Ester 6 - Bible in Tzeltal de Oxchuc y Tenejapa

Lec c'ot Mardoqueo

¹ Ta ajc'ubal in to, te muc' ajwalil ma xtal swayel la yaiy. Ja' yu'un la sticun ta ich'el tel te libro te banti yich'oj ts'ibuyel te bitic mero tulanic sc'oplal c'oemic ta pasel ta nación, swenta yu'un ya yich' ilel ta stojol.

² Tey la staic a te albil sc'oplal te Mardoqueo te la yaiy te bila la xchapic ta swenta smilel muc' ajwalil Asuero te Bigtán soc Teres, te ja'ic te jcananetic yu'un te muc' ajwalile.

³ Te muc' ajwalil la sjojc'obey: —¿Bi smajt'an staoj te Mardoqueo, soc bi seña yich'el ta muc' staoj yu'un te bila la spasbone? —xi'. —Mero ma'yuc, ni jxujt'uc —xiic te abatetic yu'une.

⁴ Ja' yorail a och bael te Amán ta amac' te c'oem c'alal ta spalacio ta banti ay te muc' ajwalil, swenta yu'un ba sc'an te ya yich' jijp'anel te Mardoqueo ta te' te la yaq'uix ta pasele. —¿Mach'a ay ta amac'? —xi' ta sjojc'oyel te muc' ajwalile.

⁵ —Ja' te Amán —xiic ta sjaq'uel te abatetique. —Ac'aic c'axel tel —xi'.

⁶ Och bael te Amán, jojc'obot yu'un te muc' ajwalile: —¿Bi ya sc'an ya yich' pasel te mach'a ya yac' ta ich'el ta muc' te muc' ajwalile? —la yut. Te Amán la yal ta yo'tan: “¿Mach'a yan te ya yac' ta ich'el ta muc'? Jo'on abi”, xi'.

⁷ Ja' yu'un jich la yal: —Te winic ya awale,

⁸ ya me sc'an te ya yich' leel te snajt'il c'u' ta swenta te muc' ajwalil, soc jcojt' caballo te ya xmo a te muc' ajwalil yu'une, soc ya yich' aq'uel ta sjol jun corona swenta muc' ajwalil.

⁹ Te najt'il c'u'il soc te caballo ya me yich' aq'uel ta sc'ab jtul winic te mero muc' sc'oplal yu'un te ajwalile, swenta yu'un ja' me ya yac'bey slap sc'u' te mach'a ya sc'an te ya awac' ta ich'el ta muc' te ja'at muc' ajwalilate, soc te ya yac' beenuc ta caballo ta plaza yu'un te lume, soc jich ya yal ta aw ta stojol te c'alal snitoj ta beel a te scaballoe: “¡Jich ya sc'an pasel te winic te la yac' ta ich'el ta muc' te muc' ajwalile!”, ac'a xiuc ta aw —xi' te Amán.

¹⁰ Te muc' ajwalil jich la yalbey te Amán: —Suja me aba jiche, ich'a te najt'il c'u'il soc te caballo, jich te bit'il la awalixe. Mero jich me xba apasbey ta stojol te judio Mardoqueo, ja' te nacal ta yochibal jpalacio. Ts'acal me xawac' c'otuc ta pasel ta stojol spisil te bitic la awalixe —xi' sc'oplal.

¹¹ Te Amán la stsac te najt'il c'u'il soc te caballo, la yac'bey slap te Mardoqueo. La smojt'es bael ta caballo, la snit bael ta plaza yu'un te lume, jich yacal ta yalel ta aw ta stojol: “¡Jich ya sc'an pasel te winic te la yac' ta ich'el ta muc' te muc' ajwalile!” xi' ta aw te Amán.

¹² Te c'alal laj yo'tan ta aq'uel ta beentesel te Mardoqueo, cha'bajt' xan ta naclej ta yochibal spalacio te muc' ajwalile. Te Amán ora bajt' ta sna, ay bael ta mel-o'tan soc smacoj yelaw.

¹³ La yalbey yaiy te yinam soc te yamigotac ta spisil te bila c'ot ta pasele, jich albotic yu'un: —Teme sts'umbal judio te Mardoqueo, te ma'yuquix awat'el yacat ta c'oele, ma xju' awu'un stsalel. Puersa me ja'at mero tsalbil ya xc'oat —xiic.

¹⁴ Ma to xlaj yo'tanic ta c'op a, c'otic te abatetic yu'un te muc' ajwalil, yu'un ja' c'ot ta iq'uel bael ta ora ta we'el swenta q'uin xchajpanej te antsil-ajwalil Ester.