Ester 2 - Bible in Tzeltal de Oxchuc y Tenejapa

Ester la yich' tsael yu'un ya x'och ta antsil-ajwalil

¹ Te muc' ajwalil Asuero, c'alal c'axix jtebuc c'aal a, soc c'alal lamalix q'uinal la yaiy a, la sna' te Vasti soc te bi la spase, soc te bila mandalil la yich'ix pasel ta stojol ta swenta controinel.

² Jich ora ay bi albot yu'un te abatetic yu'une: —Te muc' ajwalil ya me sc'an te ya yich' leel mero ach'ixetic te mero t'ujbilique.

³ Ac'a yich' tsael abatetic ta juju-jpam q'uinal te swentainej te muc' ajwalile, ac'a sleic ach'ixetic ta banti ayique, swenta yu'un ya me x'och ta swentaic yiq'uel tel te ach'ixetique. Ya me xjul yaq'uic ta spisilic ta sna antsetic yu'un te muc' ajwalil te ay ta joyob ts'ajc'ubil centro yu'un te lum Susa, ac'a ochuc ta swenta scanantayel te Hegai, ja' te winic te jun yo'tan ta stojol te muc' ajwalil, soc te ay ta swenta scanantayel te antsetic yu'une. Te Hegai ac'a yac'bey te bitic ya xchajban st'ujbilalic ta lec a te ach'ixetique.

⁴ Te mach'a ach'ixil te mero ya smulan te muc' ajwalile, ac'a ochuc ta antsil-ajwalil. Ja' ac'a ochuc sjelolin te Vasti —xiic. Te bila la yich' alele, la smulan te muc' ajwalile. Jich nix la yich' pasel a.

⁵ Ta joyob ts'ajc'ubil centro yu'un lum Susa tey nainem jtul judio-winic a, Mardoqueo sbiil te winique, snich'an Jair. Ja' sts'umbal te Simei soc Cis, te ja' sts'umbalic te Benjamín.

⁶ Ja' sjoinej te tsobol judioetic te ac'bot yijq'uitayic Jerusalén yu'un te muc' ajwalil Nabucodonosor, te ja' sjoinejic bael te Jeconías te muc' ajwalil ta Judá.

⁷ Te Mardoqueo ay jtul yantsil-nich'an stajun te la swentaine, yu'un laj sme'-stat te ach'ixe, jich jil ta me'bal. Te Mardoqueo la yic' ta stojol, jich c'ot te bit'il te mero yantsil-nich'an. Hadasa sbiil te ach'ixe, o Ester yan sbiil, mero buen t'ujbil soc buen lec ta ilel.

⁸ Te c'alal puc ta alel te mandalil yu'un muc' ajwalile, soc te bayal ach'ixetic la yich'ic tsobel ta spalacio te muc' ajwalile, te ochic ta canantayel yu'un Hegai te jcanan-antsetique, tey ay a te Ester.

⁹ Te ach'ix Ester, bayal yutsil ta o'tanil yu'un te Hegai, buen lec ta o'tanil yu'un. Ja' yu'un te Hegai la yac'bey ta ora nax te bitic ya xchajban st'ujbilal a, soc ja' la yac'bey swe'elin te bitic mero leque. La yac'bey yabatin juctul buen lequil criadaetic te ayic ta sna muc' ajwalile. La yic' bael soc ta banti ay mero t'ujbil cuartoetic yu'un te spalacio te antsetique.

¹⁰ Te Ester ma'yuc la sta ta alel te bay talem sts'umbal soc te mach'a sme'-state, melel neel albot yu'un te Mardoqueo te ma ba ya yale.

¹¹ Jich te Mardoqueo jujun c'aal ya xbajt' q'uelc'onel tey ta yamaq'uil sna te antsetique, yu'un yo'tan sna' teme lec ay te Ester soc te bi xi' sc'oplale.

¹² Ta spisilic te ach'ixetic ac'botic te bitic ya xchajban st'ujbilalic a. Lajchayeb u ya xjalajic ta xchajbanel sbaic. Te sbabial waqueb u ya sjaxic ta aceite yu'un mirra ta scojt'ol sbaq'uetalic; ta yan waqueb xan u ya sjaxic ta perfumeetic soc ta cremaetic te ya xtuun yu'un te antsetique. C'alal ya xlaj ta pasel in to, ta juju-jtul ya xbajt'ic ta stojol muc' ajwalil Asuero te ach'ixetique.

¹³ Chican bitic ya sc'an ya yich'ic bael ya xju' ya yich'ic loq'uel ta palacio yu'un antsetic, te ya xba yaq'uic ta palacio yu'un te muc' ajwalile.

¹⁴ Bajt'ic ta sna muc' ajwalil ta ajc'ubal. C'alal ya sacub q'uinal, ya xc'axix bael ta yan cuartoetic te ay ta sna te antsetic, te ja' ay ta swenta scanantayel te Saasgaz, ja' te jun yo'tan ta stojol te muc' ajwalile, te ja' ay ta swenta scanantayel te antsetic yinaminejix te muc' ajwalile. Tey ma ba ya xbajt' stejc'anix sbaic ta stojol te muc' ajwalile, ja' to teme ya sticun ta iq'uel te mach'a la smulane.

¹⁵ Te c'alal c'ot yorail te ba yac' sba ta stojol muc' ajwalil uuc te Ester, te yantsil-nich'an Abihail te ja' stajun te Mardoqueo, ja' nax la yich' bael stuquel te bila albot yu'un te Hegai, te jun yo'tan ta stojol te muc' ajwalil, soc ja' ay ta swenta scanantayel te antsetic yu'une. Te Ester, jun yo'tan ta stojol spisilic te mach'atic ya sc'opone.

¹⁶ Te Ester la yich' iq'uel bael ta sna muc' ajwalil, swenta yu'un ya yich' aq'uel ta stojol te muc' ajwalil Asuero. Ja' ta slajunebal u te Tebet sbiil, te ja' sjuquebal ja'wil yochel ta muc' ajwalil a te Asuero.

¹⁷ Te Asuero mero la smulan te Ester, ma'yuc yan ants jich smulanej a. Jich la yu'uninbey yo'tan te Asuero te Ester. Jich la xc'uxtay, c'ax jich la xc'uxtay a te bit'il yantic ach'ixetic te c'axix soque. La yac'bey te scorona ta sjol swenta muc' ajwalil, la yac'bey yich' yat'el ta antsil-ajwalil. Ja' la sjelolin te Vasti.

¹⁸ Soc la spas buen muc'ul q'uin, la yac' we'el-uch'el ta swenta stoybeyel yutsil sc'oplal te Ester. La sticun ta iq'uel te mach'atic yich'oj yat'elic yu'un soc spisil te abatetic yu'une. Soc la spejc'an patanetic ta juju-jpam q'uinal, soc la spuc bayal majt'aniletic, majt'anil te ya yac' sba ta na'el a te ay yutsil yo'tan te muc' ajwalile.

Mardoqueo la yaiy chajbaj sc'oplal ta milel muc' ajwalil

¹⁹ Te jayeb c'aal yac ta iq'uel bael ta yan na yu'un antsetic a te ach'ixetique, te Mardoqueo spisil c'aal la snajc'an sba ta yochibal spalacio te muc' ajwalile.

²⁰ Jich te bit'il albot yu'un te Mardoqueo te Ester, jich nix la spas a: Ma ba la yal te banti slumal soc te mach'a sme'-state. Jich la xch'uun spasel te bit'il albot yu'un te Mardoqueo, jich c'oem ta yo'tan te bit'il wentainbil to yu'une.

²¹ Te bi ora nacal ta yochibal spalacio te muc' ajwalil te Mardoqueo, la yaiybey sc'opic te Bigtán soc Teres, cheb jcanan-yochibal spalacio te muc' ajwalile. Te winiquetic in to mero buen ilinem yo'tanic a, yacalic ta xchapel sc'opic bi ya yut ya smilic te muc' ajwalil Asuero.

²² C'alal la yaiy te Mardoqueo te bila yacalic ta xchapele, la yalbey te antsil-ajwalil Ester. Jich te Ester la yalbey te muc' ajwalile te bila la yaiy te Mardoqueo.

²³ Te bila alote la yich' jaq'uel ta lec, chicnaj te melel nix a. Xchebal te jcanan-ochibaletic la yich'ic jijp'anel ta te'. Te bila c'ot ta pasele, jil sna'jibal ta stojol te muc' ajwalile, tey jil ta libro te banti ya yich' ts'ibuyel te bitic c'ot ta pasel yu'un te nacione.