Eclesiastés 2 - Bible in Tzeltal de Oxchuc y Tenejapa

¹ Jich la cal xan ta co'tan: “Yo'tic ya jpas quil prueba: ya me jpas te bitic ya smulan spasel te co'tane, ya jpas te bila ya jc'an te cuxulone”, xoon yu'un. Ja'uc me to, mero tojol ta jyalel.

² Jich la jna' te jowil nax c'oem te tse'eje; soc ma'yuc swentail c'oem te smulanel yutsilal te q'uinale.

³ Ta co'tan ja' yic'ojon la caiy a te p'ijil-o'tanile, la jc'an jmulanbey yutsilal vino, la cac' jba ta sc'ab c'oem, swenta yu'un ya quil teme ja' lec ya xc'ot a te winic teme ya yuch' te jayeb c'aal ajtaybil te ya x'ain ta balumilale.

⁴ Muq'uic sc'oplal at'eliletic te la jpase: la jpas muc'ul naetic. Ay ts'usubiltic te jo'on mero cu'une.

⁵ La jpasbey yawil soc la jts'un te'etic, spisil ta jchajp te'etic te lec ta lo'el site, soc la jpasbey yawil nichimetic.

⁶ La jpasbey yawil ja' yu'un ja'etic, yu'un ya yich' ajch'esel a te te'etic la jts'une.

⁷ La jman mosoetic soc criadaetic cu'un, soc ay tey ayinic ta jna. Ay bayal wacaxetic cu'un soc chijetic. Spisil te mach'atic neel cu'un ta Jerusalén, ma'yuc jich yu'unic a te bit'il te cu'une.

⁸ Bayal oro soc plata la jbusan ta tsobel, c'ulejaliletic te ja' yu'unic a te yantic muc' ajwaliletic soc ay tal ta yantic q'uinaletic. Ay jc'ayoj-winiquetic cu'un, soc ay jc'ayoj-antsetic cu'un, soc la jmulanbey yutsilal te ch'ich'-baq'uete, ma'yuc la spason falta antsetic.,

⁹ Mero muc' jc'oplal ta winiquil, c'axem jich biluc cu'un a te bit'il yantic neel c'axic cu'un ta Jerusalén. Manchuc me jich ayon a, pero ma ba la spijt'eson te p'ijil-o'tanile.

¹⁰ Ma'yuc bi ora ma la jmulan te bila la smulan te co'tane, soc ma'yuc bi ora ma ba la cac'bey te co'tan te bila la smulane. La caiybey sbujts' soc co'tan ta spisil te cat'ele, ja' stojol jc'ab c'ot ta spisil.

¹¹ Jajch'on ta stsajtayel quil te bitic jpasoje, soc ta spisil te cat'el ay jwocol ta spasele, c'ot ta co'tan te mero tojol ta jyalel, te ja' pajal soc te yacuc jtsactic te iq'ue, soc te ma'yuc bi ya cu'unintic ta balumilale.

¹² Ta patil jajch' jnop ta co'tan te sc'oplal te p'ijil-o'tanile, te bitic ma lecuc, soc te bol-o'tanile. ¿Bi yan ya spas te mach'a ya x'och ta ajwalil te c'alal ya xlajone? Ja' ni me ya spas te bitic la yich'ix pasel ta namey tele.

¹³ La quil te ja' mero bayal sc'oplal te p'ijil-o'tanile, ja' ma'yuc sc'oplal te bol-o'tanile, jich te bit'il ja' mero bayal swentail te saquil q'uinal, ja' ma'yuc swentail te ijc' q'uinale.

¹⁴ Te mach'a ay sp'ijile, buen lec ya stuuntes te site; yan te mach'a ma sna' q'uinal yac ta beel ta ijc' q'uinal stuquel. Pero la jna' te pajal spisil, melel te bila ya xc'ot ta stojolique, ja' nix ya xc'ot ta jwenta uuc.

¹⁵ Ja' yu'un jich la cal ta co'tan: “Te bila quechel ta c'oel ta swenta te mach'a ma sna' q'uinale, ja' nix quechel ya xc'ot ta jwenta. Ja' yu'un, la cal te ma'yuc bi ya xtuun cu'un a te p'ijil-o'tanile. Ja' yu'un mero tojol ta jyalel.

¹⁶ Melel ta patil ma'yuc bi ora ya xna'otix te mach'a ay sp'ijile, ja' nix jich ma'yuc mach'a ya xna'otix yu'un uuc te mach'a ma sna' q'uinale. Teme c'ax bael te c'aale, spisil ya xch'ay ta o'tanil. Te mach'a ay sp'ijile ya xlaj, ja' nix jich ya xlaj te mach'a ma sna' q'uinale. Pajal ya xch'ayic bael ta q'uinal”, xoon.

¹⁷ Asta ma la jmulan te jcuxlejale, melel spisil te bitic ya yich' pasel ta balumilal, ma ba la smulanix co'tan. Melel, mero tojol ta jyalel ta spisil. Ja' pajal soc te yacuc jtsactic te iq'ue.

¹⁸ Ta spisil te at'eliletic la jpas ta balumilal, jc'axel ni jxujt'uc ay yutsilal la caiy ta co'tan. Melel ta spisil, ja' ya cac'bey jilel te mach'a ya x'och jilel ta jelole.

¹⁹ Jna'oj te puersa jich ya xc'ote, manchuc me p'ij o bol yo'tan, pero ya me yu'uninbon te p'ijil c'op te ay bayal jwocol te ju' cu'un stael li'to ta balumilale. Ja' yu'un, ja' nix jich, mero tojol ta jyalel.

²⁰ Te c'alal la quil te bitic jpasoj ta balumilale, la jmel co'tan yu'un te mero bayal at'ejone.

²¹ Ay mach'a te ya x'at'ej soc sp'ijil yo'tan, soc sp'ijil sjol, soc spisil te bila sna'oj spasele; pero te ja' nax ya yac'bey jilel yu'unin spisil te mach'a ma ba at'ejem ae. Ja' nix mero tojol ta jyalel, soc ma'yuc swentail te la spase.

²² ¿Bi ya xloc' yu'un a jiche te winic te mero bayal ya x'at'eje, soc te mero ma'yuc jojch'el yu'un li'to ta balumilale?

²³ Te jayeb c'aal cuxule, c'ux obol sba, ay swocol yu'un yijc'ats c'oem. Ni ja'uc ya xcux yo'tan a te sjol ta ajc'ubale. Pero mero tojol ta jyalel.

²⁴ Te bi mero lec ya sc'an ya spas te winique, ja' te ya xwe' ya x'uch'e, ac'a yaiybey yutsilal te yat'ele. Jna'oj te spisil talem ta stojol te Diose.

²⁵ Melel ¿mach'a ya xju' ya xwe' soc ya yaiybey yutsilal, teme ma ja'uc ta swenta te Diose?

²⁶ Melel te Diose, ja' ya yac'bey sp'ijil yo'tan soc sp'ijil sjol soc yutsil q'uinal yaiy te mach'a lec ta site. Pero te mach'a ya sle smule, ya yac'bey c'axuc swocol ta stsobel sc'ulejal, yu'un patil ja' ya yac'bey te mach'a lec ta site. ¡Ja' nix te mero tojol ta jyalel ta pasele, te ja' pajal soc te yacuc jtsactic te iq'ue!