Esdras 10 - Bible in Tzeltal de Oxchuc y Tenejapa

La yich'ic ijq'uitayel jyanlum-antsetic

¹ Te c'alal quejel ta sc'oponel Dios ta templo te Esdras, soc oq'uel yac ta yalel ta jamal te falta staojic, c'ot ta stojol tsobol israeletic te xchapoj sbaique: winiquetic, antsetic, soc ch'in alaletic te yacalic ta tulan oq'uele. La stsob sbaic ta sts'eel.

² Te Secanías snich'an Jehiel, te sts'umbal te Elam, c'opoj, jich la yalbey te Esdras: —Te jo'otique ma ba junajem co'tantic ta stojol te Dios cu'untique, melel nujbinemotic soc jyanlum-antsetic te xch'uunejic lotil diosetique. Ja'uc me to ay to bila ya xju' ta pasel ta stojol te Israele.

³ Ya me cal jbajtic te ya me jticuntic bael ta spisil te jyanlum-antsetic cu'untique, soc nix te yalataquique. Ac'a cac'tic c'otuc ta pasel te mandaliletique, jich te bit'il awo'tan te ja'ate soc te mach'atic ya yich'ic ta muc' te smandal te Cajwaltic te ya stojtesotique.

⁴ Jajch'an, melel ja'at ay ta awenta spasel, te jo'otique ya me jt'unticat. Ac'a puersa, ac'a jajch'uc te at'ele —xi' te Secanías.

⁵ Te Esdras jich ora la stejc'an sba. La yalbey te yacuc yalic ta jamal ta stojol Dios te jwolwanej-sacerdoteetic soc te levitaetic soc ta spisilic te israeletique te ya me yaq'uic c'otuc ta pasel te bila yalojique. Jich la yalic ta jamal te ya me yaq'uic c'otuc ta pasele.

⁶ Te Esdras jajch' bael tey ta templo yu'un te Diose, soc bajt' ta scuarto Johanán snich'an Eliasib. Tey c'ax ajc'ubal yu'un a, ma ba we' soc ma'yuc bila la yuch', yu'un ja' mero smeloj yo'tan yu'un, te ma junuc yo'tanic ta stojol Dios te mach'atic sujt'emic tel te ac'bot yijq'uitay slumalique.

⁷ Patil la yich'ic iq'uel ta spisilic ta sq'uinal Judá soc ta Jerusalén, swenta yu'un ya stsob sbaic spisilic ta Jerusalén te mach'atic sujt'emic tel te ac'bot yijq'uitay slumalique.

⁸ Ta spisil te mach'atic ma ba ya xc'otic te ya yich'ic maliyel oxeb c'aale, la xchapic te jwolwanejetic soc te jtojteswanejetique te ya me yich'ic ich'el te q'uinal yu'unique soc ya me yich'ic loq'uesel bael ta stojolic te mach'atic sujt'emic tel te ac'bot yijq'uitay slumalique.

⁹ Ja' yu'un spisilic te winiquetic ta sq'uinal Judá soc ta sq'uinal Benjamín la stsob sbaic ta Jerusalén jtab c'aal sjajch'el a te sbalunebal ue, ja' te c'alal ts'acaj te oxeb c'aale. Ta spisilic la snajc'an sbaic ta yamaq'uil templo yu'un Dios, yacalic ta nijq'uel yu'un te bila c'opil albile, soc te bit'il yacal ja'ale.

¹⁰ Te sacerdote Esdras la stejc'an sba, jich albotic yu'un: —Te ja'exe ataoj amulic ta scaj te nujbinemex soc te jyanlum-antsetique, jich la atoyesbeyic xan smul Israel.

¹¹ Ja' yu'un yo'tic, li' ta stojol Cajwaltic te Dios yu'un te jme'-jtatique, na'aic me ta lec te ataoj amulic ta stojol te Cajwaltique, soc ja' me xapasbeyic te sc'anjel yo'tan stuquele. Pita abaic ta stojol te mach'atic ma ba xch'uunejic te Diose, soc ta stojol te jyanlum-antsetic in to —xi' te Esdras.

¹² Ta spisil te ants-winiquetic la sjaq'uic ta aw: —Jichuc, ya jpastic te bila ya awale.

¹³ Melel mero tsobolotic soc ma xquejch'aj te ja'ale, soc xan ma xju' ya x'ainotic ta calle; melel te c'opetic in to, ma xchajbaj ta jun nax c'aal, soc ni ta cheb c'aal; melel mero tsobolotic te jpasojtic te mulil in to.

¹⁴ Ja' lec te ja' ya xjil ta swentaic te jwolwanejetic cu'untique. Ta spisilic te mach'atic li' nainemic ta jlumaltic te nujbinemic soc jyanlum-antsetique ya me yich'ic alel bi c'aalil ya xtalic soc ya sjoinic tel te mach'atic ay yat'elic soc te juecetic yu'un te slumalique, ja' to teme lamaj te mero tulan yilimba te Dios cu'untic, ta swenta te c'op in to, ja' to teme chajbaj cu'untique —xiic.

^15-16 Spisilic te mach'atic sujt'emic tel te ac'bot yijq'uitay slumalique, lec la yaiyic te jich ya spasique. Ja' nax ma lecuc la yaiyic te Jonatán snich'an Asael soc Jahazías snich'an Ticva, soc jich yo'tanic uuc te Mesulam soc Sabetai te levitae. Te sacerdote Esdras, jich ora la stsa soc la yac'bey yat'el ta stuquelic nix cha'oxtul winiquetic, te ja'ic nix jwolwanejetic yu'unic a te juju-jchajp nae. Ta sbabial c'aal sjajch'el te slajunebal u, ta spisil te winiquetic te ac'bot yat'elique la xchap sbaic ta chajbanwaneje. Tey la snopic ta lec ta jujun te bit'il ayic ta chajbalchajp te bitic ay ta swentaique.

¹⁷ Ta sbabial c'aal sjajch'el te sbabial u, laj yo'tanic ta xchajbanel spisil te bitic ay ta swentaic te winiquetic nujbinic soc jyanlum-antsetique.

¹⁸ Ja' slistaul te sacerdoteetic nujbinemic soc jyanlum-antsetic: te sts'umbal te Josué te snich'an Josadac, soc te xchapomale ja'ic te Maasías, te Eliezer, te Jarib soc te Gedalías.

¹⁹ Ja'ic me in to te jc'axel la yalic te ya yijq'uitayic te antsetic yu'unique. Soc la yaq'uic jcojt' chij swenta smajt'an Dios yu'un te smulique.

²⁰ Te sts'umbal te Imer, ja'ic te Hanani soc Zebadías.

²¹ Te sts'umbal te Harim, ja'ic te Maasías, Elías, Semaías, Jehiel soc Uzías.

²² Te sts'umbal te Pasur, ja'ic te Elioenai, Maasías, Ismael, Natanael, Jozabad soc Elasa.

²³ Te sts'umbal te levitaetic, ja'ic te Jozabad, Simei, Kelaía (Kelita yan sbiil), Petaías, Judá soc Eliezer.

²⁴ Te jc'ayojetique, ja' te Eliasib. Te jcanan-ti'nailetic, ja'ic te Salum, Telem soc Uri.

²⁵ Te yantic israeletic te jich nix ayic a, ja'ic te sts'umbal te Paros, te jich ay te sbiilique: Ramía, Jezías, Malquías, Mijamín, Eleazar, Malquías soc Benaía.

²⁶ Te sts'umbal te Elam, ja'ic te Matanías, Zacarías, Jehiel, Abdi, Jeremot soc Elías.

²⁷ Te sts'umbal te Zatu, ja'ic te Elioenai, Eliasib, Matanías, Jeremot, Zabad soc Aziza.

²⁸ Te sts'umbal te Bebai, ja'ic te Johanán, Hananías, Zabai soc Atlai.

²⁹ Te sts'umbal te Bani, ja'ic te Mesulam, Maluc, Adaía, Jasub, Seal soc Ramot.

³⁰ Te sts'umbal te Pahat-moab, ja'ic te Adna, Quelal, Benaía, Maasías, Matanías, Bezaleel, Binuy soc Manasés.

³¹ Te sts'umbal te Harim, ja'ic te Eliezer, Isías, Malquías, Semaías, Simeón,

³² Benjamín, Maluc soc Semarías.

³³ Te sts'umbal te Hasum, ja'ic te Matenai, Matata, Zabad, Elifelet, Jeramai, Manasés soc Simei.

³⁴ Te sts'umbal te Bani, ja'ic te Madai, Amram, Uel,

³⁵ Benaía, Bedías, Queluhi,

³⁶ Vanías, Meremot, Eliasib,

³⁷ Matanías, Matenai, Jaasai.

³⁸ Te sts'umbal te Binuy, ja'ic te Simei,

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amarías soc José.

⁴³ Te sts'umbal te Nebo, ja'ic te Jeiel, Matatías, Zabad, Zebina, Jadau, Joel soc Benaía.

⁴⁴ Ta spisilic in to, ja'ic te nujbinemic soc jyanlum-antsetic, te la sticunic sujt'el te antsetique, soc nix te yalataquique.