Génesis 26 - Bible in Tzeltal de Oxchuc y Tenejapa

Te Isaac bajt' ta Gerar

¹ Tal wi'nal tey a ta lumq'uinal ta bay nainem te Isaac, jich nix bit'il tal wi'nal c'alal cuxul to a te Abrahame. Jich yu'un te Isaac bajt' ta lum Gerar te banti ay Abimelec te ajwalil yu'un te filisteoetique.

² Te Cajwaltic la yac' sba ta ilel ta stojol Isaac, jich la yalbey: —Ma me xcoat bael ta Egipto, nainan te banti ya calbate.

³ Tey me xnainat a te bay q'uinal ayate, ya me joinat, soc ya me cac'bat bendición. Yu'un ya me cac'bat aq'uinalin spisil soc ats'umbal te q'uinale, soc ya me cac' c'otuc ta pasel te bila la calbey te atat Abrahame.

⁴ Ya me cac' esmajuc ats'umbal, jich yipal ya xc'otic te bit'il eq'uetic ta ch'ulchan. Soc ya me cac'bey sq'uinalin spisil in q'uinal to te ats'umbale. Ta swenta ats'umbal ya me x'ac'bot bendición ta spisil ta jchajp mach'atic ayic ta balumilal.

⁵ Te melel la xch'uunbon jc'op te Abraham, soc la xch'uunbon jmandal, soc la xch'uun spasel spisil te bila la calbey —xi' sc'oplal yu'un te Cajwaltique.

⁶ Ja' yu'un te Isaac nain ta lum Gerar.

⁷ Te winiquetic ayic tey a la sjojc'obeyic bi yutoj te ants sjoineje, ja' te yiname. La sjac' te Isaac: —Quijts'in-ach'ix —xi'. Yu'un la xi' te ya yalbey yaiy te bit'il yinam, melel la yal ta yo'tan teme ya xmilot yu'un te winiquetic ta scaj te Rebeca te melel buen t'ujbil ants.

⁸ Jalajemix bayal c'aal tey a te Isaaque. Jun buelta te Abimelec te ajwalil yu'un te filisteoetic, la yil ta ventana, yac ta smeyel Rebeca te Isaaque.

⁹ Jich yu'un te Abimelec la sticun ta iq'uel te Isaac, jich la yalbey: —¿Bistuc, “Quijts'in-ach'ix”, xaat yu'un te ants ajoineje? Awinam ya quil —la yut. La sjac' te Isaac: —Yu'un la cal ta co'tan: “Repente ya smilonic yu'un”, xoon —xi'.

¹⁰ La yal te Abimelec: —¿Bi yu'un te jich la apasbotique? Ja' wocol te ayuc mach'a way soc te awiname, jich la jta jmultic awu'un te jichuque —xi'.

¹¹ Jich yu'un te Abimelec la yalbey tulan mandal spisil te lume: —Ma me ayuc mach'a ya yuts'in te winic soc te yiname. Teme ay mach'a jich ya spase, ya me x'ac'ot ta lajel ta ora —xi'.

¹² Te Isaac la sts'un yawal-sts'unub tey a. Lec a sitin c'ax ja'wil, yu'un bayal ac'bot bendición yu'un te Cajwaltique.

¹³ Jich esmaj sc'ulejal te Isaac, yanyan ta tsobajel sc'ulejal, buen c'ulej c'ot.

¹⁴ Bayal me xchij, bayal swacax, bayal swinictac, asta bic'tal-o'tantayot yu'un te filisteoetique.

¹⁵ Te c'alal cuxul to a te Abraham, ja' te stat Isaac, te abatetic yu'un la sjoq'uic pozoetic; ja'uc me to, te filisteoetic patil la sbut'beyic ta lum, jich la smacbeyic.

¹⁶ Te Abimelec la yalbey te Isaac: —Loc'an bael li'to, melel c'ax jich ac'ulejal te bit'ilotic —la yut.

¹⁷ Jich loc' tey a te Isaac. La sq'uej sba, q'uejel ba stejc'an snailpac' ta bay te stenlej xatal q'uinal yu'un beja' Gerar, tey nain a.

¹⁸ La sjam te pozoetic te la spas Abraham, ja' te state, te c'alal cuxul to ae, te la smaquic te filisteoetic c'alal lajemix a te Abrahame. Jich nix sbiilic c'ot te pozoetic yu'un te Isaac te bit'il nix sbiilic yu'un te state.

¹⁹ Te abatetic yu'un Isaac la spasic yan pozo ta spamlej. Ay sloq'uibja' la staic tey a, spisil ora ma xtup'.

²⁰ Jich yu'un te jcanan-chijetic ta spamlej Gerar la yut sbaic soc te jcanan-chijetic yu'un Isaac, jich la yalic: —Cu'untic te pozo —xiic. Jich yu'un, “Guerra” sbiil c'ot te pozo, yu'un ay guerra.

²¹ Patil la spasic yan pozo. Ja' nix jich ay guerra c'ot yu'un. “Controinel” sbiil c'ot.

²² Jich la yijq'uitay jilel te Isaac, c'ubul ba spas yan pozo. Ma'yuquix guerra c'ot yu'un stuquel. Jich yu'un, “Libre ayotic” xi' sbiil c'ot, yu'un la yal te Isaac: —Dios la scoltayotic te bay te q'uinale, li' me ya x'esmaj te jbiluctique —xi' yu'un.

²³ Ta patil bajt' ta Beerseba te Isaac.

²⁴ C'alal c'ot ta Beerseba, Dios la yac' sba ta ilel ta ajc'ubal ta stojol, jich la yalbey: —Jo'on Dioson yu'un te atat Abraham. Ma me xiwat, joinejat spisil ora. Ta swenta bit'il c'ux ta co'tan te cabat Abraham, ya me cac'bat bendición, ya me cac' esmajuc ats'umbal —xi'.

²⁵ Jich yu'un te Isaac la spasbey scajtijib ta chiq'uel smajt'an Dios, la xchic'bey jcojt' chij tey a, soc la squejan sba ta stojol Dios. Tey la stejc'an snailpac' a, soc te abatetic yu'un la sjoq'uic jun pozo.

Isaac soc Abimelec la spasic trato

²⁶ Te Abimelec loc' tel ta lum Gerar, tal yutsil-c'opon te Isaac. Tal soc te mach'a jun yo'tan sba soc, te Ahuzat sbiile, soc te Ficol te capitán yu'un te soldadoetic.

²⁷ Ja'uc me to, te Isaac la yalbey: —¿Bi yu'un tal ac'opononic? te melel ma c'uxuc la awaiyonic, la atenonic loq'uel ta aq'uinalic —la yut.

²⁸ Jich la sjaq'uic: —Yu'un quilojtic te bit'il ajoinej te Diose. Jich yu'un la caltic: “Conic, jpastic trato soc”, xootic tel,

²⁹ yu'un ya jc'an ya jchajbantic trato te bit'il ma ba ya awuts'inotic, yu'un ma'yuc bila amen la jpastic ta atojol. Lec co'tantic awu'un, sbelal la jticunticat loq'uel tel, melel te ja'ate ay bendición ta atojol yu'un Dios —xiic ta stojol.

³⁰ Jich yu'un te Isaac la spas muc'ul q'uin, we'-uch'ajic ta lec.

³¹ Sab jajch'ic, la yalic ta stojol Dios te bit'il jc'axel c'ux ya yaiy sbaique. Jich la sc'oponic xan jilel te Isaac, jun yo'tan bajt'ic.

³² Nax to nax bajt'ic a te tal te abatetic yu'un te Isaac, jul yalbeyic bit'il c'ot te pozo yacalic ta sjoq'uel: —La jtatiquix ja' —xiic julel.

³³ Jich yu'un te Isaac la slebey sbiil te pozo, Seba sbiil c'ot yu'un. Ja' swentail te bit'il Beerseba sbiil c'oem te lum c'alal ora to.

³⁴ Cha'winic (40) ya'wilal a te Esaú te la yic' cheb yinam, Judit sbiil te jtule, yantsil-nich'an Beeri, te heteo-winic, soc Basemat sbiil te yane, yantsil-nich'an Elón te heteo-winic nixe.

³⁵ Te Isaac soc Rebeca bayal ac'botic mel-o'tan yu'un.