Ester 8 - Bible in Tzeltal de Oxchuc y Tenejapa

Chajbaj xc'uxtayel judioetic

¹ Ja' nix ta yorail a, te muc' ajwalil Asuero la sq'uebanbey te antsil-ajwalil Ester te sna Amán te scontro te judioetique. Te Mardoqueo ac'bot stejc'an sba ta stojol te muc' ajwalile, melel neel to yalojbey te Ester te snich'an stajun te Mardoqueo.

² Te muc' ajwalil la sloq'ues te xch'ocow swenta sello te la yich'bey sujt'el te Amán, ja' la yac'beyix te Mardoqueo. Jich te Ester la yac'bey yat'el ta administrador ta swentainel te biluquetic yu'un Amán ta neelal toe.

³ Ta patil te Ester la xcha'c'opon xan te muc' ajwalile, la spajc'an sba ta ye'tal yacan, soc yac ta oq'uel. La yalbey wocol te yacuc yal mandal te ya yich' jinel te sbol mandal Amán, soc te manchuc ya xc'ot ta pasel te bila chapal yu'un ta swenta slajinel te judioetique.

⁴ Te muc' ajwalil la stoy bael ta stojol Ester te sbastón pasbil ta oro. Te Ester jajch', la stejc'an sba ta stojol te muc' ajwalile,

⁵ jich la yal: —Teme lec ya awaiy te bila ya cal ta atojol te ja'at te muc' ajwalilate, soc teme stojil ya awaiy te bila ya jc'ane, soc teme mero melel te ac'anojone, te lecon ta asite, soc teme lecon ta awo'tan te ja'at te muc' ajwalilate, ac'a yich' ts'ibuyel jun te banti ya yich' aq'uel mandal te ya xlaj sc'oplal te bila la yal ta carta te Amán, ja' te banti la yal mandal te ya yich'ic lajinel ta jc'axel te judioetic ayic ta juju-jpam q'uinal te bay c'alal awu'uninej ta mandalteswaneje.

⁶ Melel ¿bit'il ya xju' cu'un te ya quil te bila wocolil yac ta talel ta stojol te jlumale, soc te jc'axel ya yich' lajinel te mach'atic ay cu'une? —xi' te Ester.

⁷ Te muc' ajwalil Asuero, la sutbey te sc'op te antsil-ajwalil Ester, soc te Mardoqueo te judio-winique, jich la yal: —Te jo'one la cac'beyix Ester te sna Amán, melel la yich'ix jijp'anel ta te' ta scaj te ya sc'an yac' ta lajel te judioetique.

⁸ Yo'tic, ya cac'beyex permiso swenta yu'un ya apasic cartaetic ta swenta jbiil jo'on. Ya xju' ya ats'ibuyic ta jun te bila ya amulanic te yutsil-slequil ya xc'ot ya awaiyic a te judioetique. Ac'beyaic sello te cartaetic, ja' xatuuntesic te sello cu'un te muc' ajwalilone —xi'. (Te jun carta yich'oj pasel ta swenta te muc' ajwalile, soc teme ja' nix yich'oj te sello yu'une, mero ma xju' ta lajinel sc'oplal.)

⁹ Te secretarioetic yu'un te muc' ajwalil ora la yich' iq'uel tel, ta oxeb xcha'winic (23) c'aal a te yoxebal u, o ja' nix te u Siván. Spisil te bila la yal te Mardoqueo, la yich' ts'ibuyel bael ta stojol te judioetique, te ajwaliletic ta juju-jpam q'uinal soc ta juju-jsejp q'uinal, soc te yantic mach'atic yich'oj yat'elic te ayic ta juqueb sjucwinic (127) ta jpam q'uinal te jajch'em tel ta India, c'oem to c'alal ta Etiopía. La yich'ic ts'ibuyel ta sc'opic nix soc ta sletraic nix.

¹⁰ Te cartaetic ja' la yich' pasel ta swenta te muc' ajwalil Asuero, soc ac'bot yich' te sello yu'une. Jich la yich' ticunel ta correoetic te moemic ta caballoetic te mero ya x'animajique, te ja' nix te caballoetic yu'un te muc' ajwalile.

¹¹ Te muc' ajwalil la yalbey mandal ta carta te judioetique, te bayuc lumil te banti nainemique, ac'a stsob sbaic ta scoltayel sbaic ta sc'abic te scontroique. Ac'a smilic, ac'a slajinic ta jc'axel, soc ac'a yich'beyic spisil sbiluquic te mach'atic yich'ojic yat'ejibic yu'un guerra, te bayuc lumil o bayuc q'uinal te ya x'ac'botic guerra yu'unique. Ma me ayuc ta ich'el ta wenta antsetic ni alaletic.

¹² Spisil in to, jun nax me sc'aalelal ya yich' pasel spisil te banti c'alal te pamalpam q'uinal swentainej te muc' ajwalil Asuero. Te bi c'aal albile, ja' ta oxlajuneb te slajchayebal u, o ja' te u Adar.

¹³ Jun cópia yu'un te mandal la yich' puquel ta alel swenta jun ley te ya yich' aq'uel ta na'el ta lumetic soc ta pamalpam q'uinaletic, swenta yu'un ya me xchajban sbaic te judioetic ta c'aal in to, yu'un jich me ya xju' yu'unic a te ya sutbeyic spacol ta stojolic te scontrotaque.

¹⁴ La yal mandal te muc' ajwalil te ora ya xbajt'ic te correoetique. Jich bajt'ic ta ora, ja' moic bael a te caballoetic yu'un te muc' ajwalile. Soc la yich' puquel ta alel ta sjoyob ts'ajc'ubil centro yu'un te lum Susa te mandal la yich' chajbanele.

¹⁵ Te Mardoqueo loc' jajch'el ta spalacio te muc' ajwalil, slapoj najt'il c'u'il te ay syaxal soc te ay saquil swenta sc'u' muc' ajwalil, soc jun muc'ul corona pasbil ta oro soc jun smeyil pac' pasbil ta lino soc púrpura. Spisil te yajwal te lum Susa jajch'ic ta aw swenta sbujts' q'uinal la yaiyic.

¹⁶ Te judioetic jul saquil q'uinal ta stojolic la yaiyic, tal sbujts' yo'tanic, ay sbujts' q'uinal la yaiyic, soc tal smuc'ul q'uinal la yaiyic yu'un.

¹⁷ Ta spisil ta jpam q'uinal, lumetic, soc te banti c'ot te c'op chapal yu'un te muc' ajwalile, te judioetic tal bayal sbujts' yo'tanic soc sbujts' q'uinal la yaiyic yu'un. La stsob sbaic ta we'el swenta q'uin. Te yajwal te lumq'uinal tsobol la yac' sbaic ta judioil, ta scaj te u'uninotic yu'un xiwel te bit'il la xi'ic te judioetique.