Ester 3 - Bible in Tzeltal de Oxchuc y Tenejapa

Mardoqueo soc Amán

¹ C'ax c'aal ta patil, te muc' ajwalil Asuero la stoyesbey yat'el te Amán, te snich'an Hamedata, patil alnich'an yu'un Agag. La yac'bey yat'el ta sbabial jwolwanej yu'un te nacione.

² Spisil te abatetic yu'un muc' ajwalil te ayic ta spalacio, ya squejan sbaic soc ya stinan sbaic ta stojol Amán te c'alal ya xc'axe, o teme teq'uelic ta stojole, melel jich yaloj mandal te muc' ajwalile. Pero te Mardoqueo ma ba la sc'an la xch'uun stuquel te mandale.

³ Te sjo'tac ta at'el te muc' ajwalil la sjojc'obeyic te Mardoqueo te bi yu'un te ma ba ya xch'uunbey smandal te muc' ajwalile.

⁴ Ta spisil ora ta jujun c'aal jich ya sjojc'obeyic, pero ma'yuc sc'oplal ta yo'tan ya yaiy. Ja' yu'un ba yalbeyic yaiy te Amán, swenta yu'un ya me yilic teme ma ba ya sut sc'op te Mardoqueo, melel albotiquix yu'un a te judio-winic stuquele.

⁵ Te c'alal la sna' ta lec te Amán te ma ba ya squejan sba soc ma ba ya stinan sba te Mardoqueo te c'alal ya xc'axe, mero ilin yo'tan yu'un.

⁶ Soc albot te Amán te bit'il judio-winic te Mardoqueo, ja' yu'un la snop te ma tic'uc a te ya yac'bey castigo ta stuquel te Mardoqueo. Jich jajch' snop xan ta lec bi ya yut ya slajin ta spisil ta jc'axel te judioetic nainemic ta q'uinal yu'uninej te Asuero.

Chajbaj c'op yu'un ya xlaj judioetic

⁷ Ta u swenta xjajch'ibal ja'wil, ja' nix te u Nisán, ta slajchayebal ja'wil yochel ta muc' ajwalil a te Asuero, la spasbeyic snúmeroil ta na'el ta stojol te Amán, swenta yu'un ya yich' na'el te bi c'aalil soc te bi uil te ya xju' ya spas te bila chapal yu'une. Ja' loc' te yoxlajunebal c'aal te slajchayebal u, ja' nix te u Adar.

⁸ Ja' yu'un te Amán jich la yalbey te muc' ajwalil Asuero: —Ta spisil te lumetic te smacoj te juju-jpam q'uinal awu'uninej ta mandalteswanej, ja'at te muc' ajwalilate, ay jtsob te parte yac'oj sba ta stojol te yantique. Ay leyetic yu'un te ma pajaluc soc te yu'un te yantic lumetique, soc ma sc'an spas te bila mandal awaloj te ja'at te muc' ajwalilate. Ma lecuc te ya x'ainic xan ta atojol tey ta banti ya spasawanat ta mandale.

⁹ Ja' yu'un teme lec ya awaiy ja'at te muc' ajwalilate, puca ta alel jun mandal awu'un te banti ya yal mandal te jc'axel ya yich' lajinele. Te jo'one ya me cac'bey ta sc'abic te j'at'eletic ta banti ya yich' tsobel pataniletic waclajuneb soc olil tonelada plata, yu'un ya x'och ta yawil staq'uin muc' ajwalil —xi'.

¹⁰ Jich te muc' ajwalil la sloq'ues ta sc'ab te xch'ocow swenta sello, la yac'bey te Amán, te scontro te judioetique.

¹¹ Jich la yalbey: —Te plata ya awale, ya me xju' ya awich' te ja'ate. Jich te lum ya awale, pasbeya te bila ya amulan spasbeyele —xi'.

¹² Ta yoxlajunebal c'aal a te u swenta xjajch'ibal te ja'wile, la yich'ic iq'uel te secretarioetic yu'un muc' ajwalil. Ja'ic la sts'ibuyic te smandal te Amán, ja' te la sticunbey ta stojolic te ajwaliletic ta juju-jpam q'uinal soc te mach'atic yich'oj yat'elic ta jujun nación swentainej te muc' ajwalile. Te mandaliletic in to la yich' ts'ibuyel ta sletraic nix, soc ta sc'opic nix te juju-jpam q'uinal soc te jujun lume. La yich' pasel ta swenta te muc' ajwalil Asuero, soc la yich' te sello yu'un te muc' ajwalile.

¹³ Ora la yich' puquel bael ta correo ta stojolic te juju-jsejp q'uinaletic yu'un te ajwalile. Te june tey ya yal a te mandal te jc'axel ya yich'ic lajinel te judioetic, ta jun nax c'aal ya xlaj ta spisilic te judioetique, me'eletic, mamaletic, queremetic, ach'ixetic, alaletic soc ta spisil antsetic; soc ya me yich'beyic spisil te biluc yu'unique. Te bila c'aalil yich'oj chapel ya xc'ot ta pasele, ja' ta yoxlajunebal te slajchayebal u, o ja' te u Adar.

¹⁴ Te scopiaul te mandal in to, la yich' puquel ta alel, jich bit'il jun ley te la yich' aq'uel sna'ic ta spisil ta jpam q'uinal soc ta spisil lumetic, swenta yu'un ya me xchajban sbaic a te c'alal ya xc'ot sc'aalelal.

¹⁵ Te correoetic ora nax bajt'ic ta ticunel yu'un te muc' ajwalil, soc la yich' puquel ta alel ta joyob ts'ajc'ubil centro yu'un te lum Susa. Jich te muc' ajwalil soc te Amán jun yo'tan nacajtic ta uch'bajel, pero ta Susa jajch' ta woclajel te yo'tanique.