Daniel 5 - Bible in Tzeltal de Oxchuc y Tenejapa

Bi ts'ibubil ta pajc'

¹ Belsasar, muc' ajwalil yu'un Babilonia, la stsob ta we'el swenta pas-q'uin jmil ta jtul te mach'atic muc' sc'oplalic ta nación. Te muc' ajwalil soc te ic'bilic yu'une, te c'alal yacalic ta we'el a, la yuch'ic bayal vino.

^2-3 Te c'alal yacubenix yu'un a te vino te muc' ajwalil Belsasar, la sticun ta ich'el tel te vasoetic soc muc'ul tazaetic pasbil ta oro soc plata, te la yich' tel ta templo ta Jerusalén te Nabucodonosor, ja' te state. Te vasoetic soc te muc'ul tazaetic c'ot ta ich'el tel. Te muc' ajwalil, spisil te yinam soc te yantic antsetic yu'une, soc ta spisil te mach'atic ic'bilic ta we'ele, uch'bajic a te biluquetic yu'un templo.

⁴ Ta spisilic la yuch'ic vino soc tey la yalbeyic wocol te loc'ombaetic yu'unique. Te loc'ombaetique, pasbil ta oro, ta plata, ta bronce, ta hierro, ta te' soc ta ton.

⁵ Ora nax chicnaj sc'ab winic yilel. Ta xojobil te candiletic och ta ts'ibuyel ta yal sc'ab ta saquil pajc' yu'un yutil na te banti ayique. C'alal la yil te muc' ajwalil te c'abal yac ta ts'ibuyele,

⁶ toj bael xch'ich'el yu'un. Ta scaj te mero bayal och xiwel ta yo'tan, jajch' ta nijq'uel ta yacan c'alal ta sjol.

⁷ Ora jajch' ta aw, ja' la yic' tel te mach'atic ay bila ya sna'ic syoljoltayele soc te mach'atic bayal bila sna'ojic, soc te mach'atic ay bila sna'ojic ta swenta c'aal, u, eq'uetic te ayic ta Babilonia, jich la yalbey: —Te mach'a ya sna' yilel te bila ts'ibubil ta pajq'ue, soc teme ya yalbon caiy te bila ya sc'an ya yale, ya me yich' ac'beyel slap púrpura c'u'il soc ya yich' ac'beyel yuan ta snuc' cadena pasbil ta oro, ja' me ya xc'ot ta yoxebal ajwalil ta banti yacon ta mandalteswaneje —xi'.

⁸ Ta spisilic te mach'atic ay bila sna'ojic te ayic ta swenta te muc' ajwalile, ochic bael ta yutil na, pero ma'yuc mach'a ju' yu'un sna'beyel swentail te bila ts'ibubil. Jich ma'yuc mach'a cholbot yaiy yu'un te muc' ajwalile.

⁹ Jich och xan bayal xiwel ta yo'tan te muc' ajwalil Belsasar, te yelaw mero ma'yuc xch'ich'el bajt'. Te mach'atic ayic ta abatinel yu'un ajwalil, ma ba la sna' bila ya spasic uuc.

¹⁰ Pero te sme' te muc' ajwalile, ta scaj te awun te yale soc te yantic mach'atic muc' sc'oplalic ic'bilique, och bael ta yut na te banti yacalic ta we'el-uch'el. Jich c'o yal: —¡Muc' ajwalil, sbajt'el q'uinal cuxulat! Ma xamel awo'tan soc ma me xch'ay ach'ich'el yu'un.

¹¹ Li' nix ta banti yacat ta pasaw ta mandal ay jtul winic te wentainbil ta espíritu yu'un te ch'ul Diose. Te c'alal ja' ay ta muc' ajwalil a te atate, te winic ya calbate la yac' ta ilel sp'ijil sjol, buen lec snopjibal yu'un soc buen lec sp'ijil yo'tan jichuc diosetic. Ja' yu'un te atate, te muc' ajwalil Nabucodonosor, la yac'bey yat'el te winique ta swentainel te mach'atic ay sp'ijilic, soc te mach'atic ya sna'ic syoljoltayel, soc te mach'atic spisil ay bila sna'ojic, soc te mach'atic snopojic bitic ayic ta ch'ulchan ta spamal nación.

¹² Melel te Daniel, ja' te Beltsasar yan sbiil la yac'bey te anima muc' ajwalile, ya xju' yu'un sna'beyel swentail ta lec te waichile, soc ya xju' yu'un yalbeyel sc'oplal te bila wocol ta na'ele. Ya xju' yu'un stojtesel spisil chujc'ul c'opetic, melel ay bayal sp'ijil yo'tan soc snopjibal yu'un stuquel. Ticuna ta iq'uel te Daniel, muc' ajwalil, ja' me ya yac'bat ana'bey swentail te bila ts'ibubil ta pajq'ue —xi'.

¹³ Jich bajt' ta iq'uel ta stojol muc' ajwalil te Daniel, jojc'obot yu'un: —¿Ja'at bal te Danielate, te ja' ajoy te judioetic ic'otic loq'uel tel ta Judea yu'un te anima muc' ajwalil Nabucodonosor, ja' te jtate?

¹⁴ La yalbonic te ay ta awo'tan te espíritu yu'un te Diose, te jamal ta lec ajol, te ay buen lec snopjibal awu'un, soc te bayal bitic ana'oje.

¹⁵ Jich te winiquetic bayal sp'ijilic ta spamal nación, xtaluc yiliquix te c'opetic ts'ibubile, yu'un ya yalbonic te bila ya yale, pero jc'axel ma c'ot ta yo'tanic.

¹⁶ La yalboniquix te ja'at ya xju' awu'un yalel te bitic wocol ta na'ele, soc te ya awal ta jamal te bitic chujc'ulic ta na'beyel swentaile. Teme ja'at ya xju' awu'un yalel te c'opetic ts'ibubile, soc teme ya awalbon caiy te bila ya sc'an ya yale, ya me cac'bat alap púrpura c'u'iletic, soc ya me cac'bat awuan cadena pasbil ta oro, soc ya me cac' te ya xc'oat ta yoxebal ajwalil ta banti yacon ta mandalteswaneje —xi'.

¹⁷ Jich la yal te Daniel: —Te majt'aniletic ya awale, ich'a jilel muc' ajwalil, ac'beya ta swenta yan. Pero ya calbat te bila ya yal te c'opetic ts'ibubil ta pajq'ue.

¹⁸ “Te Dios mero toyole la yac'bey ta swenta te at'el ta muc' ajwalil te Nabucodonosor, ja' te atate, soc la yac'bey yutsil sc'oplal soc la yac' ta ich'el ta muc'.

¹⁹ Ta swenta te yip ac'bot yu'un te Diose, ich'ot ta muc' yu'un spisil ants-winiquetic ta spisil lumetic soc nacionetic soc c'opiletic. Ya xtal nijq'uel yu'un xiwel ta yo'tanic ta stojol. Ya xju' ya smil te mach'a ya sc'an ya smile, soc ma ba ya smil te mach'a ma ba ya sc'an ya smile. Ay yantic la yac' toyuc sc'oplal soc ay yantic la yac' pejc'ajuc sc'oplalic.

²⁰ Pero c'alal noj ta yo'tan toybail, soc te tulan la yac' sba ta scaj te stoybaile, la yich' pojbeyel te yipe, soc te yutsil sc'oplal ta muc' ajwalile.

²¹ La yich' loq'uesel ta stojol te ants-winiquetique, la yich' c'atp'unel, pajal soc chambalam c'ot. Ja' la sjoin ta nainel te ja'mal burroetique. La slo' wamal jichuc wacaxetic, ajts'esot yu'un ts'ujul ta scojt'ol te sbaq'uetale, ja' to te la sna' te ja' nax te Dios mero toyol te ay yu'el ta stojol ta spisil te ajwaliletic ta balumilal, soc te ja' ya stojtes te mach'a ajwalil ya sc'an yo'tan ya stojtese.

²² Yo'tic muc' ajwalil Belsasar, te ja' snich'anat te winique, soc te ana'oj te bi c'ot ta swenta, la sc'an te la apejc'an aba te jichuque.

²³ Pero ma jichuc la apas. Ja'at te muc' ajwalilate, la alaban te Cajwaltic te ay ta ch'ulchane, melel la aticun ta ich'el tel ta amesa te vasoetic soc te muc'ul tazaetic yu'un templo ta Jerusalén. Ja'at soc te mach'atic ic'bil awu'une la awuch'ic vino a, soc la awalbey yutsil sc'oplal diosetic a te pasbil ta oro, ta plata, ta bronce, ta hierro, ta te' soc ta ton, ja'ic te ma xyilic q'uinal, te ma xyaiyic c'op, soc te ma'yuc bi ya sna'ique. Yan te Dios yich'ojbat ta sc'ab acuxlejal te ja'at te muc' ajwalilate, soc te ja' nax ta swenta stuquel te ay bila ya xju' awu'un spasele, ma ba ya awalbey yutsil sc'oplal stuquel.

²⁴ Ja' yu'un ja' la sticun tel te c'abal la sts'ibuy te c'opetic in to,

²⁵ te MENE, MENE, TEKEL, y PARSIN, te xie.

²⁶ Ja' ya yal in to: MENE te xie, Dios la sp'isbatix te sc'aalelal te awat'el ta muc' ajwalile, soc la yac'beyix seña te slajibale, xi' c'oem.

²⁷ TEKEL te xie, ja'at te muc' ajwalilate, la awich'ix jp'isel awalal ta balanza, pero mero ma'yuc bayal awalal loc'at, xi' c'oem.

²⁸ PARSIN te xie, te bay c'alal awentainej ta muc' ajwalile, la yich'ix xet'el soc ya me yich' ac'beyel medoetic soc persaetic, xi' c'oem —xi' te Daniel.

²⁹ Te muc' ajwalil Belsasar la yal mandal ta ora te ya yich' aq'uel slap púrpura c'u'il, soc te ya yich' xojel ta snuc' cadena pasbil ta oro te Daniel, soc la spuc ta alel spisilic te ja' nix yorail a te ya xc'ot ta yoxebal ajwalil te banti yac ta pasaw ta mandal te muc' ajwalile.

³⁰ Ja' nix ta yorail ta yijc'ubel q'uinal a, laj ta milel te Belsasar, ja' te muc' ajwalil yu'un caldeoetique.

³¹ Te Darío te media-winique la yu'unin te at'el ta muc' ajwalile. Te Darío ay cheb xchanwinic (62) ja'wil ya'wilal a.