Daniel 9 - Bible in Tzeltal de Oxchuc y Tenejapa

Daniel la sc'oponbey Dios yu'un te slumale

¹ Te Darío snich'an Asuero, te sts'umbal medoetique, och ta muc' ajwalil ta mandalteswanej ta sq'uinal caldeoetic.

² Ta sbabial ja'wil yich'bel yat'el ta mandalteswanej a, jo'on Danielon yacon ta snopel te sjun j'alwanej yu'un Dios te Jeremías sbiile, te banti ay sc'oplal te lajuneb xchanwinic (70) ja'wil ya xc'ax a, te ya sts'acaj te jayeb c'aal jinem te Jerusalén, jich nix te bit'il albot yu'un Cajwaltic te j'alwaneje.

³ La jc'opon Dios soc la calbey wocol te Cajwaltic Diose, la jcom jwe'el soc la jlap ch'ixal pac', soc la najc'an jba ta stanul c'ajc'.

⁴ La jc'opon te Cajwaltic te Dios cu'une, jich la calbey ta jamal: —Cajwal, muc' Diosat te Spisil ya xju' awu'une, spisil ora ya awac' c'otuc ta pasel te bi ya achape, soc ya awac'bey yil xc'uxul awo'tan te mach'atic c'uxat ta yo'tanique soc te ya xch'uunic spasel te mandaliletic awu'une.

⁵ La jta jmultic ta atojol, la jpastic te bila amen ta pasel ta asite, la jpastic te bila ma lecuque. Ma'yuc sc'oplal c'ot cu'untic te mandaliletic awu'une; la jch'aytic jilel te mandaliletic awu'un soc te bila chapal awu'une.

⁶ Ma'yuc ta wenta c'ot cu'untic te abatetic awu'un, ja' te j'alwanejetic awu'une, ja'ic te c'opojic ta awenta ta stojolic te muc' ajwaliletic, te jwentainwanejetic, te antiguo jts'umbaltic, soc ta spisil te lum Israele.

⁷ Te ja'at Cajwal, toj awo'tan atuquel. Pero te judiootique yo'tic ya xtal q'uexlal ta co'tantic, jichic te mach'atic ayic ta Jerusalén soc ja' nix jichic te yantic israeletic, te c'ubul ayique soc te nopol ayique, te la ach'oj c'axel ta scaj te la stoy sbaic ta atojole.

⁸ Cajwal, jo'otic, soc ja'ic nix te muc' ajwaliletic, te jwentainwanejetic, soc te antiguo jts'umbaltic, ya xtal q'uexlal ta jtojoltic, yu'un te la jta jmultic ta atojole.

⁹ Pero Dios cu'untic, te ja'ate atalel ay xc'uxul awo'tan soc ay perdón ta awo'tan. Pero te jo'otic la jtoy jbajtic ta atojol.

¹⁰ Cajwal Dios cu'untic, la caiytic te ac'ope, pero ma ba la jch'uuntic te nopjibal awu'une, ja' te la awac'botic ta swenta te j'alwanejetic te ayic ta abatinel awu'un.

¹¹ Ta spisil Israel la xc'axintaybat te nopjibal awu'une, soc ma ba la sc'an la xch'uunbat te amandale. Ja' yu'un julem castigo ta jtojoltic, ja' te jc'axel albil sc'oplal ta mandaliletic te la yal te Moisés, ja' te abat awu'une. Jich c'ot, melel ja' yu'un te la jta jmultic ta atojole.

¹² Te ja'ate, te bit'il la awac'botic tel ta jtojoltic te bitic mero amene, jich c'ot ta pasel awu'un te awaloj te ya awac'botic castigo soc te ajwaliletic cu'untique. Melel ma'yuc castigo jich c'oem ta pasel ta balumilal te bit'il julem ta stojol Jerusalén.

¹³ Ta spisil te bitic amen julem tel ta jtojoltic, ja' yac ta c'oel ta pasel te bila ts'ibubil ta mandaliletic yu'un Moisés. Pero te jo'otique, ma ba ya jleticat, Cajwal Dios cu'untic, ma ba quijq'uitayejtic te bila amen ya jpastique, ni ma ba t'unbil cu'untic te smelelil c'op awu'une.

¹⁴ Ja' yu'un Cajwal, la achajban te bila amene, la awac' tel ta jtojoltic. Melel te ja'at Cajwal, Dios cu'untic, stojil ay stuquel spisil te bitic ya apase, pero jo'otic ma ba la jc'an caiytic te amandale.

¹⁵ “Cajwal Dios cu'untic, la awac' ta ilel smuc'ul awu'el te c'alal la awic' loq'uel ta Egipto te lum awu'une. Jich la awac' chicnajuc ta alel yutsil ac'oplal ja' to c'alal ta ora to. Pero te jo'otic la jta jmultic, la jpastic te bila amene.

¹⁶ Cajwal, ya jna'tic te mero lec awo'tane. Wocoluc a, loq'uesaix ta Jerusalén te awilimba soc te sc'ajc'al awo'tane, melel ja' lum awu'un, soc ja' ch'ul wits awu'un. Ta spisil te yajwal yantic nacionetic te nopol ayotic soque, ya slabanic te Jerusalén, ja' te lum awu'une, ta scaj te jmultique, soc nix te smulic te antiguo jme'-jtatique.

¹⁷ Dios cu'untic, aiybon te jc'op te yacon ta yalel wocol te jo'on te abaton awu'une. Ta swenta te abiile, Cajwal, taluc xc'uxul ta awo'tan yu'un te wocol mel-o'tantic sba c'oem ta swenta te templo awu'une.

¹⁸ Ich'bon ta wenta te jc'ope, Dios cu'un, aiybon awaiy te jc'ope. Ac'a asit ta yilel te bitic jinem cu'untique, soc te lum te banti ya yich' alel wocol ta atojole. Ma yu'unuc lec cat'eltic te ya caltic wocol ta atojole; ja' nax smuc'ulinej co'tantic te smuc'ul xc'uxul awo'tan te ja'ate.

¹⁹ ¡Cajwal, Cajwal! ¡Aiya jc'optic, pasbotic perdón yu'un te jmultique! Ich'awotic ta wenta, Cajwal. La' coltayawotic, ta awenta nix ja'at, Dios cu'un, soc ta swenta Jerusalén, soc ta swenta te lum awu'un, te ya yalic wocol ta atojole. La' me ta ora —xoon ta sc'oponel te Diose.

Alwanej-c'op swenta lajuneb xchanwinic (70) semana

²⁰ Yacon to ta sc'oponel Dios a, yacon ta yalel ta jamal te jmul, soc smul te jlumal Israel, soc yacon ta yalel wocol ta stojol te Cajwaltic te Dios cu'untic yu'un te ch'ul wits yu'une.

²¹ Te c'alal yacon to ta sc'oponel Dios a, te Gabriel, te chicnaj ta jtojol ta neelal to te c'alal ay bila yacon ta yilel la caiye, wil tel ta jtojol te banti ayone. Ja'ix yorail a te ya yich' aq'uel milbil smajt'an Dios yu'un te smalel c'aale,

²² jich la yalbon: —Daniel, talon ta atojol ta ora in to, yu'un tal cac'bat ana'bey swentail te bitic ya xc'ot ta pasele.

²³ Te c'alal jajch'at ta sc'oponel te Diose, la sjac'bat te ac'ope. Jo'on talon ta atojol, yu'un tal calbat awaiy sujt'ib te ac'ope, melel te Diose mero bin nax yo'tan ta atojol. Ja' yu'un yo'tic, aiya me awaiy ta lec te bila ya calbate, swenta yu'un ya me ana'bey swentail a te bila la awile.

²⁴ “Ya me xc'ax lajuneb xchanwinic (70) semana ta stojol te alumal soc te ch'ul lum awu'une, ja' to me ya sta yorail ya xlaj a te toybail soc te mulile, ja' to me ya sta yorail te perdón yu'un te bila amen yich'oj pasele. Sbajt'el me q'uinal ja' ya yich'ix pasel a te bila stojile, soc swenta yu'un jich ya xc'otix ta pasel a te bila chicnajem ta aiyele, soc nix te bila albil ta alwanej-c'ope, soc te ya yich' ch'ultesel xan te Mero Ch'ul Awilale.

²⁵ Ya sc'an te ya ana'bey swentail in to soc te ya xc'ot ta awo'tan ta mero melel: Te bi ora ya yich' alel mandal ta jachel xan te Jerusalén soc te ya me yich' cha'pasel xan, ja' to teme jul tel te ch'ul jwentainwanej, ya me xc'ax juqueb semana. Te calleetic soc joyob ts'ajc' te ya yich'ix xan pasel ta Jerusalén, ya me xjalajic cheb xchanwinic (62) semana, pero ta spisil in c'aal to, ay me bayal wocol a.

²⁶ C'alal ya xc'ax te cheb xchanwinic (62) semana, ya me smilic te ch'ul jwentainwaneje. Te Jerusalén ya me yich' lajinel soc ya me yich' lajinel uuc te templo, ja' me ya slajin te swinictac te muc' ajwalil ya xtale. Te slajibale ora me ya xc'ot ta pasel, jich me ya xtal te bit'il snojel ja'; ja' to me c'alal slajibal te guerra soc te jinele, ja' te chapal nix sc'oplal ae.

²⁷ Teme c'ax bael jun xan semana ya me spas trato soc bayal ants-winiquetic. Pero ta olil semana ya me scom ta aq'uel milbil smajt'an Dios, soc ya me scom ta aq'uel yantic majt'aniletic. Mero ilaybil me sba te bila ya yich' pasel yu'un ta sts'eel scajtijib milbil smajt'an Dios, ja' to teme jul te lajinel albil sc'oplal ta stojol te mach'a ya spas te at'el ilaybil sbae —xi' ta jtojol te Gabriel.