Ester 7 - Bible in Tzeltal de Oxchuc y Tenejapa

Laj ta milel Amán

¹ Te muc' ajwalil soc te Amán bajt'ic ta we'el swenta q'uin.

² Ta xchebal buelta ja' nix c'opoj te muc' ajwalil ta yorail uch'bajel swenta q'uin, jich la yalbey te antsil-ajwalil Ester: —C'anbon me te bila ya ac'ane, ya me cac'bat, manchuc me ya ac'anbon oliluc te lumetic te bay c'alal jwentainej ta mandalteswaneje —xi'.

³ La sjac' te Ester: —Te ja'at te muc' ajwalilate, teme lecon ta asit, teme c'uxon ta awo'tan, soc teme lec ya awaiybon te jc'ope, te bila mero ya sc'an co'tan ya jc'anbate, ja' te yacuc apasbon perdón soc te xcuxlejalic te jlumale, yu'un ja'at te muc' ajwalilate.

⁴ Melel te jo'on soc te jlumale quich'ojtic chonel swenta yu'un jc'axel ya yich' tup'el jts'umbaltic. Te lajuc quich'tic chonel swenta mozoile, ma'yuc bi ya cal yu'un te jichuque, ja'uc me to, te jcontroe ya ma xch'aybat bayal te bila ay awu'un te muc' ajwalilate —xi'.

⁵ Te Asuero la sjojc'o: —¿Mach'a a, soc banti ay te mach'a xchapoj ya spas in to? —xi'.

⁶ —¡Te jcontrotique, te jlajinwanej cu'untique, ja' te bol-o'tan Amán in to! —xi' te Ester. C'alal la yaiy te Amán, nijc' yu'un xiwel ta stojol te muc' ajwalil, soc ta stojol uuc te antsil-ajwalile.

⁷ Te Asuero mero bayal ilinem yo'tan a jajch' bael. La yijq'uitay jilel te yut na te banti yacal ta we'el swenta te q'uine, loc' bael ta nichimaltic te bay sti' spalacio. Pero te Amán la sna' te ayix ta yo'tan te muc' ajwalil te ya x'ac'ot ta lajel yu'une, ja' yu'un jil ta yutil na, yac ta yalel wocol ta stojol te antsil-ajwalil Ester te manchuc ya x'ac'ot ta lajele.

^8-9 Te c'alal sujt' tel ta nichimaltic te muc' ajwalile, och bael ta yut na ta banti yacalic ta we'el swenta te q'uine, la yil te Amán, quejel ta stojol te Ester ta banti metsele. Jich la yal: —¡A! ¿Yu'un bal ya ac'an ya awuts'inbon ta jsit te antsil-ajwalil li' ta jna jiche? —xi'. Te bi ora jich la yal te muc' ajwalile, te jcananetic yu'un la smacbeyic sit te Amán. Te jtul yabat te ajwalil te Harbona sbiile, jich la yal: —Ta sna te Amán ay chapalix jun te', ay wan cheb xcha'winic (22) metro snajt'il, te ja' nix te Amán la yac' ta pasel yu'un ya yac' ta jijp'anel sc'oplal a te Mardoqueo, ja' te winic te mero lec bila la spas ta atojol te ja'at te muc' ajwalilate —xi'. —Jijp'anaic tey a jiche —xi' smandal te muc' ajwalile.

¹⁰ Ja' yu'un te Amán, tey jijp'anot ta te' te la xchajban yu'un ja' c'an sjijp'an a te Mardoqueo. Tey lamaj a te slab yo'tan te muc' ajwalile.