Daniel 4 - Bible in Tzeltal de Oxchuc y Tenejapa

Soc sjol muc' ajwalil Nabucodonosor

¹ Te muc' ajwalil Nabucodonosor la sts'ibubey jun ta stojolic te ants-winiquetic ta spisil nacionetic soc ta spisil c'opiletic ta q'uinal, jich la yalbey: “Ac'a lamajuc q'uinal awaiyic soc ac'a toyuc xan yutsil awo'tanic.

² Ya jc'an te yacuc ana'ic te bitic mero muc' sc'oplal spasojbon ta jtojol te Dios mero toyole.

³ Mero c'ax yan yilel a te smuc'ul yat'el te yu'ele. Sbajt'el me q'uinal ma xloc' yat'el ta Ajwalil. Te yip yu'ele, ya me xc'ax ta stojol spisil ta caj mach'atic ya xc'axic ta q'uinal.

⁴ “Jo'on te Nabucodonosor, bin nax co'tan ayon ta jpalacio, soc buen lec co'tan yu'un te bayal bitic ay cu'une.

⁵ Pero ay jun ajc'ubal, te c'alal wayalonix ae, waichejon. Te jwaiche, bayal tal xiwel ta co'tan yu'un. Bayal bila la jnop ta jol, soc ay bila yacon ta yilel la caiy ta co'tan te mero xiweltic sbae.

⁶ La cal mandal te ya xtalic ta jtojol spisilic te mach'atic bayal bi sna'ojic te ayic ta Babilonia, swenta yu'un ya yalbonic caiy te bila swentailuc te jwaiche.

⁷ Tal spisilic te j'ac'-chameletic, soc te mach'atic ya sna'ic syoljoltayele, soc te mach'atic bayal bila sna'ojique, soc te mach'atic ay bila sna'ojic ta swenta te c'aal, u, eq'uetic. C'alal julic ta jtojol, la calbey yaiyic te jwaiche, pero ma ba ju' yu'unic sna'el, jich ma ba la yalbonic caiy te bila swentaile.

⁸ Ta slajibal jul tel ta jtojol uuc te Daniel, te Beltsasar yan sbiil ta swenta yich'el ta muc' te dios cu'une. Te Daniele wentainbil xcuxlejal yu'un te espíritu yu'un te ch'ul Diose. La jcholbey yaiy te jwaiche, jich la calbey:

⁹ ‘Beltsasar, jwentainwanej yu'un te mach'atic ay bila ya sna'ic syoljoltayele, jna'oj te ja' swentainejat te espíritu yu'un te ch'ul Diose, soc te ana'oj spisil te bitic wocol ta na'ele. Aiybon me awaiy jiche te bila la quil ta jwaiche, soc ya me awalbon caiy te bila swentaile’, xoon.

¹⁰ Te bitic la quil la caiy te c'alal wayalon ae, jich ay: “Ta yolil te lumq'uinale, ay jpejt' te' mero toyol.

¹¹ Te te'e muc'ub bael, mero muc' sbalejal c'ot. Jich nix te stoyolile, staoj ch'ulchan te sni'ile, chican to ta ilel ta sc'ubulil te lumq'uinale.

¹² Mero t'ujbil te yabenale, soc mero bayal te site, tic' ya xwe'ic ta spisilic a. Te ja'mal chambalametic ya yaiyic axinal ta ye'tal, ta sc'abc'ab ya spas xpechechic te mutetic, soc ja' swentainej te xcuxlejal te mach'atic ayic ta balumilale.

¹³ “Ora nax la quil la caiy jtul ch'ul abat j'il-q'uinal, yac ta coel tel ta ch'ulchan,

¹⁴ jich yac ta yalel ta tulan: ‘Ts'etaic te te'e, set'beyaic te sc'abc'abe; tulbeyaic te yabenale, soc pucbeyaic te site. Ac'a anuquic bael te chambalametic te yac ta antayel yaxinal yu'une, soc nix te mutetic ayic ta sc'abc'abe.

¹⁵ Pero ijq'uitayaic ta lumq'uinal stuquel te xchumante'el soc te yisime. Chucaic ta cadena pasbil ta hierro soc ta bronce, ac'a ainuc ta yolil ja'maltic. Ac'a yaluc ts'ujul ta sba, pajal ac'a slo' wamal ta q'uinal soc chambalametic.

¹⁶ Ac'a bolobuc sjol, jich ac'a c'otuc te bit'il chambalame. Ac'a jalajuc juqueb ja'wil te bila amen ta stojole.

¹⁷ Ja' te castigo la yaq'uic j'il-q'uinal ch'ul abatetic in to, swenta yu'un spisil me winiquetic ya sna'ic te ja' Dios mero toyol ay yip yu'el ta stojolic te chajbalchajp ajwaliletic ch'ich'-baq'uetetique. Ja' ya yac' ochel ta ajwalil te mach'a ya sc'an yo'tane, ya yac' ochel ta jwentainwanej ta stojol jun nación te mach'a mero peq'uele, ja' te mero peq'uel yu'un te winiquetique’, xi' sc'op te j'il-q'uinal ch'ul abate.

¹⁸ “Jo'on muc' ajwalilon te Nabucodonosor te la jwaichin in to. Jich la cal: ‘Yo'tic, Beltsasar, albon me caiy te bila swentail te jwaiche. Melel te banti ayon ta ajwalile, ma'yuc jtuluc te mach'a ay bila sna'oj te ya xju' yu'un sna'beyel swentaile. Pero te ja'ate ya xju' awu'un sna'beyel swentail, melel te ja'ate, awich'ojbey te espíritu yu'un te ch'ul Diose’, xoon.

¹⁹ “Jich te Daniel, te Beltsasar yan sbiile, caj ta snopel soc ta sna'el ta yo'tan, melel xiw yo'tan yu'un te bila tal ta sjole. Pero jo'on te muc' ajwalilone, jich la calbey: ‘Beltsasar, ma me xamel awo'tan yu'un te jwaiche soc te bi swentaile’, la cut. La sjac' te Beltsasar: ‘¡Ay, spisil te bila swentailuc te awaiche, ja' me ac'a c'otuc ta stojol te acontroe!

²⁰ Melel te buen toyol soc buen muc' sbalejal te' la awil te c'oem c'alal ta ch'ulchan, te ya xju' ta ilel ta mero sc'ubulil te lumq'uinale,

²¹ te ay buen t'ujbil yabenal, te buen bayal sit, te tic' ya xwe' spisilic a, te ya xnoptsajic bael ja'mal chambalametic ta yantayel yaxinal, soc te ya spas xpechechic mutetic ta sc'abc'abe,

²² te te'e ja'at me ac'oplal c'oem te muc' ajwalilate, te muc'ubenat soc te ay bayal awipe. Te smuc'ul te awat'ele, te la staix c'oel te stoyolil ch'ulchane, ja' te ochemix ta ac'ab ta spisil te lumq'uinale.

²³ La awil te ay j'il-q'uinal ch'ul abat te yac ta coel tel ta ch'ulchane, te jich yac ta yalele: “Ts'etaic te te' soc lajinaic ta jc'axel, pero ijq'uitayaic ta lumq'uinal stuquel te xchumante'el soc te yisime. Chucaic jilel ta cadena pasbil ta hierro soc ta bronce, ijq'uitayaic ta yolil ja'maltic. Ac'a c'otuc ts'ujul ta sba, soc ac'a scomon lo'ic wamal soc chambalametic ta ja'maltic juqueb ja'wil”, te xie.

²⁴ Ja' ya yalbey sc'oplal te castigo ya yac'batix ta atojol te Dios mero toyole.

²⁵ Te ja'at muc' ajwalil, ya me awich' pijt'esel ta stojol te ants-winiquetique, ya me xba ajoin ta nainel chambalametic. Ya me alo' wamaletic jichuc wacaxetic. Ya me yajts'esbat abaq'uetal te ts'ujule. Jich me ya x'ainat juqueb ja'wil tey a, muc' ajwalil, ja' to teme c'ot ta awo'tan te ay yip yu'el te Dios ya x'at'ej ta stojol ajwaliletic te ch'ich'-baq'uet naxe, soc te ja' nax stuquel ya yac' ochuc yat'el ta ajwalil te mach'a ya sc'an ya yac' ochel stuquele.

²⁶ Te mandal la awaiye, te ya yich' ijq'uitayel ta lum te xchumante'el soc te yisime, ja' ya yac' ta na'el te ya to xcha'ochat xan ta muc' ajwalile. Pero ja' to teme la ana' te ja' nax te Dios te ay yip yu'ele.

²⁷ Ja' yu'un, muc' ajwalil, ja' me xat'un jiche te tojtesel cu'un in to: Mero stojil me xapasix te awat'ele, ma me xaleix amul. Jc'axel x'alajinbey sc'oplal te bila amene, soc at'elina scoltayel te me'baetique. Teme repente jich spisil ora lamal q'uinal ta atojol, soc ya me x'esmaj xan bael biluc awu'un’, xi' ta jtojol te Beltsasar”, xi' sc'op te Nabucodonosore.

²⁸ Spisil te bitic alot ta stojol te muc' ajwalil Nabucodonosor c'ot ta pasel:

²⁹ C'alal c'ax jun ja'wil, te muc' ajwalil yac ta comcom beel ta terraza yu'un ta palacio ta Babilonia,

³⁰ jich la yal: —¡Ila awilic bi yilel smuc'ul te Babilonia! Jo'on ta swenta smuc'ul quip, te ju' cu'un spasel swenta yu'un ja' muc'ul lum yu'un ajwalil ta spisil te q'uinal bay c'alal jwentaineje, swenta yu'un jich me ya quijq'uitaybey sna'jibal a te yutsil smuc'ul jc'oplale —xi'.

³¹ Yac to ta c'op a te muc' ajwalile, chicnaj c'op ta ch'ulchan, te jich la yale: —Muc' ajwalil Nabucodonosor, aiya me awaiy te bila ya cale. Te ja'ate loq'uemix awat'el ta muc' ajwalil.

³² Ya me awich' loq'uesel ta yolil te ants-winiquetic, ya me xbaat ta nainel soc chambalametic. Ya me alo' wamal jichuc wacax. Jich me ya x'ainat juqueb ja'wil tey a, ja' to me teme c'ot ta awo'tan te ay yip yu'el ta stojol spisil nacionetic ta balumilal te Dios mero toyole, soc te ja' stuquel te ya yac'bey yat'el ta ajwalil te mach'a ya sc'an ya yac' ochele —xi'.

³³ Ja' nix ta yorail a, c'ot ta pasel te castigo la yich' alele. Te Nabucodonosor la yich' loq'uesel bael ta stojol te ants-winiquetique. La slo' wamal jichuc wacaxetic. Ajts'esbot sbaq'uetal yu'un te ts'ujule, ja' to c'alal najt'ub te stsotsil sjol soc najt'ub te yejq'ueche, jich c'ot te bit'il sc'uc'umal soc yejq'uech te águilae.

Lecub xan Nabucodonosor

³⁴ La yal xan te Nabucodonosore: “C'alal ts'acaj te castigo ta jtojole, jo'on te Nabucodonosor la quil moel te ch'ulchane. Te c'alal la quil moele, la caiy te lecubon te bit'il boloben te jole. Jich la calbey yutsil sc'oplal te Dios mero toyole, jich la calbey ta xch'ul-tojol te Mach'a cuxul ta swenta sbajt'el q'uinale: ‘Sbajt'el q'uinal ay yip te yu'ele; sbajt'el q'uinal ay ta ajwalinel yu'un spisil ta cajalcaj mach'atic ya xc'axic ta q'uinal.

³⁵ Ta stojol stuquel, mero ma'yuc swentail te mach'atic ayic ta balumilale. Ja' me ya spas ta ch'ulchan soc ta balumilal te bila ya sc'an ya spase. Ma'yuc mach'a ya xju' yu'un ya scombey te yu'ele; ma'yuc mach'a ya xju' yu'un ya sjojc'obey bi yu'un jich ya spas.

³⁶ “Ja' nix ta yorail a cha'lecub xan q'uinal la caiy. Te smuc'ul yutsil te banti ayon ta ajwalil, te yutsil jc'oplal, soc smuc'ul jc'oplale, cha'sujt' xan tel ta jtojol. Te jtojteswanejetic, jtac'uywanejetic soc te mach'atic yich'oj tulan yat'elic te banti ayon ta ajwalile, tal sleonic. Jich cha'ochon xan ta cat'el ta ajwalil ta stojol te nación cu'une. C'axem to xan jich muc'ub cat'el a te bit'il cat'el ta neelal toe.

³⁷ “Yo'tic, jo'on te Nabucodonosor, ya calbey wocol, ya quich' ta muc' soc ya jtoyesbey yutsil sc'oplal te Muc' Ajwalil ta ch'ulchane. Melel spisil te bitic ya spase mero melel ya xc'ot, soc mero stojil ya spas. Ya yac'bey spejc'an sbaic te mach'atic bayal sc'oplal ya scuy sbaique”, xi' te Nabucodonosor ta sjun.