Génesis 23 - Bible in Tzeltal de Oxchuc y Tenejapa

Laj te Sara

¹ Te Sara juqueb sjucwinic (127) ya'wilal a te c'alal laje.

² Tey laj ta Quiriat-arba, te Hebrón yan sbiil te ay ta sq'uinal Canaán. Te Abraham la yoq'uetay te Sara, bayal la smel yo'tan yu'un.

³ La stejc'an sba jajch'el, ba sc'opon te sts'umbal Het:

⁴ —Te jo'one q'uejel talemon, ma'yucon ta jlumal. Jich yu'un yacuc achonbon jtebuc aq'uinal te banti ya jmuc te mach'a lajem cu'une —xi'.

⁵ Jich yu'un te sts'umbal Het la sjac'beyic sc'op te Abraham:

⁶ —Tatic, aiybon awaiy te bila ya calbat: Bayal ayat ta ich'el ta muc' cu'untic, chican banti ya amulan ya amuc ta muquenal cu'untic te mach'a lajem awu'une. Ma'yuc mach'a bi ya yalbat yu'un —xiic.

⁷ Jich yu'un te Abraham la stejc'an sba jajch'el, la stinan sba ta yalel wocol ta stojol te mach'atic nainemic tey a, ja' te sts'umbal Het.

⁸ Jajch' ta c'op: —Teme yu'un ya awac'bon permiso te ya jmuc te mach'a lajem cu'une, ya me ac'oponbon te Efrón jiche, ja' te snich'an Zohar,

⁹ te yacuc xchonbon te nailch'en Macpela te ay ta sti'il te sq'uinale. Ya me cac'bey te mero stojole, jich me cu'un ya xc'ot te muquenal manchuc me ay ta awolilic —xi'.

¹⁰ Ja'uc me to, te Efrón tey nix ay a te pajal sts'umbal sba soc Het. Jich yu'un te Efrón, te heteo-winique, la sjac'bey sc'op te Abrahame. La yaiyic stojol spisil te sts'umbal Het, soc te mach'a jayeb yacalic ta beel c'axel ta yochibal te lume.

¹¹ Jich la yal: —Manchuc, tatic. Ya cac'bat amajt'anin te jq'uinal soc te nailch'ene. Ya me yaiyic stojol spisil te jlumal te bit'il ya cac'bate. Baan, muca tey a te mach'a lajem awu'une —xi'.

¹² Te Abraham la stinan xan sba ta sit spisil yajwal te q'uinale.

¹³ Spisilic la yaiyic stojol bit'il la sjac'bey sc'op te Efrón: —Wocoluc, aiya me awaiy stojol te bila ya cale. Teme yu'un ya awac'bon te aq'uinale, ya jtojbat. Li' ay to te stojole, ich'a. Ya xba jmuc tey a te mach'a lajem cu'une —xi'.

¹⁴ La sjac' te Efrón:

¹⁵ —Tatic, ya calbat: Jbajc' (400) me ta jsejp plata stojol te jq'uinale, ja'uc me to, ma'yuc swentail. Baan, muca tey a te mach'a lajem awu'une —xi'.

¹⁶ Te Abraham la xchap soc te Efrón. Jich yu'un, la yajtaybey ta stojol sts'umbal Het te jayeb taq'uin albot yu'une, te jbajc' (400) ta jsejp plata, jich nix te bit'il yalal te jsejp plata tey a.

¹⁷ Jich te Abraham la smanbey sq'uinal Efrón, ja' te ch'in sq'uinal te ay ta Macpela, te ay ta stojol sloq'uib c'aal yu'un Mamre. La yich' te q'uinal, soc te nailch'en, soc te jayeb ste'el ta sejpele.

¹⁸ Jich la yu'unin te q'uinale. La yaiyic te sts'umbal Het soc spisil mach'a jayeb yacalic ta beel c'axel tey a ta yochibal te lume.

¹⁹ Te Abraham tey la smuc a te yiname, ja' te Sara, ta nailch'en te ay ta ch'in sq'uinal Macpela ta nopol Mamre te ay ta stojol sloq'uib c'aale, ja' te Hebrón yan sbiil te ay ta sq'uinal Canaán.

²⁰ Jich te Abraham la yich' te q'uinal soc te nailch'ene, ja' la smuquenalin te q'uinal chonbot yu'un te sts'umbal Het.