Esdras 5 - Bible in Tzeltal de Oxchuc y Tenejapa

¹ Te j'alwanejetic yu'un Dios, Hageo soc Zacarías snich'an Ido, la yalbeyic te judioetic ta sq'uinal Judá soc ta Jerusalén te c'op jul ta stojolic yu'un te Cajwaltic, te Dios yu'un Israel.

² Ja' yu'un te Zorobabel snich'an Salatiel soc Josué snich'an Josadac, jajch'ic xan ta at'el ta xcha'pasel xan te templo yu'un Dios ta Jerusalén. Te j'alwanejetic yu'un Dios, tey ayic soc a, yacalic ta coltayel yu'un.

^3-4 Pero te Tatnai te ja' ajwalil yu'un te jpam q'uinal te ay ta smalib c'aal yu'un muc'ja' Eufrates, te Setar-boznai soc te sjo'taque ba yalbeyic: —¿Mach'a la yalbeyex mandal te ochex ta xcha'pasel xan te templo in to soc te ya awac'beyic xan ste'ele? ¿Bitic sbiilic te mach'atic yacal yac'belic ta cha'pasel xan te na in to? —xiic c'oel.

⁵ Ja'uc me to Dios coltaybilic yu'un te jwentainwanej-judioetique, jich ma ba ju' yu'unic scomel ta pasel asta ja' to te la sticunbeyic c'op te Darío, soc te sutbotic sujt'ibe.

⁶ Te carta la sticunbeyic te muc' ajwalil Darío te Tatnai ajwalil yu'un te jpam q'uinal te ay ta stojol smalib c'aal yu'un Eufrates, soc te Setar-boznai soc te yantic sjo'tac ta at'el ta ajwalile, jich ay te cópia yu'un te cartae,

^7-8 jich ya yal: “Muc' ajwalil Darío, ya jpatic awo'tan te bit'il muc' ajwalilat cu'untique, lamaluc me q'uinal ta atojol. Ya caltic ta atojol te c'o quiltiquix te sq'uinal Judá soc te templo yu'un te mero muc' Diose, te yacalic ta xcha'pasel xan ta niwac walubil tonetic. Yo'tic moemix ste'el, mero sujoj sbaic ta at'el, te yat'elique mero ora yac ta ju'el.

⁹ La jac'beytic te jwentainwanej-judioetic te mach'a ac'botic mandal yu'un te yacalic ta xcha'pasel xan te temploe, soc te yacalic ta smojt'esel ste'ele,

¹⁰ soc te bi sbiilic te mach'atic ochemic ta jwentainwanejetic yu'unic, swenta yu'un jich ya xju' ya jts'ibubey ta jun te sbiilique, soc yu'un jich ya xju' ya jticunbat ta alel ta atojol a te ja'at te muc' ajwalilate.

¹¹ Ja'uc me to la yalbotic te ja' xch'uunejic te Dios yu'un ch'ulchan balumilale, soc yacalic ta xcha'pasel xan te templo ayix bayal ja'wil te mero ju'em ta pasel yu'un te jtul mero muc' ajwalil yu'un te Israele.

¹² Soc la yalix xan te ja' te antiguo sme'-static te la yaq'uic ilinuc yo'tan te Dios yu'un te ch'ulchane, soc te ja' ac'otic ta sc'ab Nabucodonosor muc' ajwalil yu'un Babilonia te caldeo-winic, soc te ja' la sjin te templo. Jich ora loq'uesotic bael ta slumalic, bajt'ic ta Babilonia.

¹³ Ta patil te Ciro muc' ajwalil ta Babilonia, ta sbabial ja'wil yat'el a, la yal mandal te ya yich' xan cha'pasel te templo yu'un te Diose.

¹⁴ “Soc la yalbotic xan, te ja' muc' ajwalil Ciro te la sloq'ues ta templo ta Babilonia te biluquetic pasbil ta oro soc ta plata, soc ja' la yac'bey ta sc'ab te jtul winic Sesbasar sbiile, te ja' nix te la yac'bey yat'el ta ajwalile. Melel te muc' ajwalil Nabucodonosor la yich' loq'uel ta templo ta Jerusalén ta namey, la yich' bael ta templo ta Babilonia.

¹⁵ Ja' yu'un te Ciro la yalbey mandal te Sesbasar te ya stsob te biluquetique, te yacuc yich' sujt'el, ya yac' xan ta templo ta Jerusalén, soc te ya xcha'pas xan ta yawil nix yan buelta te templo yu'un te Diose.

¹⁶ Ja' yu'un, te c'alal c'ot te Sesbasar, la yac'bey jajch'el te xjajch'ibal yiptajib te templo yu'un Dios ta Jerusalene. Jich ora jajch' ta cha'pasel xan, pero ma to ba ju'em ta pasel.

¹⁷ “Ora yo'tic teme lec ya awaiy uuc te ja'at te muc' ajwalilate, ja' lec te yacuc yich' leel ta sq'uejibal poco' junetic yu'un muc' ajwaliletic ta Babilonia, soc yacuc yich' jaq'uel teme melel nix a te ja' la yal mandal ta cha'pasel xan te templo yu'un Dios ta Jerusalén te muc' ajwalil Ciro, soc te ya yich' alel ta jtojoltic te bila mandalil ya awal yu'un te c'opetic in to, swenta te bit'il ja'at te muc' ajwalilat cu'untique”, xi' bael te sjunique.