Ester 4 - Bible in Tzeltal de Oxchuc y Tenejapa

La smel yo'tan judioetic

¹ Te c'alal la yaiy te Mardoqueo te bila c'otix ta pasel, la xch'i' sc'u' swenta seña mel-o'tan, la slap ch'ixal pac' soc la smojt'es tanul c'ajc' ta sjol. Jajch' sbeentay te lume, yac ta tulan aw soc xc'uxul mel-o'tan.

² Jich c'ot c'alal ta yochibal spalacio te muc' ajwalil, pero ma x'ac'ot ochel tey a te mach'a slapoj ch'ixal paq'ue.

³ Soc ta spisil ta juju-jpam q'uinal te banti c'ot sc'op soc te smandal te muc' ajwalile, bayal la smel yo'tanic te judioetique. La scom swe'elic, oq'uic, bic'tal-c'opojic, ay tsobolic la smejts'an sbaic ta stanul c'ajc' soc la slapic ch'ixal pac', jich la yaq'uic ta ilel te smel-o'tanique.

La yac' sba a te Ester

⁴ Te criadaetic yacalic ta abatinel yu'un te antsil-ajwalil Ester, soc te soldadoetic chapalic yu'un ya xcanantayot yu'une, la yalbeyic yaiy te Ester te bila yac ta c'oel ta pasele. Te antsil-ajwalil bayal la smel yo'tan yu'un, jich la sticunbey c'u'il yu'un ya slap te Mardoqueo, swenta yu'un ya sjeltay a te ch'ixal pac' slapoje, pero te Mardoqueo ma ba la sc'an la yich'.

⁵ Te Ester la yic' te Hatac, te ja' jcanan yu'un te muc' ajwalile, la sticun bael yu'un ya xba yil te Mardoqueo, yu'un ya sjojc'obey bila yac ta c'oel ta pasel, soc te bi yu'un te jich ya spase.

⁶ Te Hatac ba sc'opon te Mardoqueo te ay ta plaza yu'un te lume, te sitinej sba soc te yochibal spalacio te muc' ajwalile.

⁷ Te Mardoqueo la xcholbey yaiy spisil te bitic aye, soc la yalbey te jayeb plata yaloj ya yac'bey muc' ajwalil te Amán, ta swenta te bit'il jc'axel ya yich'ic lajinel te judioetique.

⁸ Soc la yac'bey jun cópia yu'un te sjunal te pujq'uemix ta alel ta Susa ja' te mandal te ya yich'ic lajinel ta jc'axel te judioetic, swenta yu'un ya yac'bey te Ester. Jich me ya sna' spisil a te bila ay ta pasele. Soc la yalbey te yacuc spas wocol te ya xba sta ta c'op te muc' ajwalil, te yacuc yalbey wocol te ya xc'opoj yu'un te slumale.

⁹ Te Hatac sujt' tel ta stojol te Ester, jul yalbey spisil te bila albot yu'un te Mardoqueo.

¹⁰ Te Ester la xcha'ticun xan bael te Hatac, yu'un ya yich'bey xan sujt'el sujt'ib te sc'op Mardoqueo:

¹¹ Jich la yal: “Ta spisil te mach'atic ayic ta abatinel yu'un te muc' ajwalil, soc nix te yajwal te juju-jpam q'uinal swentaineje, sna'ojic te ay jun ley te ya yac' ta lajel spisil antsetic o winiquetic te ya x'ochic bael ta yamaq'uil ta yutil te spalacio te muc' ajwalile, swenta yu'un ya xba yil te muc' ajwalil, teme ma ja'uc la sticun ta iq'uele. Ja' teme ma ba ya stuch ta ilel te sbastón pasbil ta oro ta stojol te mach'a ya x'och swenta seña te lec ta o'tanil, soc te ya spasbot perdón, te ma ba ya x'ac'ot ta lajele. Yan te jo'one, ayix lajuneb xcha'winic (30) c'aal te ma ba yic'ojon te muc' ajwalile”, xi' te sujt'ibe.

¹² Te c'alal la yaiy te Mardoqueo te sujt'ib sc'op te Ester,

¹³ la sticunbey xan bael ta stojol te c'op in to: “Ma me xacuy te scaj te ayat ta spalacio muc' ajwalil, te ja'at xanix ya xcolat jilel, te bit'il judia-antsate.

¹⁴ Teme ma ba ya xc'opojat yo'tic, teme ma'yuc bi ya awale, te scoltayel te judioetic ya me xtal ta yan parte, pero te ja'at soc te mach'atic ay yu'un te atate ya me xlajex. Repente ja' swentail te ochat ta antsil-ajwalil yu'un te ya acoltayotic ta wocole”, xi'.

¹⁵ Te Ester jich la sut te c'op ta stojol te Mardoqueo:

¹⁶ “Baan tsoba spisilic te judioetic ayic ta Susa, albeya ac'a scom swe'elic cu'un. Ma me ayuc bi ya swe' yuch'ic oxeb c'aal soc oxeb ajc'ubal. Jo'on soc te criadaetic cu'une jich me ya jpastic uuc. Ta patil ya me xba quil te muc' ajwalile, manchuc me ma jichuc ya yal te leye. Teme ya smilon a, ac'a smilon”, xi'.

¹⁷ Jich te Mardoqueo ba spas spisil te bila albot yu'un te Ester.