Génesis 3 - Bible in Tzeltal de Oxchuc y Tenejapa

Adán soc Eva la xc'axintaybeyic smandal Dios

¹ Te chane c'ax jich sp'ijil yu'un lo'laywanej a te bit'il spisil yantic ja'mal chambalametic ta q'uinal pasbil yu'un te Diose. La sjojc'obey te antse: —¿Jich bal yalojbat te Diose: “Ma me xalo'bey sit spisil te te'etic ayic ta awalts'unubil”, xi' bal te Diose? —la yut.

² Te ants la yalbey te chane: —Ya laj xju' ya jlo'beytic sit biluc te'etic ay ta awalts'unubil,

³ ja' nax te sit te' te ay ta yolil awalts'unubile, yalojbotic te Diose: “Ma me xalo'bey sit stuquel, soc ma me x'apicbey sit stuquel, ya me xlajat yu'un”, xi' te Diose —la yut.

⁴ Te chan jich la yalbey te antse: —Ma meleluc. Ma sna' xlajat yu'un.

⁵ Sna'oj stojol Dios te bi ora ya alo'bey sit, ya me ana'ic stojol bila lec soc te bila ma lecuque, pajal ya xc'oex soc te Diose —xi'.

⁶ La yil te ants te bit'il t'ujbil soc lec ta lo'el sit te te'e, soc la yil te lec ta tuuntesel te bit'il ya yac' p'ijil-o'tanil teme ay mach'a ya slo'e. Jich yu'un la sc'oc slo', soc la yac'bey slo' uuc te smamlale.

⁷ Jich a jambot sit xchebalic, la sna'ic stojol te bit'il t'analique. Jich yu'un la sts'isic yabenal higuera, la smac sbaq'uetalic a.

⁸ Te c'alal yaquix ta malel c'aal a, te winic soc te antse la yaiybeyic sc'op te Cajwaltic Dios te yac ta beel ta awalts'unubile. Ora c'an snac' sbaic ta sit Cajwaltic Dios ta bay yolil te'etic te ayic ta awalts'unubile.

⁹ Te Dios la yawtay tel sc'opon te winique, jich la sjojc'obey: —¿Banti ayat? —la yut.

¹⁰ La sjac' te winique: —La caiy stojol yacat ta beel ta yolil awalts'unubil. Xiwon, yu'un t'analon, jich la jnac' jba —la yut.

¹¹ Jich la sjojc'obey te Diose: —¿Mach'a la yalbat te bit'il t'analat? ¿Yu'un bal la alo'bey sit te te' la calbat: “Ma xalo'bey sit”, te la cutate? —xi'.

¹² La sjac' te winique: —Ja' la yac'bon jlo' te ants te la awac'bon joine, jich la jlo'bey sit —xi'.

¹³ Jich yu'un te Cajwaltic Dios la sjojc'obey te antse: —¿Bi yu'un jich la apas? —xi'. La yal te antse: —Ja' la slo'layon te chane, jich la jlo' te sit te'e —xi'.

¹⁴ Te Cajwaltic Dios jich la yalbey te chane: —Te bit'il jich la apas, c'ax jich bolobix ac'oplal te bit'il spisil yantic chambalametic. Ya me atas aba te ya xbeenate, soc ts'ubil lum ya alo' jayeb c'aal cuxulat ta q'uinal.

¹⁵ Ya me cac' te contro ya awil aba soc te antse, soc te ats'umbale contro ya yil sba soc te sts'umbale. Ja' me ya yejch'entesbat ajol te patil alnich'an yu'une, yan te ja'ate yit nax yacan ya awejch'entesbey atuquel —xi' sc'oplal yu'un.

¹⁶ Te Diose jich la yalbey te antse: —Ya me xtoy awocol ta alajel, ay me xc'uxul ya x'alajat. Te bila ya sc'an te abaq'uetale, ja' me ay ta swenta te amamlale, ja' me ya ach'uunbey smandal stuquel —xi' sc'oplal.

¹⁷ Yan te winique, jich albot yu'un te Cajwaltique: —Te bit'il la ach'uunbey sc'op te awinam te la alo'bey sit te te' te la calbate: “Ma me xalo'bey sit”, te la cutate, bolob me sc'oplal te lumq'uinal ta awenta, ay awocol ya xwe'at te jayeb c'aal ya xc'axat ta q'uinale.

¹⁸ Ya me x'esmaj ch'ixetic, ja' me ya alo'ic te boc-itaj te ya xch'i ta q'uinale.

¹⁹ Buen chic' ya x'ac'botat te bit'il ya ata awe'ele, ja' to te c'alal ya sujt'at ta lumq'uinal, melel ta ts'ubil lum pastajat, ja' nix jich ts'ubil lum ya sujt'at —xi' te Diose.

²⁰ Te winique la slebey sbiil te yiname, Eva sbiil c'ot yu'un, yu'un ja' me'il c'ot yu'un spisil yantic.

²¹ Dios la spasbey sc'u' ta snujc'ulel chambalam te winique soc te yiname, la yac'bey slapic.

²² Soc jich la yal te Diose: “Pajal c'ootic soc te ants-winique, te bit'il ya sna'ic bila lec soc te bila ma lecuque. Jich yu'un ma me xyac' tel sc'ab stsacbey sit slo' te te' ya yac' cuxinele; melel teme ya slo'bey site, ya me xcuxin sbajt'el ora yu'un”, xi'.

²³ Jich yu'un te Cajwaltic la sticun loq'uel ta awalts'unubil, te Edén sbiile, swenta yu'un ya x'at'ej ta lumq'uinal te ja' nix pastajem ae.

²⁴ Jich a loq'uesot ta awalts'unubil te ants-winique. Ta stojol sloq'uib c'aal Dios la yac' querubinetic, soc ay puñal yac ta tilel tey a te bayuc nax ya sjimulay sba, swenta yu'un ma me ayuc mach'a ya xc'ot ta banti ay te te' ya yac' cuxinele.