Génesis 36 - Bible in Tzeltal de Oxchuc y Tenejapa

Sts'umbal Esaú

¹ Jich ay sbiilic te sts'umbal Esaú, te Edom yan sbiile.

² Ja' la yic' yinamin te yantsil-nich'nab cananeoetique: Ada sbiil te jtule, te yantsil-nich'an Elón te hitita-winique, soc te yane, Aholibama sbiil, ja' te yantsil-nich'an te Aná, te ja' smam te Zibeón, te heveo-winique.

³ Soc ay xan yan, ja' Basemat sbiil te yantsil-nich'an Ismael, te ja' sjoy ta alatayel te Nebaiot.

⁴ Elifaz sbiil te snich'an Esaú soc Ada. Reuel sbiil te snich'an Esaú soc Basemat.

⁵ Te snich'nab Esaú soc te Aholibama ja' te Jeús, Jaalam soc Coré. Ja' snich'nab Esaú te ayinic ta sq'uinal Canaán.

⁶ Te Esaú la yic' bael yoxebal te yiname, soc te yal-snich'nab, soc spisil mach'a ay yu'un. Bajt' ta bay yan q'uinal, swenta yu'un najt' me ya yil sba soc te yijts'ine, ja' te Jacob. La yic' bael spisil te xchamsbalam soc spisil te jayeb sbiluc te la stsob ta bay Canaán.

⁷ Scaj te bayal xchamsbalamic ta xchebalic, jich ma spas te la sjoin sbaic ta q'uinale, melel te q'uinal ta bay ayic, ma tic'uc ya xwe'ic a te xchamsbalamique.

⁸ Jich c'o nainuc ta witstiquil Seir te Esaú te Edom yan sbiile.

⁹ Jich sbiilic te sts'umbal Esaú, te stat te edometic te ayic ta witstiquil Seir:

¹⁰ Te snich'nab Esaú: Elifaz te yal Ada; soc Reuel te yal Basemat.

¹¹ Te snich'nab Elifaz jich sbiilic: Temán, Omar, Zefo, Gatam soc Cenaz.

¹² Ay xan yan ants la yic' te Elifaz, te Timna sbiil, te Amalec sbiil te yal-snich'an soque. Ja' yal-snich'nab te Ada, ja' te yinam Esaú.

¹³ Te snich'nab Reuel jich sbiilic: Nahat, Zera, Sama soc Miza. Ja' yal-snich'nab te Basemat te yan yinam Esaú.

¹⁴ Te yoxebal yinam te Esaú, Aholibama sbiil te yantsil-nich'an Aná, te smam Zibeón. Te yal-snich'an soc, jich sbiilic: Jeús, Jaalam soc Coré.

¹⁵ Te jtsobwanejetic yu'un te sts'umbal Esaú, jich ayic: Te sts'umbal Elifaz te sba snich'an te Esaú: Temán, Omar, Zefo, Cenaz,

¹⁶ Coré, Gatam soc Amalec. Ja' jtsobwanejetic yu'un te sts'umbal Elifaz ta sq'uinal Edom. Ta spisil ja' yal-snich'nab te yinam Esaú te Ada sbiile.

¹⁷ Te sts'umbal Reuel te snich'an Esaú, ja' jtsobwanejetic te jich sbiilique: Nahat, Zera, Sama soc Miza. Ja' jtsobwanejetic yu'un te sts'umbal Reuel ta sq'uinal Edom. Ta spisil ja' yal-snich'nab te yinam Esaú te Basemat sbiile.

¹⁸ Te yalatac Aholibama te snich'an Aná, ja' jtsobwanejetic yu'unic te Jeús, Jalaam soc Coré.

¹⁹ Ta spisil ja' sts'umbal Esaú te Edom te yan sbiile, soc jtsobwanejetic ta chajbalchajp te sts'umbale.

²⁰ Te snich'nab Seir te horeo-winic te nainemic ta witstiquile, jich ay sbiilic: Lotán, Sobal, Zibeón, Aná,

²¹ Disón, Ezer soc Disán. Ja' jtsobwanejetic yu'un te horeoetic, te sts'umbal Seir, te nainemic ta sq'uinal Edom.

²² Te snich'nab Lotán: Hori soc Hemam sbiilic. Te Timna, ants stuquel, sjoy sba ta alatayel soc Lotán.

²³ Te snich'nab Sobal, jich sbiilic: Alván, Manahat, Ebal, Sefo soc Onam.

²⁴ Te snich'nab Zibeón: Aja soc Aná sbiilic. Te Aná ja' me te la sta sloq'uibja'etic ta jochol taquin q'uinal te c'alal yac scanantayel burroetic yu'un te state, ja' te Zibeone.

²⁵ Te snich'nab Aná: Disón sbiil, soc jtul yantsil-nich'an te Aholibama sbiile.

²⁶ Te snich'nab Disón: Hemdán, Esbán, Itrán soc Querán.

²⁷ Te snich'nab Ezer: Bilhán, Zaaván soc Acán.

²⁸ Te snich'nab Disán: Uz soc Arán.

²⁹ Te jtsobwanejetic yu'un te horeoetique, jich sbiilic: Lotán, Sobal, Zibeón, Aná,

³⁰ Disón, Ezer soc Disán. Spisilic ja' jtsobwanejetic yu'un te horeoetic ta chajbalchajp te nainemic ta sq'uinal Seir.

³¹ Ja' te muc' ajwaliletic ta Edom te bit'il ma to ayuc muc' ajwalil yu'un stuquel a te israeletique:

³² Och ta muc' ajwalil ta Edom te Bela snich'an Beor, te ja' Dinaba sbiil te lum te banti naineme.

³³ Laj te Bela, ja' la sjelolin ta muc' ajwalil te Jobab snich'an Zera, te nainem ta lum Bosra.

³⁴ Laj te Jobab, ja' la sjelolin ta ajwalil te Husam te talem ta sq'uinal Temán.

³⁵ Laj te Husam, ja' la sjelolin ta ajwalil te Hadad snich'an Bedad, te la stsal te madianetic jun buelta ta sq'uinal Moab. Avit sbiil te lum te banti naineme.

³⁶ Laj te Hadad, ja' la sjelolin ta ajwalil te Samla te talem ta lum Masreca.

³⁷ Laj te Samla, ja' la sjelolin ta ajwalil te Saúl te talem ta Rehobot te nopol yiloj sba soc te muc'ul ja'e.

³⁸ Laj te Saúl, ja' la sjelolin ta ajwalil te Baal-hanán snich'an Acbor.

³⁹ Laj te Baal-hanán snich'an Acbor, ja' la sjelolin ta ajwalil te Hadad te Pau sbiil te lum yu'une. Te yiname Mehetabel sbiil te ja' yantsil-nich'an Matred, te ja' smam te Mezaab.

⁴⁰ Jich sbiilic te jaychajp sts'umbal te Esaú soc te q'uinal te banti nainique: Timna, Alva, Jetet,

⁴¹ Aholibama, Elá, Pinón,

⁴² Cenaz, Temán, Mibzar,

⁴³ Magdiel soc Iram. Edom yan sbiil te Esaú. Te mach'atic loc' sbiilique ja' jtsobwanejetic yu'un edometic, jich nix te bit'il ay te sq'uinalique.