Génesis 25 - Bible in Tzeltal de Oxchuc y Tenejapa

Sts'umbal Abraham soc Cetura

¹ Te Abraham la sle yan yinam, Cetura sbiil.

² Alajnich'naj soc, jich sbiil te alaletic yu'une: Zimram, Jocsán, Medán, Madián, Isbac soc Súa.

³ Te Jocsán ja' stat te Seba soc Dedán. Te Dedán ja' stat te asureoetic, letuseoetic, soc leumeoetic.

⁴ Te Madián ja' stat te Efá, Efer, Hanoc, Abida soc Elda. Ja' te yal-snich'nab te Cetura.

⁵ Ja'uc me to, te Abraham ja' la yac'bey jilel Isaac spisil te bitic ay yu'une.

⁶ Yan te yalatac te yan antsetic la yic' yinamin te Abraham, ja' nax la yac'bey smajt'anic stuquelic, jich la sticun bael ta stojol sloq'uib c'aal te c'alal cuxul to a. Ma la yac' sjoin sba soc Isaac te yantic snich'nabe.

Laj Abraham

⁷ Te jayeb ja'wil cuxin te Abraham, jo'lajuneb sbalunwinic (175) ja'wil.

⁸ Mero mamalix a te Abraham te laje. Mamalub ta lec soc ac'bot najt' yorail. Jich ba sjoin te mach'atic neel lajemic yu'une.

⁹ Te snich'nab Abraham, ja' te Isaac soc Ismael, la smuquic ta nailch'en Macpela, te ay ta sq'uinal Efrón te snich'an Zohar te heteo-winique. Te sq'uinal Efrón nopol ay ta Mamre ta stojol sloq'uib c'aal.

¹⁰ Ja' te q'uinal te chonbot yu'un sts'umbal Het te Abrahame. Tey mujc' a te Abraham te bay nix mucul te Sarae.

¹¹ Lajemix a te Abraham, ac'bot bayal bendición yu'un Dios te Isaaque. Nain ta bay pozo: “Ya yilon te cuxul Dios”, te xi' sbiile.

Sts'umbal Ismael

¹² Jich sbiilic te snich'nab Ismael te snich'an Abraham, te ja' yal te Agar te scriada Sara.

¹³ Jich sbiilic te jayeb snich'nab te Ismaele: Te sba snich'an Ismael Nebaiot sbiil. Ayinic xan te Cedar, soc Adbeel, Mibsam,

¹⁴ Mismá, Duma, Massa,

¹⁵ Hadar, Tema, Jetur, Nafis soc Cedema.

¹⁶ Ja'ic te snich'nab Ismael, jich ay te sbiilic, soc nix sbiilic te sq'uinalic soc te scampamentoique. Te lajchaytulique lajchaychajp loq'uemic a.

¹⁷ Te Ismael juclajuneb sjucwinic (137) ja'wil cuxin ta balumilal c'alal laj, jich ba sjoin te mach'atic neel lajemic yu'une.

¹⁸ Te mach'atic jayeb ay yu'un, la spuc sbaic c'alal Havila c'alal to ta Shur te ay ta stojol Egipto ta sbelal Asiria. Tey nainic ta spisilic manchuc me controinot yu'un te yermanotaque.

Ayin Jacob soc Esaú

¹⁹ Yan te Isaac te snich'an Abraham, jich ay sc'oplal stuquel.

²⁰ Cha'winic (40) ya'wilal a te Isaac te la yic' yinamin Rebeca, te yantsil-nich'an Betuel te arameo-winic te nainem ta Padan-aram. Ja' xi'lel te Labán sbiile.

²¹ Te Rebeca ma x'alaj, ja' yu'un te Isaac la sc'oponbey Dios te yiname. Tsacbot sc'op yu'un te Diose, jich la yic' yal te Rebeca.

²² La yac'bey sbaic guerra te cheb alaletic ta xch'ujt'. Jich yu'un la yal te Rebeca: “¿Teme jich aye, bistuc te cuxulon to?” xi'. Jich yu'un ba sc'opon te Cajwaltique.

²³ Albot yu'un: —Cha'chajp nación ya xloc' a te alaletic awic'oje, cha'chajp lum te ay to ta ach'ujt' a te scontroinej sbaique. Te jtule c'ax jich ya xju' yu'un te bit'il te yane, te banquilale abatil ya xc'ot yu'un te ijts'inale —xi' sc'oplal yu'un te Cajwaltique.

²⁴ Te c'alal la sta yorail ayin yal te Rebeca, lo'alaletic la yalatay.

²⁵ Te mach'a neel ayin, tsajal alal soc scojt'ol ay stsotsil, jich yu'un Esaú sbiil c'ot yu'unic.

²⁶ Te c'alal ayin te yijts'ine, stsacojbey te yit yacan te Esaú, Jacob sbiil c'ot yu'unic stuquel. Oxwinic (60) ya'wilal a te Isaac te c'alal ayin te snich'nabe.

Esaú la xchon te bila ay ta swenta yich'el

²⁷ Muc'ubic te alaletique. Te Esaú yat'elinej beel ta witstiquil, la sna' ta lec nutsojel stuquel. Yan te Jacob la smulan te ya x'ain ta sna.

²⁸ Te Isaac ja' c'ux ta yo'tan te Esaú, yu'un ya x'ac'bot ti'bal sti' yu'un. Yan te Rebeca ja' c'ux ta yo'tan te Jacob stuquel.

²⁹ Ay la spay tsajal chenec' te Jacob. Yan te Esaú luben sujt'el tel ta beel ta witstiquil stuquel.

³⁰ Jich yu'un la yalbey te Jacob: —Yacuc awac'bon jtebuc jwe' te atsajal cheneq'ue, yu'un ya xlajon ta wi'nal —xi'. (Ja' swentail te bit'il Edom sbiil a c'ot te Esaú.)

³¹ La sjac' te Jacob: —Jeltic ta chenec' jiche te bila ay ta awenta te bit'il ba alalat atuquele —xi'.

³² La yal te Esaú: —Lajelonix ta wi'nal, ¿bistuc cu'un te bila ay ta jwenta te bit'il ba alalone? —xi'.

³³ La yal te Jacob: —Albon ta jamal ta stojol Dios te bit'il puersa ya awac'bone —la yut. Jich yu'un la yal ta jamal ta stojol Dios te Esaú te bit'il ya yac'bey Jacob te bitic ay ta swenta yich'ele.

³⁴ Te Jacob la yac'bey waj swe' soc chenec', jich we' te Esaú. Laj yo'tan ta we'el-uch'ajel, jajch', loc' bael. Jich ma'yuc sc'oplal c'ot ta yo'tan Esaú te bitic ay ta swenta yich'el te ba alal stuquele.