Esdras 4 - Bible in Tzeltal de Oxchuc y Tenejapa

Controetic la yac' ta quejch'anel at'el

¹ Te c'alal bi ora la yaiyic te controetic yu'un te lum Judá soc te lum Benjamín te yacaliquix ta xcha'pasel te templo yu'un Cajwaltic Dios yu'un Israel te mach'atic sujt'emiquix tel te ac'bot yijq'uitay slumalique,

² jich ba yilic te Zorobabel, te Josué soc te jwentainwanejetic ta juju-jchajp na. Jich c'o yalbeyic: —Ac'botic permiso uuc ta spasel te nae, yu'un ya jcoltaytiquex, melel te jo'otique, ja' nix jichotic te bit'il ja'exe, melel ja' nix ya quich'tic ta muc' te Dios awu'unique. Ya cac'beytic milbil smajt'an ja' to nix te c'alal yorail Esar-hadón muc' ajwalil ta Asiria, te la yic'otic tel li' c'alale —xiic c'oel te controetique.

³ Pero te Zorobabel, te Josué soc te yantic jwentainwanejetic yu'un juju-jchajp na yu'un israeletic, jich la yalbeyic: —Ma xju' teme ya jointiquex ta xcha'pasel te templo yu'un te Diose. Ta jtuqueltic ya jcha'pastic te templo yu'un Cajwaltic, te Dios yu'un Israel, melel jich la spasotic ta mandal te Ciro te muc' ajwalil yu'un Persia —la yutic.

⁴ Ja' yu'un te mach'atic tey ayic ta q'uinale, jajch' xchebantesbeyic yo'tanic te judioetique. Jich ma la yaq'uic ta pasel a te templo.

⁵ Soc ay la yac'beyic majt'anil te sjo'tac ta at'el te ajwalile swenta smacjibal yat'el te judioetique. Jich ma ba ju' yu'unic spasel te judioetic te bila chapal yu'unic te jayeb c'aal te ay ta muc' ajwalil ta Persia te Ciro, asta ja' to te c'alal ay ta muc' ajwalil ta Persia te Darío.

⁶ Soc ta xjajch'ibal yat'el ta muc' ajwalil te Asuero la slebeyic smulic te mach'atic ayic ta slumalic ta Judá soc ta Jerusalén.

⁷ Ta yorail te Artajerjes, muc' ajwalil ta Persia, te Bislam, Mitrídates, Tabeel soc te yantic sjo'taque la sticunbey jun te Artajerjes. Te carta yich'oj ts'ibuyel ta arameo-c'op, soc yich'oj c'asesel ta sc'opic.

⁸ Soc nix te Rehum, ja' comandante, soc te Simsai ja' secretario, la sts'ibubeyic jun carta te muc' ajwalil Artajerjes swenta slebeyel smulic te yajwal Jerusalén.

^9-11 Jich ay te jun la sticunic te Rehum te comandante, Simsai secretario soc te yantic sjo'taque, ja' te juecetic, generaletic soc te j'at'eletic yu'un ajwaliletic ta Persia, ta Erec, Babilonia soc Susa, ja' nix te Elam, soc xan te mach'atic talemic ta yantic nacionetic te ic'otic loq'uel ta slumalic yu'un te jtul ajwalil muc' sc'oplale, te Asnapar sbiile, te c'o yac' ta nainel ta lumetic ta sq'uinal Samaria soc ta yan spamlejal q'uinal te ay ta stojol smalib c'aal yu'un muc'ja' Eufrates: “Muc' ajwalil Artajerjes, jo'otic te awabatotique, te ayotic ta q'uinal te ay ta stojol smalib c'aal yu'un muc'ja' Eufrates:

¹² “Ya caltic ta atojol te ja'at te muc' ajwalilate: Yu'un te judioetic jajch'ic tel ta atojol te julic tel ta jtojoltique, c'otic ta Jerusalén. Yacalic ta xcha'pasel xan te lum, mero bayal stoybail soc mero amen. La sjachic spasel xan te xjajch'ibal yiptajib soc te sjoyob ts'ajc'ule.

¹³ Ya cac'tic ana' stojol ja'at te muc' ajwalilate: Teme la yich' pasel xan in lum to, soc teme la yich' pasel te sjoyob ts'ajc'ule, te winiquetic to ma ba ya stojic spatanic ta stojol ajwalil, soc sloc'ol xchonbajelic soc yantic xan patanetic ta swenta biluc. Jich me ya xch'ay te taq'uin ya awich' ja'at te muc' ajwalilate.

¹⁴ Melel ja'at nix awabatotic, ja' yu'un ma jc'antic teme ay bitic ya yuts'inbat awo'tane. Ja' yu'un la jticuntic ta atojol te aiyejetique,

¹⁵ swenta yu'un ya me yich' leel ta bay sq'uejibal junetic yu'unic te mach'atic neel c'axemic awu'une. Te bi ya yal tey ae, tey me ya ana' a te lum te mero toyba soc xiweltic sba ta stojol muc' ajwaliletic soc ta stojol yantic q'uinaletic. Ay jich c'oemiquix ta pasel yu'unic te la xchajban sbaic swenta yu'un ma x'ich'awanic ta muc' tey a. Ja' swentail te la yich' lajinel te lume.

¹⁶ Ja' me yu'un ya cac'tic ana', melel ja'at te muc' ajwalilate, teme la yich' xan cha'pasel in lum to, soc teme ju' ta pasel xan te sjoyob ts'ajc'ule, ya me xch'ay awu'un te bit'il awentainej te q'uinal ay ta stojol smalib c'aal yu'un muc'ja' Eufrates”, xiic ta carta.

¹⁷ Te muc' ajwalil Artajerjes jich sutbotic bael yu'un: “Ya jpatbeyex awo'tanic ja'ex te comandante Rehum, soc te secretario Simsai, soc te yantic jilemic ta jq'uinal te ay ta stojol smalib c'aal yu'un muc'ja' Eufrates: “Te bi la awalbonic

¹⁸ te carta la aticunbonique, te la yich' ilel ta jtojol te yich'oj c'asesele,

¹⁹ la cal mandal te ya yich' leel te poco' junetique. La yich' tael te melel nix a te la stoy sba ta stojol muc' ajwaliletic ta namey te lum in to. La xchap sbaic ta sjachel c'op, soc la stoy sbaic tey a.

²⁰ Soc te ay chicnaj muc' ajwaliletic ta Jerusalén te mero bayal yip te bila la spasique, te la yu'uninic te q'uinal ay ta stojol smalib c'aal yu'un muc'ja' Eufrates. Ac'bot ta stojolic spatanic, soc sloc'ol te bila la yich' chonel soc yantic pataniletic.

²¹ Ja' yu'un, pasaic ta mandal te winiquetic, ac'a squejch'anic te at'ele, ja' to teme la cal xan jmandal, ma me xcha'pasic xan te lume.

²² Ma me xaquejch'anic ta yilel in c'opetic to, swenta yu'un jich ma x'esmaj xan jwocol ta jtojol a”, xi' te carta yu'un te muc' ajwalile.

²³ Te c'alal la yich' ilel te scarta muc' ajwalil Artajerjes ta stojolic te Rehum, te Simsai ja' te secretarioe soc te yantic sjo'taque ta ora nax bajt'ic ta Jerusalén. C'otic ta stojolic te judioetique, c'o scomic ta at'el soc sc'ajc'alic soc yat'ejibic ta guerra.

La xcha'pasic xan templo

²⁴ Jich quejch'aj ta cha'pasel xan te templo yu'un Dios ta Jerusalén, ja' to ta xchebal ja'wil yat'el ta muc' ajwalil Darío ta Persia.