Eclesiastés 6 - Bible in Tzeltal de Oxchuc y Tenejapa

¹ Ta balumilal ay quiloj yan te bila mero amen ay ta pasel ta comon yu'un te ants-winiquetique.

² Ay mach'atic ya x'ac'botic bayal sc'ulejalic soc yutsil sc'oplalic yu'un Dios, ma'yuc falta yu'un spisil te bila ya sc'an yo'tan ya stuuntesic. Pero ma x'ac'botic permiso yu'un ya yaiybeyic yutsilal spisil bitic ay yu'un, yantiquix a te mach'atic ya yaiybey yutsilale. Ja' mero tojol ta jyalel, soc mel-o'tantic sba.

³ Te winique manchuc me jo'winic ta jtul snich'nab soc ya xcuxin bayal ja'wil, teme ma ba ya yaiybey yutsilal te bila leque, soc teme ma'yuc smuquenal ya yich' muquel a te c'alal ya xlaje, ta mero melel ja' lec to c'oem yu'un te c'axem alale.

⁴ Yu'un, manchuc me jich nax ya xch'ay bael ta q'uinal te alale, ta ijc' q'uinal te banti ma'yuc mach'a na'bot sbiil yu'une,

⁵ soc manchuc me ma ba ya yil te c'aale soc te ma'yuc bila la sna', pero ja' lec c'ot yu'un te ja' mero la sta lequil cux-o'tanil stuquele, ma ja'uc lec c'ot te winique.

⁶ Melel manchuc me cuxin cha'mil ja'wil, pero teme ma ba la yaiybey yutsilal te sbiluque, tojol c'oem. Ta slajibal, pajal ya xbajt'ic ta jun nax yawil ta spisilic.

⁷ Te ants-winique puro at'el nax ay yu'un ya sta swe'el, pero ma'yuc bi ora ya xnoj xch'ujt' yu'un.

⁸ ¿Bitic ay yu'un te mach'a ay sp'ijile, te ma'yuc yu'un te mach'a ma sna' q'uinal, te manchuc ja'uc te ay sp'ijile ta sna'el te bit'il ya xcuxin ta q'uinale?

⁹ Ja' lec te bila yacalatix ta yilele, ma ja'uc lec te bila yac to nax ta sna'el ta awo'tane. Pero ja' nix jich mero tojol ta jyalel, ja' pajal soc te ya jtsactic te iq'ue.

¹⁰ Te bitic ay ta ora in to, mero nameyix te la yich' aq'uel sbiile, soc na'bilix bitic a. Ma'yuc mach'a ya xju' yu'un te ya stsac sba soc te mach'a ja' toyol yip yu'une.

¹¹ Ay bila melel ay: Ja' te banti ay bayal c'opetic, tey ya x'esmaj a te ixta c'opetique. Ma'yuc bila ya xloc' a.

¹² Ta mero melel, ma'yuc mach'a ya sna' bila lec ta stojol te ants-winic te jayeb c'aal ajtaybil te xcuxlejal te tojol c'oeme. Te jayeb c'aal ac'bil xcuxlejale, jich me ya xc'ax te bit'il axinale. ¿Mach'a ya x'albot yaiy yu'un te bila ya xc'ot ta pasel ta balumilal te c'alal lajemixe?