Esdras 8 - Bible in Tzeltal de Oxchuc y Tenejapa

Lista yu'un mach'atic sujt'ic tel

¹ Ja' lista yu'un te mach'atic jwolwanejetic yu'un chajbalchajp na, chican te bit'il ochemic ta jun ta chajbalchajp, te sujt'ic loq'uel tel ta Babilonia soc Esdras, te jayeb ja'wil ay ta muc' ajwalil te Artajerjes:

^2-3 Gersón, te sts'umbal Finees; Daniel, te sts'umbal Itamar; Hatús snich'an Secanías, te sts'umbal David; Zacarías te sts'umbal Paros. Joinbil yu'un lajuneb swaxacwinic (150) winiquetic te ochemic ta lista soque.

⁴ Elioenai, snich'an Zeraías, te sts'umbal Pahat-moab. Joinbil yu'un lajunwinic (200) te sts'umbale.

⁵ Secanías snich'an Jahaziel, te sts'umbal Zatu. Joinbil yu'un jo'lajunwinic (300) winiquetic.

⁶ Ebed snich'an Jonatán, te sts'umbal Adín. Joinbil yu'un lajuneb yoxwinic (50) winiquetic.

⁷ Jesaías snich'an Atalías, te sts'umbal Elam. Joinbil yu'un lajuneb xchanwinic (70) winiquetic.

⁸ Zebadías snich'an Micael, te sts'umbal Sefatías. Joinbil yu'un chanwinic (80) winiquetic.

⁹ Obadías snich'an Jehiel, te sts'umbal Joab. Joinbil yu'un waxaclajuneb sbuluchwinic (218) winiquetic.

¹⁰ Selomit snich'an Josifías, te sts'umbal Bani. Joinbil yu'un waxacwinic (160) winiquetic.

¹¹ Zacarías snich'an Bebai, te sts'umbal Bebai. Joinbil yu'un waxaqueb xcha'winic (28) winiquetic.

¹² Johanán snich'an Hacatán, te sts'umbal Azgad. Joinbil yu'un lajuneb swacwinic (110) winiquetic.

¹³ Elifelet, Jeiel soc Semaías, te slajibal sts'umbal Adonicam. Joinbilic yu'un oxwinic (60) winiquetic te sujt'ic xan tel ta patile.

¹⁴ Utai soc Zabud, te sts'umbal Bigvai. Joinbilic yu'un lajuneb xchanwinic (70) winiquetic.

Abatetic ta templo

¹⁵ Jo'on te Esdras la jtsob spisilic ta nopol muc'ja' te c'oem ta Ahava. Tey jalajotic oxeb c'aal ta yol q'uinal. Te c'alal la cajtay te mach'atic ayic tey a, soc nix te sacerdoteetic, ma'yuc banti la jta jtuluc levita.

¹⁶ Ja' yu'un, la jticun bael te Eliezer, Ariel, Semaías, Elnatán, Jarib, Elnatán, Natán, Zacarías soc Mesulam, yu'un ja'ic te winiquetic te ich'bilic ta muq'ue, soc nix te maestroetic Joiarib soc Elnatán.

¹⁷ La calbey bael mandal te ya xbajt' yula'tayic te Ido, te ja' jwolwanej yu'un te Casifia sbiile. La calbey bael spisil te bila ya xc'o yalbey te Ido, soc te sjo'tac te abatetic yu'un templo te ayic ta Casifia, swenta yu'un ya yic'botic tel winiquetic, yu'un ya scoltayotic tey ta templo yu'un te Dios cu'untique.

¹⁸ Wocol la yal te Diose, la yiq'uic tel te Serebías, ja' te winic te mero ya sna' at'el ta leque, te ja' sts'umbal te levita te Mahli sbiile, soc nix snich'nab soc yermanotac, waxaclajuneb ta spisilic.

¹⁹ Soc la yic'botic tel te Hasabías soc Jesaías te patil alnich'anetic yu'un Merari. Ta spisil soc snich'nabic soc yermanotaquic ayic jtab ta jtul.

²⁰ Ay buluchwinic (220) ta jtul te sts'umbal te abatetic ta templo te la yac'bey yat'el te David soc te jwolwanejetic yu'une. Ja' yat'elic te ya scoltay te levitaetique. Spisilic loc' sbiilic ta juju-jtul.

²¹ Patil la cal mandal ta comel we'elil ta sts'eel muc'ja' Ahava, swenta yu'un ya me caltic ta jamal te jmultic ta stojol te Dios cu'untique, soc yu'un ya jc'anbeytic te lecuc ya yic'otic bael jo'otic soc mach'atic ay cu'untic, soc bitic ay cu'untic.

²² Q'uexawon ta sc'anel ta stojol ajwalil te soldadoetic cajajtic ta caballoetic, te yu'un ya scoltayotic ta sc'ab jcontrotic ta be, melel calojbeytic te muc' ajwalil te Dios ya xcoltayotic yu'un spisilic te mach'atic ya sleique, pero ya yac' bael spisil yip soc yilimba ta stojol spisilic te mach'atic ya xch'ay ta yo'tanic te Diose.

²³ Ja' yu'un la jcom jwe'eltic, la caltic wocol ta stojol Dios yu'un spisil in to. Te Diose la yich'botic ta wenta te jc'optique.

²⁴ Parte la cac' lajchaytul jwolwanej-sacerdoteetic, ja'ic te: Serebías, Hasabías soc lajuntul sjo'taquic,

²⁵ soc la jlicbey yalal soc la cac'bey te plata, te oro soc te biluquetic, te la yac' ta spasemal yo'tanic yu'un te templo yu'un te Dios cu'untic te muc' ajwalil soc te sjo'tac ta at'el, soc te jwolwanejetic yu'une, soc spisil te israeletic tey ayic ae.

²⁶ La jlicbey soc la cac'bey jun xcha'winic ta jmil soc lajuneb yoxwinic xcha'bajc' (21,450) kilo plata; soc jo'winic (100) biluquetic pasbilic ta plata; soc oxmil soc jo'lajunwinic (3,300) kilo oro;

²⁷ soc xan jtab tazaetic pasbilic ta oro, waxaqueb kilo yalal ta spisilic; soc cheb biluquetic pasbil ta bronce te mero xlemet nax te mero tsabile, c'ax bayal stojol jichuc oro.

²⁸ Patil jich la calbey: —Te ja'exe ch'ultesbilex yu'un te Cajwaltique. Ja' nix jich te biluquetique. Te plata soc te oro ya me xtuun yu'un Cajwaltic, ja' te Dios yu'un jme'-jtatique.

²⁹ Tsajtaya me abaic bael, soc q'uejaic me ja' to teme la alicbeyic yalal ta cuartoetic yu'un templo yu'un Cajwaltic ta Jerusalén ta stojol te jwolwanej-sacerdoteetic, te levitaetic soc te jwolwanej ta juju-jchajp na yu'un Israel te ayic ta Jerusalén —xoon.

³⁰ Jich ora te sacerdoteetic soc te levitaetique la yich' ta swentaic te plata, oro soc te biluquetic p'isbot yalale. La yich'ic bael ta Jerusalén ta templo yu'un te Dios cu'untique.

³¹ Ta slajchayebal c'aal sjajch'el a te sbabial u, jajch'otic bael jo'otic ta muc'ja' Ahava, tojotic bael ta Jerusalén. Te Dios cu'untique, la scoltayotic bael ta sc'ab te jcontrotic soc ta sc'ab j'eleq'uetic ta be.

³² C'alal c'ootic ta Jerusalén, la jcux co'tantic oxeb c'aal.

³³ Ta xchanebal c'aal la yich' p'isel yalal ta templo yu'un te Dios cu'untic te plata, te oro soc te biluquetique. La yich' aq'uel spisil te sacerdote Meremot snich'an Urías. Tey nix sjoinej a te Eleazar snich'an Finees, soc te levitaetic, Josabad snich'an Josué soc Noadías snich'an Binuy.

³⁴ Ja' nix sc'aalelal a la yich' liquel yalal, soc la yich' ajtayel spisil, soc la yich' ts'ibuyel ta jun te ijc'atsiletique.

³⁵ C'alal sujt'otic tel jo'otic te namey la quijq'uitay jlumaltique, ay bitic la cac'tic yu'un chic'bil smajt'an te Dios cu'untic ta jpisiltic te israelotique. La cac'tic lajchaycojt' ch'in wacaxetic, waclajuneb yo'winic (96) ta jcojt' chijetic, juclajuneb xchanwinic (77) ta jcojt' ch'in alal chijetic soc lajchayeb tentsunetic yu'un smajt'an Dios swenta te jmultique. Spisil la yich' chiq'uel ta templo swenta yich'el ta muc' te Cajwaltique.

³⁶ Patil la cac'tic te smandal te muc' ajwalil ta sc'ab te mach'atic yich'oj yat'elic ta ajwalil, soc te ajwaliletic yu'un te jpam sq'uinal te ay ta stojol smalib c'aal yu'un te muc'ja' Eufrates, ja'ic te la scoltayic ta c'op te lum soc te templo yu'un te Diose.