Génesis 4 - Bible in Tzeltal de Oxchuc y Tenejapa

Caín soc Abel

¹ Jich te Adán la sjoin ta wayel te Eva, ja' te yiname. Jich la yic' yal, jich ayin te Caín. “Ayix jtul cal, querem yac'ojbon te Diose”, xi'.

² Patil tal yuts', Abel sbiil c'ot yu'un. Te Abel la yat'elin xch'ijtesel chij, yan te Caín la yat'elin sts'unel awalts'unub ta lumq'uinal stuquel.

³ La sta yorail te la yac'bey smajt'an Dios te Caine. Ja' la yac' te sit yawal-sts'unube.

⁴ Yan te Abel ja' la yac' te sba yalatac xchij te buen jujp'ene. Te Dios lec yo'tan yu'un te Abel soc te majt'anil la yaq'ue.

⁵ Yan te Caín ma lecuc yo'tan Dios yu'un soc te smajt'an te la yac'beye. Jich te Caín bayal a ilin yu'un, yanaj sit yu'un te yilimbae.

⁶ Te Dios jich la yalbey te Caín: —¿Bistuc ilinat, soc bistuc yanaj asit?

⁷ Te yu'unuc lec te awat'ele, ¿ma bal lecuc ac'oplal ya xc'oat yu'un te jichuque? Yan teme ma lecuc te awat'ele, ja' me ya yabatinat te mulile. Ja'uc me to, ya xju' awu'un scomel te mulil te jichuque —la yut.

⁸ Te Caín la yalbey te Abel, ja' te yijts'ine: —Conic ta paxeal —la yut. Jich yu'un te bit'il la sjoin sbaic bael ta paxeal, te Caín la stsac te yijts'ine, ja' te Abel, la smil.

⁹ Dios la sjojc'obey te Caín: —¿Banti ay te awijts'in Abel? —la yut. La sjac' te Caine: —Ma xquil, ¿yu'un bal jo'on jcanantayej te quijts'ine? —xi'.

¹⁰ Te Diose jich la yalbey: —¿Bi yu'un jich la apas? Ja' la yalat te xch'ich'el awijts'in te la amalbey ta lumq'uinale.

¹¹ Jich yu'un bolobix ac'oplal li' ta lumq'uinal to te la amalbey xch'ich'el te awijts'ine.

¹² Te c'alal ya awaiy awal ta lumq'uinal, ma me xyac' sit. Melmonel ya xc'axat ta q'uinal, soc ma xwejt' bay ya x'ainat —xi' sc'oplal yu'un te Diose.

¹³ Te Caín la yalbey te Diose: —Bayal ayon ta castigo, ma xcujch' cu'un,

¹⁴ melel ya atenon loq'uel ta q'uinal, soc ma xawac'bonix quilbat asit. Melmonel ya xc'oon, soc ma xwejt' bay ya x'ainon. Spisil mach'a ya staon, ya me smilon —xi'.

¹⁵ Te Dios la yalbey: —Teme ay mach'a ya smilate, juqueb buelta ya x'esmaj castigo ta stojol —xi'. Jich yu'un te Cajwaltic la yac'bey señail ta sbaq'uetal te Caín, swenta yu'un ma me ayuc mach'a ya xmilot yu'un.

¹⁶ Jich a loc' ta stojol Dios te Caín, ba nainuc ta Nod ay ta stojol sloq'uib c'aal yu'un Edén.

Sts'umbal Caín

¹⁷ Te Caín la sjoin ta wayel te yiname, jich la yic' yal, Enoc sbiil c'ot. Soc la spas muc'ul lum te Caín, Enoc sbiil c'ot yu'un te lume, ja' la yac'bey sbiilin te sbiil snich'ane.

¹⁸ Ja' snich'an Enoc te Irad. Ja' snich'an Irad te Mehujael. Ja' snich'an Mehujael te Metusael. Ja' snich'an Metusael te Lamec.

¹⁹ Te Lamec la yic' cheb yinam, Ada sbiil te jtule, Zila sbiil te yane.

²⁰ Alaj te Ada, Jabal sbiil c'ot te yale. Ja' sts'umbal ta spisil te mach'atic snainejic nailpac' soc te yat'elinejic xch'ijtesel te chambalametique.

²¹ Ay yijts'in, Jubal sbiil, ja' sts'umbal ta spisil te mach'atic ya stijic arpa soc te amaye.

²² Te Zila alaj uuc, Tubal-Caín sbiil c'ot te yale. La yat'elin stenel taq'uin, la sna' spasel spisil te bila ya xpastaj ta bronce soc hierro. Ay yijts'in-ach'ix te Tubal-Caín, Naama sbiil.

²³ Te Lamec ay jun buelta la yalbey ta xchebal te yiname: —Ja'ex Ada soc Zila, aiybon awaiy stojol jc'op ta lec: Ay jtul winic la jmil, yu'un la yejch'enteson, la jmil jtul querem, yu'un la smajon.

²⁴ Teme juqueb buelta ya x'esmaj castigo ya yich' te mach'a ya smil te Caine, yan te mach'a ya smilone, te juqueb buelta ya me x'esmaj lajuneb xchanwinic (70) buelta castigo ya yich' —xi' te Lamec.

Yoxebal yal-snich'an Adán soc Eva

²⁵ Te Adán la sjoin xan ta wayel te yiname. Ayin yal te Eva, Set sbiil c'ot yu'un, melel la yal: “Dios la yac'bon yan cal swenta sjelol te Abel te la smilbon te Caín”, xi' yu'un.

²⁶ Ayin snich'an te Set, Enós sbiil c'ot. Ja' yorail te caj yalbeyic wocol ta stojol Cajwaltic te ants-winiquetique.