Génesis 11 - Bible in Tzeltal de Oxchuc y Tenejapa

Muc'ul toyol ts'ajc' ta Babel

¹ Pajal sc'opic spisil ants-winiquetic ta balumilal, jun nax sc'opic.

² Ja'uc me to, loq'uic tel ta stojol sloq'uib c'aal, c'o staic muc'ul spamlej q'uinal ta Sinar, tey c'otic ta nainel a.

³ Jich la yalbey sbaic: —Ja' lec jpastic ladrillo, ya jchic'tic ta c'ajc' —xiic. Ja' ton c'ot yu'unic te ladrillo, soc ja' mescla c'ot yu'unic te xuch' te stuquel ya xloc' ta lumq'uinale.

⁴ Soc jich la xchajbanic: —La'ic jpastic muc'ul lum, soc ya me jpastic jun muc'ul toyol ts'ajc' te bayal ta caj moel, c'alal ta ch'ulchan ya xc'ot cu'untic. Ja' lec muc' ac'a c'otuc jc'oplaltic, ma me xpujc'otic bael ta spamal balumilal —xiic.

⁵ Te Cajwaltic coj tel yil te muc'ul lum soc te muc'ul toyol ts'ajc' te yacalic ta spasel te winiquetique.

⁶ Jich la yal te Cajwaltique: “Jun nax te lume, soc jun nax sc'opic ta spisilic. Jajch'iquix ta at'el, ma'yuc mach'a ya xju' ya xcomotic yu'un ta spasel bitic la snopix ta yo'tanic spasel.

⁷ Jich yu'un ja' lec coucotic bael, ya jc'atp'unbeytic sc'opic, swenta yu'un jich ma xyaiybey sbaic sc'opic juju-jtul”, xi' te Cajwaltique.

⁸ Jich la spuc bael te ants-winiquetic ta spamal balumilal te Cajwaltique. Quejch'aj ta pasel yu'unic te muc'ul lum te c'an spasique.

⁹ Ja' swentail te bit'il Babel sbiil c'ot te lume, yu'un Dios la sc'atp'unbey sc'opic spisil ants-winiquetic, soc la spuc bael ta spamal balumilal.

Cajalcaj sts'umbal Sem

¹⁰ Jich ay te lista yu'un sts'umbal Sem: Xchebalix ja'wil xc'axel pulemal a, ay jo'winic (100) ya'wilal te Sem c'alal ayin snich'an te Arfaxad sbiile.

¹¹ Jo'winic xcha'bajc' (500) ja'wil cuxin xan te Sem c'alal ayinemix a te Arfaxad, soc ay yantic snich'nab, queremetic soc ach'ixetic.

¹² Ay jo'lajuneb xcha'winic (35) ya'wilal te Arfaxad c'alal ayin snich'an te Sala sbiile.

¹³ Patil te bit'il ayinemix a te Sala, oxeb xcha'bajc' (403) ja'wil cuxin xan te Arfaxad, soc ay yantic snich'nab, queremetic soc ach'ixetic.

¹⁴ Ay lajuneb xcha'winic (30) ya'wilal te Sala c'alal ayin snich'an te Heber sbiile.

¹⁵ Patil te bit'il ayinemix a te Heber, oxeb xcha'bajc' (403) ja'wil cuxin xan te Sala, soc ay yantic snich'nab, queremetic soc ach'ixetic.

¹⁶ Ay chanlajuneb xcha'winic (34) ya'wilal te Heber c'alal ayin snich'an te Peleg sbiile.

¹⁷ Patil te bit'il ayinemix a te Peleg, lajuneb xcha'winic xcha'bajc' (430) ja'wil cuxin xan te Heber, soc ay yantic snich'nab, queremetic soc ach'ixetic.

¹⁸ Ay lajuneb xcha'winic (30) ya'wilal te Peleg c'alal ayin snich'an te Reu sbiile.

¹⁹ Patil te bit'il ayinemix a te Reu, baluneb sbuluchwinic (209) ja'wil cuxin xan te Peleg, soc ay yantic snich'nab, queremetic soc ach'ixetic.

²⁰ Ay lajchayeb xcha'winic (32) ya'wilal te Reu c'alal ayin snich'an te Serug sbiile.

²¹ Patil te bit'il ayinemix a te Serug, juqueb sbuluchwinic (207) ja'wil cuxin xan te Reu, soc ay yantic snich'nab, queremetic soc ach'ixetic.

²² Ay lajuneb xcha'winic (30) ya'wilal te Serug c'alal ayin snich'an te Nacor sbiile.

²³ Patil te bit'il ayinemix a te Nacor, lajunwinic (200) ja'wil cuxin xan te Serug, soc ay yantic snich'nab, queremetic soc ach'ixetic.

²⁴ Ay baluneb xcha'winic (29) ya'wilal te Nacor c'alal ayin snich'an te Taré sbiile.

²⁵ Patil te bit'il ayinemix a te Taré, balunlajuneb swacwinic (119) ja'wil cuxin xan te Nacor, soc ay yantic snich'nab, queremetic soc ach'ixetic.

²⁶ Ay lajuneb xchanwinic (70) ya'wilal te Taré c'alal ayin snich'nab: Abram te jtule, Nacor te yane, soc Harán te yane.

Sts'umbal Taré

²⁷ Jich ay te lista yu'un te sts'umbal Taré: ja' snich'nab Taré te Abram, Nacor soc te Harán. Ja' snich'an Harán te Lot sbiile.

²⁸ Ja' neel laj bael te Harán, te snich'an Taré, tey nix ta bay ayine, ta bay Ur ta sq'uinal caldeoetic.

²⁹ Te Abram nujbin soc te Sarai. Te Nacor nujbin soc te Milca. Ja' yantsil-nich'nab Harán te Milca soc te Isca.

³⁰ Ja'uc me to, ma x'alaj te Sarai, ma'yuc jtuluc yal.

³¹ Te Taré la yic' bael te snich'ane, ja' te Abram, soc te xch'in mam, ja' te Lot te snich'an Harán, soc te yalibe, ja' te Sarai te yinam Abram. Loq'uic bael ta Ur te ay ta sq'uinal caldeoetic, c'an bajt'uquic ta sq'uinal Canaán. Ja'uc me to, ja' nax c'otic ta lum Harán, tey c'otic ta nainel a.

³² Ay jo'eb sbuluchwinic (205) ya'wilal te Taré c'alal laj, tey laj ta lum Harán.