Daniel 6 - Bible in Tzeltal de Oxchuc y Tenejapa

Och ta xch'en león-chojetic Daniel

¹ Te muc' ajwalil la snop te ya yac'bey yat'elic ta gobernador wacwinic (120) ta jtul winiquetic. Te ajwaliletic swentainejic ta juju-jsejp te q'uinaletic te bay c'alal swentainej te muc' ajwalile.

² La yac'bey yat'el oxebic, yu'un ja' me ya yilbey yat'elic te yantic ajwaliletic, swenta yu'un jich ma'yuc bila ay swocol yu'un a te muc' ajwalile. Te jtule ja' te Daniel.

³ Ora chicnaj yat'el ta stojol te yantic cheb xan mach'atic la yich' yat'elic ta yilel te yat'el yantique, soc ta stojolic te jwentainwanejetic ta juju-jsejp te q'uinale, melel mero bayal sp'ijil yo'tan ta at'el la yilic stuquel. Ja' yu'un te muc' ajwalile, la snop te ya yac'bey swentain te ajwaliletic yu'un te nacione.

⁴ Te mach'atic la yich' yat'elic ta yilel yat'el yantic, soc te gobernadoretic, la sleic bi ya yut ya slebeyic smul ta swenta yat'el te muc' ajwalile, pero melel buen toj yo'tan ya x'at'ej te Daniel, ma ba wejt' yu'unic banti ya stabeyic smul. Jich ma'yuc bila ju' yu'unic yaq'uel ta swenta.

⁵ Pero ma ba laj yo'tanic yu'un, puersa ay bila la snopic a, jich la yalic: —Ma ba ya jtatic bit'il ya jlebeytic smul te Daniel teme ma ja'uc ta swenta te bila xch'uuneje —xiic yu'un.

⁶ Ja' yu'un te j'il-at'eletic soc te ajwaliletic la xchapic te ya xba sc'oponic te muc' ajwalil Darío. Te c'alal c'otic ta stojol, jich c'o yalbeyic: —¡Muc' ajwalil, sbajt'el q'uinal cuxulat! —xiic c'oel ta stojol.

⁷ —Ta jpisiltic te ya jwentaintic te nacione, la jpastic tsoblej te banti la yich' chapel te ya yich' puquel ta alel chajbanbil c'op ta awenta, ja'at muc' ajwalil, te banti ya yal mandal te lajuneb xcha'winic (30) c'aal, ma'yuc mach'a ya yalbey wocol ni junuc dios, ni jtuluc winic, ja'at nax atuquel ya yich' alel wocol ta atojol. Te mach'a ma ba ya xch'uune, ya me yich' ch'ojel ochel ta xch'en león-chojetic.

⁸ Ja' yu'un ya jc'antic te ya awac'bey xan yip te bila chapal cu'untic, soc ya awac' afirma, swenta yu'un ma me xju' ta jinel, jich te bit'il ya yal te ley yu'un te medoetic soc te persaetic, te ma xju' ta yantesele —xiic.

⁹ Ja' yu'un, te muc' ajwalil Darío la yac' sfirma a te c'op chapale.

¹⁰ Te c'alal la yaiy te Daniel te la yac' sfirma, bajt' ta sna. La sjam te ventanaetic te banti ya xwaye, te ayic ta stojol bael Jerusalén. La squejan sba ta sc'oponel Dios soc ta yalel yutsilal. Jich la spas oxeb buelta ta jujun c'aal, jich nix te bit'il la spas spisil ora.

¹¹ Jich te winiquetique, pajal ochic bael ta sna Daniel, yac ta sc'oponel Dios soc yac ta yalel yutsilal sc'oplal Dios c'o staic.

¹² Jich ora ba sc'oponic te muc' ajwalile, swenta yu'un ya yalbeyic sc'oplal te c'op chapale, jich c'o yalbeyic: —Te ja'at te muc' ajwalilat, la apuc ta alel chajbanbil c'op, te banti ya yal teme ay mach'a ya yalbey wocol biluc diosil o winic ta sjunal te lajuneb xcha'winic (30) c'aal, teme ma ja'ucat te muc' ajwalilate, ya me yich' ch'ojel ochel ta xch'en león-chojetic, ¿Ma bal jichuc? —xi'. La sjac' te muc' ajwalil: —Jich nix a, melel te bi chapale, ya me xc'ot ta pasel, jich te bit'il ya yal te ley yu'unic te medoetic soc persaetic, te ma xju' ta yantesele —xi'.

¹³ C'opojic xan bael, jich la yalic: —Ja' te Daniel, te ja' jtul sjoy te judioetic te ic'otic tel ta mosoile, ma sc'an xyich'at ta muc' ja'at te muc' ajwalilat cu'untique, soc mero ma sc'an xyich' ta muc' te c'op chapal la apuc ta alele. Yu'un la quiltiquix te yac ta yalel wocol oxeb buelta jujun c'aal ta stojol te Dios yu'une —xiic.

¹⁴ C'alal la yaiy te muc' ajwalile, bayal la smel yo'tan yu'un, la sle bi ya yut ya scoltay te Daniel. Yac ta snopel smalel c'aal te bi ya yut ya scoltaye.

¹⁵ Pero te winiquetic cha'c'otic xan ta stojol te muc' ajwalile, jich c'o yalic: —Muc' ajwalil cu'untic, ana'oj ta lec te bit'il ay te ley yu'un te medoetic soc persaetic, te spisil bila swenta comel, o c'op chapal, te yac'oj sfirma tey a te muc' ajwalil, ma xju' ta yantesel —xiic c'oel.

¹⁶ Ja' yu'un te muc' ajwalil la sticun ta iq'uel te Daniel, swenta yu'un ya xch'ojic ochel ta xch'en te león-chojetique. Pero te c'alal ma to ba ch'ojbil coel a te Daniel, jich albot yu'un te muc' ajwalile: —Te Dios awu'une, ja' te mero jun awo'tan awac'oj aba ta abatinel yu'un, ac'a scoltayat —xi'.

¹⁷ Te c'alal la yaq'uic ochel ta xch'en león-chojetic te Daniel, la yich'ic tel ton la yac'beyic ta sti'il te ch'ene. Te muc' ajwalil la yac'bey te sello yu'une, soc te sello yu'unic te mach'atic yac'ojbey muc' yat'elic ta at'el soc ta ajwalil, swenta yu'un tulan me sc'oplal ya xc'ot ta stojol Daniel te bila ya yal te leye.

¹⁸ C'alal ju' ta pasel, te muc' ajwalil bajt' ta spalacio, c'o smejts'an sba, ma ba we'ix swenta yijc'ubel q'uinal. Soc ma ba la sc'anix te ay bila ya xtal ch'aybotuc yo'tan yu'une, soc ma ba och swayel sjunal ajc'ubal.

¹⁹ Te c'alal sacub q'uinal, jajch' ta ora, bajt', animaj bael, toj bael ta xch'en león-chojetic.

²⁰ Te c'alal noptsaj bael te muc' ajwalile, bayal ay ta mel-o'tan a te la sc'opon te Daniel, jich la yalbey: —Daniel, abat yu'un te cuxul Diose, ¿la bal scoltayat ta ye león-chojetic te Dios awu'une, ja' te mero jun awo'tan awac'oj aba ta abatinel yu'une? —xi'.

²¹ Jac'bot yu'un te Daniel: —¡Muc' ajwalil, sbajt'el q'uinal cuxulat!

²² Te Dios cu'un la sticun tel ch'ul abat yu'un, ja' la smacbey ye te león-chojetique. Jich ma'yuc bila la spasbon te león-chojetique, melel sna'oj te Dios te ma'yuc bila amen jpasojbat ta atojol te muc' ajwalilat cu'untique —xi'.

²³ Te muc' ajwalil bin nax yo'tan yu'un, soc la sticun ta loq'uesel tel ta xch'en león-chojetic te Daniel. Te c'alal loc' tel yu'unique, ma'yuc ni jxujt'uc yejch'en la stabeyic, melel la yac' smuc'ul yo'tan ta stojol te Dios yu'une.

²⁴ Ja' nix ta yorail a, te muc' ajwalil la sticun ta iq'uel te winiquetic la slebeyic smul te Daniel. Te winiquetic, ta spisil soc yinamic soc yal-snich'nabic, la yich'ic ch'ojel ochel ta xch'en león-chojetic. Ma to ba staojic c'oel a, wilic tel ta stojolic te león-chojetique, jich ti'otic ta ora yu'un.

²⁵ Jich te muc' ajwalil Darío la sts'ibubey jun ta stojolic te ants-winiquetic ta spisil nacionetic soc ta spisil c'opiletic ta q'uinal, jich la yalbey: “Ac'a lamajuc q'uinal awaiyic soc ac'a toyuc xan yutsil awo'tanic.

²⁶ Yo'tic ya cal tulan mandal ta stojol ta spisil te bay c'alal ayic ta jwenta, te ya me yich'ic ta muc' soc ac'a xch'uunic te Dios yu'un Daniel. Melel ja' mero cuxul Dios stuquel, soc sbajt'el q'uinal ay. Te mandalteswanej yu'une, ma'yuc bi ora ya xlaj, soc ma'yuc slajibal te yu'ele.

²⁷ Ja' ya xju' ya xcoltaywan, ja' ya xju' ya x'ac'awan ta libre. Ja' te ya spas jchajp señailetic ta ch'ulchan soc ta balumilal. Ja' la scoltayix ta ye león-chojetic te Daniel”, xi'.

²⁸ Te Daniel stalel jil te bit'il ja' toyol yat'el te banti yac ta mandalteswanej te Darío, soc te c'alal jajch' ta mandalteswanej te Ciro, te ja' muc' ajwalil ta Persia.