Ester 5 - Bible in Tzeltal de Oxchuc y Tenejapa

Bajt' ta stojol muc' ajwalil te Ester

¹ C'alal c'ax oxeb c'aal, te Ester la slap te sc'u' swenta antsil-ajwalile. Och bael ta yamaq'uil ta yutil spalacio te muc' ajwalil, ba stejc'an sba ta stojol sala ta banti nacal ta smuc'ul nactijib te muc' ajwalile.

² Te c'alal ilot yu'un te muc' ajwalil te ayix ta amac' te antsil-ajwalil Ester, bin nax yo'tan ta stojol, la stuchbey yil te sbastón pasbil ta oro yich'oj ta sc'abe. Te Ester noptsaj bael, la spicbey sjol te bastón te pasbil ta oroe.

³ Jojc'obot yu'un te muc' ajwalile: —¿Bi ya apas, antsil-ajwalil Ester? ¿Bi ya ac'an? Manchuc me ya ac'anbon oliluc te lumetic bay c'alal jwentainej ta mandalteswaneje, ya me cac'bat —xi'. La sjac' te Ester:

⁴ —Teme lec ya awaiye, muc' ajwalil, ya calbat wocol te yacuc xbaat ta we'el yo'tic te jchajbanej ta swenta awich'el ta muq'ue, soc te yacuc awic' bael uuc te Amán —xi'. Te muc' ajwalil la sticun ta leel te Amán:

⁵ —Baan leaic ta ora te Amán. Ac'a c'otuc ta pasel te bi ya smulan yo'tan te antsil-ajwalil Ester —xi'. Jich bajt'ic ta we'el-uch'el te muc' ajwalil soc te Amán te chapal yu'un te Estere.

⁶ Te bi ora stsoboj sbaic ta we'el-uch'el ae, c'opoj te muc' ajwalile, jich la yalbey te Ester: —C'anbon me te bi ya ac'ane, manchuc me ya ac'anbon oliluc te lumetic bay c'alal jwentainej ta mandalteswaneje, ya me cac'bat —xi' te muc' ajwalile.

⁷ La sjac' te Ester: —Ja' nax co'tan ya jc'anbat in to:

⁸ teme lecon ta asit, teme lecon ta awo'tan te ja'at te muc' ajwalilate, teme ya apasbon te bila ya smulan te co'tane, soc teme ya awac'bon te bila ya jc'anbate, ya me xcha'talat pajel soc te Amán ta we'el yan buelta te chapal cu'un swenta awich'el ta muq'ue. Tey me ora ya jc'anbatix a te bila la awalbone —xi' te Ester.

Amán la xchajban te' te banti ya yich' jijp'anel moel te Mardoqueo

⁹ Te Amán loc' jajch'el tey ta banti we'-uch'ique, bin nax yo'tan soc buen nojel xch'ujt'. Pero c'alal la yil te Mardoqueo te ay ta yochibal spalacio te muc' ajwalile, soc te ma ba la stejc'an sba, soc ma ba la stij sba ta ilel yu'un te c'alal c'ax tey ae, mero ilin yo'tan yu'un.

¹⁰ Pero ma ba la yac' sba ta na'el ta yorail te jajch'em slab yo'tane. Yan te c'alal c'ot ta snae, la sticun ta iq'uel tel te yamigotac soc te Zeres, ja' te yiname.

¹¹ La yalbey sc'oplal te bayal sc'ulejale, soc te snich'nab te mero bayalixe, soc te bit'il mero toyesbot sc'oplal yu'un te muc' ajwalile, te ma pajaluc sc'oplal soc te yantic j'at'eletic soc te yantic abatetique te bit'il ja' mero toyol yat'el c'ot ta stojol ta spisil te yantique.

¹² Soc la yal xan: —Jo'on nax te ic'bilon yu'un te antsil-ajwalil Ester ta we'el, swenta q'uin te la xchajbanbey te muc' ajwalil te naxe. Soc la xcha'ic'on xan ta we'el swenta pajel, te chapal xan te ya yac'bey xan te muc' ajwalile.

¹³ Pero spisil in to, ma'yuc sc'oplal ta co'tan te c'alal ya quil te judio Mardoqueo, te nacal ta yochibal spalacio te muc' ajwalile —xi'.

¹⁴ Jich te yinam soc ta spisil te yamigotac jich albot yu'un: —Ticuna ta pasel junuc te', te ay cheb xcha'winic (22) metro snajt'ile. Pajel ta sab ya ac'anbey te muc' ajwalil te ya yich' jijp'anel moel a te Mardoqueo. Jich me jun awo'tan ya xbaat ta we'el swenta q'uin soc a te muc' ajwalil —xiic. Te c'op in to la smulan te Amán, jich la sticun ta pasel te te'e.