin te Cainán, laj bael.

¹⁵ Ay jo'eb xchanwinic (65) ya'wilal te Mahalaleel c'alal ayin snich'an, Jared sbiil c'ot yu'un.

¹⁶ Patil lajuneb xcha'winic yoxbajc' (830) ja'wil cuxin xan, soc ay yantic snich'nab, queremetic soc ach'ixetic.

¹⁷ Ta spisil jo'lajuneb yo'winic yoxbajc' (895) ja'wil cuxin te Mahalaleel, laj bael.

¹⁸ Ay cheb sbalunwinic (162) ya'wilal te Jared c'alal ayin snich'an, Enoc sbiil c'ot yu'un.

¹⁹ Patil cha'bajc' (800) xan ja'wil cuxin te Jared, soc ay yantic snich'nab, queremetic soc ach'ixetic.

²⁰ Ta spisil cheb sbalunwinic yoxbajc' (962) ja'wil cuxin te Jared, laj bael.

²¹ Ay jo'eb xchanwinic (65) ya'wilal te Enoc c'alal ayin snich'an, Matusalén sbiil c'ot yu'un.

²² Sjoy sba soc Dios te Enoc te la spasbey sc'anjel yo'tane. Patil jo'lajunwinic (300) xan ja'wil cuxin c'alal ayinemix a te Matusalén, soc ay yantic snich'nab, queremetic soc ach'ixetic.

²³ Ta spisil cuxin jo'eb sbalunlajunwinic (365) ja'wil te Enoc.

²⁴ Sjoinej Dios te la spasbey sc'anjel yo'tan. C'ot yorail te ma chicanuc bay bajt', ic'ot bael yu'un Dios.

²⁵ Ay juqueb slajunwinic (187) ya'wilal te Matusalén c'alal ayin snich'an, Lamec c'ot te sbiile.

²⁶ Patil cuxin xan te Matusalén balunlajunwinic xcha'bajc' soc cheb (782) ja'wil, soc ay yantic snich'nab, queremetic soc ach'ixetic.

²⁷ Ta spisil baluneb sbalunwinic yoxbajc' (969) ja'wil cuxin te Matusalén, laj bael.

²⁸ Ay cheb slajunwinic (182) ya'wilal te Lamec c'alal ayin snich'an.

²⁹ Noé sbiil c'ot yu'un te snich'ane, yu'un jich la yal: “Scaj te la yac' bolobuc sc'oplal lumq'uinal te Diose, ja' ay jwocoltic ta at'el ta jc'abtic yu'un. Te alale ya me yac'botic cux co'tantic”, xi' sc'oplal yu'un.

³⁰ C'alal ayin Noé, jo'lajuneb slajunwinic xcha'bajc' (595) ja'wil cuxin xan te Lamec, soc ay yantic snich'nab, queremetic soc ach'ixetic.

³¹ Ta spisil juclajuneb sbalunlajunwinic xcha'bajc' (777) ja'wil cuxin te Lamec, laj bael.

³² Ay jo'winic xcha'bajc' (500) ya'wilal te Noé c'alal ayin te snich'nabe: Sem, Cam, soc Jafet sbiil c'ot yu'un.